2 Patshalar 3 bob
1 Shauldın' ta'repdarları menen Dawıttın' ta'repdarları arasındag'ı urıs uzaq dawam etti. Dawıttın' ku'shine ku'sh qosılg'an sayın, Shauldın' ta'repdarları ha'lsirep bara berdi.
2 Dawıttın' Xebronda tuwılg'an balaları mınalar: tun'g'ısh ulı Amnon. Ol izreelli Axinoamnan tuwıldı;
3 ekinshisi Kileab bolıp, ol karmelli Nabaldın' jesiri Abigayıldan tuwıldı; u'shinshisinin' atı Abshalom, ol Geshur patshası Talmaydın' qızı Maaxadan tuwıldı;
4 to'rtinshisi Xaggitten tuwılg'an Adoniya, besinshisi Abitaldan tuwılg'an Shefatiya,
5 altınshısı Dawıttın' Egla degen hayalınan tuwılg'an İtream edi. Dawıttın' bul ullarının' ha'mmesi Xebronda tuwıldı.
6 hauldın' ta'repdarları menen Dawıttın' ta'repdarları arasında urıs dawam etip atırg'anda, Abner Shauldın' ta'repdarları arasında ku'shke tolıp bara berdi.
7 Shauldın' Rispa degen bir toqalı bar bolıp, ol Ayya degen adamnın' qızı edi. Bir ku'ni İsh-Boshet Abnerden: – Ne ushın sen a'kemnin' toqalı menen jattın'? – dep soradı
8 İsh-Boshettin' sorawına qattı g'a'zeplengen Abner og'an bılay dep baqırdı: – Men ne Yahudag'a xızmet qılıp ju'rgen bir ko'pek pe edim? Men usı ku'nge deyin, a'ken'iz Shauldın' xojalıg'ına, tuwısqanlarına ha'm doslarına sadıq boldım. Sizdi de Dawıtqa satıp bermedim. Biraq bu'gin siz meni usı hayal sebepli ayıplap atırsız.
9 Jaratqan İyenin' Dawıtqa wa'de etkenin ju'zege asırmasam, onda Quday meni jazalag'an u'stine jazalasın!
10 Ol patshalıqtı Shauldın' na'silinen tartıp alıp, Dannan Beer-Shebag'a shekem sozılg'an İzrail menen Yahudada Dawıttın' patshalıg'ın ornatatug'ının aytıp, wa'de etken edi.
11 İsh-Boshet Abnerden qorqqanlıqtan, og'an basqa hesh na'rse ayta almadı.
12 Bunnan keyin, Abner o'z atınan Dawıtqa xabarshılar jiberip, bılay dedi: «Bul eldi siz basqarıwın'ız kerek emes pe? Eger menin' menen kelisim du'zsen'iz, pu'tkil İzraildı siz ta'repke awdırıw ushın, ja'rdem beremen».
13 Dawıt og'an: «Yaqshı, men senin' menen kelisim du'zemen. Biraq bir sha'rtim bar: meni ko'riwge kelgenin'de, Shauldın' qızı, hayalım Mixaldı da o'zin' menen birge alıp kel. Bolmasa, aldıma kelmey-aq qoy», – dedi.
14 Son'ınan Dawıt Shauldın' ulı İsh-Boshetke de xabarshılar jiberip, olar arqalı: «Qalın' malg'a ju'z filisttin' su'nnet terisin to'lep alg'an hayalım Mixaldı mag'an qaytarıp ber», – dedi.
15 Sonda İsh-Boshet adamlar jiberip, Mixaldı ku'yewi Paltieldin' u'yinen aldırdı. Paltiel Layısh degen adamnın' ulı edi.
16 Ku'yewi jılawı menen Baxurimge shekem hayalına erip bardı. Biraq Abner og'an: «İzin'e qayt», – degende, ol izine qaytıp ketti.
17 Sol arada Abner İzraildın' aqsaqalları menen ushırasıp, olarg'a bılay dedi: «Sizler ko'pten beri Dawıttın' o'zlerin'izge patsha bolıwın qa'legen edin'iz.
18 Endi bunı iske asırın'. Sebebi Jaratqan İye Dawıt haqqında: „Qulım Dawıt arqalı xalqım İzraildı filistlerdin' ha'm pu'tkil dushpanlarının' qolınan qutqaraman“, – degen edi».
19 Abner benyaminliler menen de so'ylesti. Son'ınan ol İzrail xalqının' ha'm Benyamin urıwının' qa'lewi tuwralı Dawıtqa xabarlaw ushın Xebrong'a ketti.
20 Abner janına jigirma adamdı alıp Xebrong'a, Dawıttın' janına bardı. Dawıt Abner ha'm onın' janındag'ılar ushın zıyapat berdi.
21 Abner Dawıtqa: «Endi barıp, pu'tkil İzrail xalqın jıynap, taqsırım, sizin' aldın'ızg'a alıp keleyin. Olar siz benen kelisim du'zsin. Sonda siz qa'legen jerin'izdin' ha'mmesi u'stinen patshalıq qılasız», – dedi. Bunnan son', Dawıt Abnerdi shıg'arıp saldı. Ol da aman-esen jolına tu'sti.
22 Ko'p uzamay, Dawıttın' adamları menen İoab bir basqınshılıqtan qaytıp keldi. Olar o'zleri menen birge ko'p olja alıp kelgen edi. Biraq sol waqıtta Abner Xebronda Dawıttın' janında joq edi. Sebebi Dawıt onı shıg'arıp salg'an bolıp, ol aman-esen jo'nep ketken edi.
23 İoab ha'm onın' janındag'ı pu'tkil a'skerler Xebrong'a kelgende, olarg'a Ner ulı Abnerdin' patshag'a kelgeni, patshanın' onı qaytarıp jibergeni, onın' da aman-esen u'yine qaytqanı tuwralı xabarladı.
24 Sonda İoab patshag'a kelip: «Siz ne islep qoydın'ız? Abner o'z ayag'ı menen aldın'ızg'a kelgen bolsa, onı nege bosatıp jiberdin'iz? Ol ketip qalıptı-g'o!.
25 Ner ulı Abnerdi o'zin'iz bilesiz. Ol sizdi aldaw ushın, qay jerge barıp, qay jerden keletug'ının'ızdı ha'm neler isleytug'ının'ızdı biliw ushın kelgen», – dedi.
26 İoab Dawıttın' janınan shıqqannan keyin, Abnerdin' izinen xabarshılar jiberdi. Xabarshılar onı Sira suw saqlag'ıshının' janınan qaytarıp alıp keldi. Dawıt bunnan biyxabar edi.
27 Abner Xebrong'a qaytıp kelgende, İoab o'zin onın' menen jeke so'ylesip alatug'ın adamday ko'rsetip, onı qala da'rwazasınan kirgizdi. Tuwısqanı Asaheldin' qanın to'kkeni ushın, İoab sol jerde Abnerdin' qarnına pıshaq urıp o'ltirdi.
28 Dawıt bul waqıyanı esitkende bılay dedi: «Men de, menin' patshalıg'ım da Ner ulı Abnerdin' qanı ushın Jaratqan İyenin' aldında ma'n'gige ayıpsızbız.
29 Onın' qanının' qunı İoabtın' ha'm onın' a'kesinin' pu'tkil u'yishinin' moynında. İoabtın' urpag'ınan irin'li jarag'a ha'm jaman teri keselligine shalıng'anlar, baldaqqa su'yengenler, qılıshtan o'lgenler, nang'a zar bolg'anlar hesh qashan arılmasın».
30 Solay etip, İoab ha'm onın' inisi Abishay Abnerdi o'ltirdi. O'ytkeni Abner Gibondag'ı sawashta olardın' inisi Asaheldi o'ltirgen edi.
31 Son'ınan Dawıt İoabqa ha'm onın' janındag'ılarg'a: «Kiyimlerin'izdi jırtıp, aza kiyimin kiyin'ler ha'm Abner ushın jılan'lar», – dep buyrıq berdi. Dawıt patshanın' o'zi Abnerdin' tabıtının' izinde ju'rdi.
32 Olar Abnerdi Xebrong'a jerledi. Patsha Abnerdin' qa'birinin' basında dawıs shıg'arıp jıladı. Sol jerdegi pu'tkil xalıq ta jıladı.
33 Son'ınan patsha Abner ushın mına joqlawdı ayttı: «Abner, sen bir aqmaq sıyaqlı o'liwin' kerek pe edi?
34 Qolların' baylawlı, ayaqların' kisenlewli emes edi-g'o. Biraq sen qaraqshılar qolınan o'ltirilgen adam sıyaqlı qaza taptın'». Ha'mme Abner ushın ja'ne jıladı.
35 Xalıq Dawıtqa barıp, ku'n batpastan burın onı bir na'rse jep alıwg'a ko'ndirmekshi bolg'anda, Dawıt ant iship bılay dedi: «Ku'n batpastan aldın nan yamasa bir na'rse jesem, Quday meni jazalag'an u'stine jazalasın!»
36 Pu'tkil xalıq bunı bildi ha'm patshanın' barlıq islerin unatqanı sıyaqlı, bul isin de unattı.
37 Sol ku'ni Yahudadag'ı ha'm İzraildag'ı ha'r bir adam Ner ulı Abnerdin' o'liminde patshanın' qolı joqlıg'ın bildi.
38 Patsha adamlarına bılay dedi: «Bu'gin İzrailda bir basshının', ullı bir adamnın' o'lgenin bilmeysizler me?
39 Men maylanıp, patsha etip qoyılg'an bolsam da, bu'gin ha'lsizben. Al mına Seruyanın' ulları bolsa, mennen ku'shlirek. Jaratqan İye jamanlıq islegenge jamanlıg'ına jarasa qaytarsın!»
