2 Patshalar 13 bob
1 Dawıttın' ulı Abshalomnın' Tamara degen bir sulıw qarındası bar edi. Dawıttın' basqa bir ulı Amnon Tamaranı su'yip qaldı.
2 Amnon qarındası Tamara sebepli azap shegip, awırıp qaldı. Sebebi Tamara pa'k qız bolg'anlıqtan, Amnon ushın qızg'a bir na'rse islew mu'mkinshiligin tabıw qıyın edi.
3 Biraq Amnonnın' İonadab degen jorası bar edi. İonadab Dawıttın' a'jag'ası Shimeanın' ulı bolıp, ol ju'da' hiyleker edi.
4 Bir ku'ni İonadab Amnonnan: – Ha'y, patshanın' ulı, nege ku'nnen-ku'nge azıp baratırsan'? Mag'an sebebin aytpaysan' ba? – dep soradı. Amnon og'an: – Tuwısqanım Abshalomnın' qarındası Tamaranı su'yip qaldım, – dep juwap berdi.
5 İonadab og'an: – To'sekke jatıp alıp, o'zin'di awırıp atırg'anday etip ko'rset. A'ken' seni ko'riw ushın kelgende, og'an: «Ag'a, o'tinish, qarındasım Tamara kelip, mag'an awqat pisirip bersin. Awqattı ko'z aldımda pisirsin, onı ko'rip, qolınan awqat jeyin», – dep ayt, – dedi.
6 Solay etip, Amnon to'sekke jatıp alıp, o'zin awırıp atırg'anday etip ko'rsetti. Patsha onı ko'riwge kelgende, Amnon patshag'a: «Ag'a, o'tinish, qarındasım Tamara kelip, ko'z aldımda bir-eki taba nan pisirip bersin. Men onın' qolınan nan jeyin», – dedi.
7 Sonda Dawıt sarayda jasap atırg'an Tamarag'a: «A'jag'an' Amnonnın' u'yine barıp, og'an jeytug'ın bir na'rse pisirip ber», – dep xabar jiberdi.
8 Tamara a'jag'ası Amnonnın' u'yine ketti. Ol to'sekte jatırg'an edi. Tamara qamır iylep, onın' u'yinde taba nan pisirdi.
9 Son'ınan tabanı alıp, nandı Amnonnın' dasturxanına qoyg'anda, ol jegisi kelmedi. Sonda Amnon u'ydegilerge: «Qasımnan ha'mme shıg'ıp ketsin», – dep buyırdı. Ha'mme shıg'ıp ketti.
10 Bunnan keyin, Amnon Tamarag'a: «Awqattı jatatug'ın bo'lmeme alıp kel, men senin' qolın'nan awqat jeyin», – dedi. Tamara o'zi pisirgen nanlardı a'jag'ası Amnonnın' jatatug'ın bo'lmesine apardı.
11 Jesin dep, Tamara nandı Amnong'a jaqınlatqanda, ol Tamaranı uslap alıp: – Qarındasım, kel, menin' menen jat, – dedi.
12 Biraq Tamara og'an bılay dedi: – Yaq, a'jag'a, menin' namısıma tiyme. İzrailda bunday is islenbeydi. Bunday aqılsızlıqtı isleme.
13 Usınday shermendelikten keyin, men qalay bas ko'terip ju're alaman? Al sen İzraildag'ı aqmaq adamlardın' biri bolıp qalasan'. O'tinemen, patsha menen so'yles, ol senin' mag'an u'yleniwin'e qarsı bolmaydı.
14 Degen menen, Amnon Tamarag'a qulaq salg'ısı kelmedi. Ol qızdan ku'shlirek bolg'anlıqtan, qızdı zorlap, namısına tiydi.
15 Sonnan son', Amnonnın' Tamaranı jek ko'rgenligi sonshelli, onın' jek ko'riwshiligi burın bolg'an muhabbatınan da ku'shlirek edi. Amnon Tamarag'a: – Tur, joq bol! – dedi.
16 Tamara Amnong'a: – Yaq, meni quwıwın' – bul birinshi islegen jamanlıg'ın'nan da awırıraq, – dedi. Biraq Amnon og'an qulaq salg'ısı kelmedi.
17 Amnon xızmetshi jigitin shaqırıp og'an: «Mına birewdi bul jerden quwıp jiber de, artınan qapını jawıp tasla», – dedi.
18 Jigit Tamaranı sırtqa shıg'arıp, izinshe qapını jawdı. Tamaranın' u'stinde uzın, jen'i de uzın nag'ıslı kiyim bar edi. Patshanın' turmısqa shıqpag'an qızları usılay kiyinetug'ın edi.
19 Tamara basına ku'l shashıp, u'stindegi uzın jen'li kiyimin jırtıp tasladı. Ol qolları menen basın uslap, dad salıp, en'irewi menen ketti.
20 A'jag'ası Abshalom qızg'a: «Senin' menen birge bolg'an a'jag'an' Amnon ba edi? Endi sestin'di shıg'arma, qarındasım. Ol senin' a'jag'an'- g'o. Bul waqıyag'a qapa bolma», – dedi. Solay etip, Tamara a'jag'ası Abshalomnın' u'yinde jalg'ız ha'm mun'lı jasadı.
21 Dawıt patsha bolıp o'tkenler haqqında esitip, qattı g'a'zeplendi.
22 Abshalom Amnong'a jaqsı da, jaman da so'z aytpadı. O'ytkeni ol qarındası Tamaranın' namısına tiygeni ushın, Amnondı jek ko'rip qalg'an edi.
23 Eki jıldan keyin, Abshalom patshanın' barlıq ulların o'zinin' qoyın qırqtırıp atırg'an jerge, Efrayım qalasına jaqın jerdegi Baal-Xasorg'a shaqırdı.
24 Abshalom patshag'a kelip: – Men qoylarımdı qırqtırıp atırman. O'tinemen, o'zin'iz de, xızmetshilerin'iz de menin' menen birge sol jerge barsan'ız, – dedi.
25 Dawıt patsha og'an: – Yaq, ulım, eger bizler ha'mmemiz barsaq, sag'an ju'k bolamız, – dedi. Abshalom qattı jalınsa da, patshanın' barg'ısı kelmedi, biraq balasına pa'tiya berdi.
26 Sonda Abshalom patshag'a: – Onda a'jag'am Amnonnın' bizler menen birge barıwına ruxsat berin', – dedi. Patsha onnan: – Amnon nege senin' menen barıwı kerek? – dep soradı.
27 Biraq Abshalom jalına bergennen keyin, patsha Amnondı ha'm basqa ullarının' ha'mmesin onın' menen birge jiberdi.
28 Abshalom xızmetshilerine bılay dep buyırdı: «Amnonnan ko'z u'zben'ler! Ol sharap iship, ma's bolg'an waqıtta, men sizlerge: „Amnondı o'ltirin'“, – dep aytaman. Sonda onı o'ltirin'ler. Qorqpan'lar! Sizlerge buyrıqtı men berip atırman. Ku'shli ha'm ma'rt bolın'lar!»
29 Xızmetshiler Abshalomnın' buyrıg'ın orınlap, Amnondı o'ltirdi. Sonda patshanın' basqa ulları g'ashırlarına minip, qashıp ketti.
30 Olar jolda kiyatırg'anda, Dawıtqa: «Abshalom patshanın' barlıq ulların o'ltiripti, olardın' birde birewi tiri qalmaptı», – degen xabar jetip keldi.
31 Patsha ornınan turdı da, kiyimlerin jırtıp, o'zin jerge tasladı. Onın' janındag'ı barlıq xızmetshileri de kiyimlerin jırttı.
32 Sonda Dawıttın' a'jag'ası Shimeanın' ulı İonadab bılay dedi: «Taqsır, ha'mme ullarımnan ayırılıp qaldım dep oylaman'ız. Tek Amnon o'ldi. Sebebi ol qarındası Tamaranın' namısına tiygennen beri, Abshalom Amnondı o'ltiriwdi oylap ju'rgen edi.
33 Sonlıqtan taqsır, ha'mme ulların'ız o'ldi, degen xabardan ta'shiwishlenben'. Tek jalg'ız Amnon g'ana o'ldi».
34 Sol arada Abshalom qashıp ketti. Gu'zetshi jigit to'beshiktin' batıs jolınan u'lken bir alamannın' kiyatırg'anın ko'rdi.
35 İonadab patshag'a: «A'ne, ulların'ız kiyatır. Qulın'ızdın' aytqanınday boldı», – dedi.
36 Ol aytıp bolar-bolmastan, patshanın' ulları jetip keldi de, dad salıp jılay basladı. Patsha da, xızmetshileri de qattı o'kirip jıladı.
37 Al Abshalom qashıp, Geshur patshası Ammihud ulı Talmaydın' janına bardı. Dawıt ulı Amnon ushın uzaq waqıt aza tuttı.
38 Geshurg'a qashqan Abshalom ol jerde u'sh jıl boldı.
39 Endi patsha Dawıt Abshalomdı sag'ına basladı. Sebebi ol Amnonnın' o'limine jubanısh tapqan edi.
