3 Patshalar 13 bob

Yahudalı Qudaydın' adamı(1-10),Beyt-elli g'arrı payg'ambar(11-32),Yarobamnın' ullı gu'nası(33-34).

¹ Yarobam qurbanlıqtı jag'ıp tu'tetiw ushın qurbanlıq orınnın' janında turg'an waqıtta, Qudaydın' adamı Jaratqan İyenin' buyrıg'ı boyınsha Yahudadan Beyt-Elge keldi.

² Ol Jaratqan İyenin' buyrıg'ı boyınsha, qurbanlıq orıng'a qarata bılay dep baqırdı: «Qurbanlıq orın, ha'y, qurbanlıq orın! Jaratqan İye bılay deydi: „Dawıttın' urpag'ınan İoshiya degen bir ul du'nyag'a keledi. Ol qurbanlıqtı jag'ıp tu'tetip, sıyınıw orınlarında xızmet etken ruwxaniylerdi senin' u'stin'de qurbanlıqqa beredi. Senin' u'stin'de adamnın' su'yekleri jag'ıladı“».

³ Sol ku'ni Qudaydın' adamı bunın' belgisi tuwralı bılay dedi: «Bul so'zlerdi Jaratqan İyenin' aytqanlıg'ın bildiretug'ın belgi mınaw: mına qurbanlıq orın qaq ayırılıp, u'stindegi ku'l to'gilip ketedi».

⁴ Patsha Yarobam Qudaydın' adamının' Beyt-Elde qurbanlıq orıng'a qarsı baqırıp aytqan so'zlerin esitkende, qolın qurbanlıq orınnan alıp, og'an qaray sozdı da: «Uslan'lar onı!» – dep baqırdı. Sonda onın' Qudaydın' adamına qaray sozg'an qolı sa'rriyip qatıp, qıymıldamay qaldı.

⁵ Qudaydın' adamının' Jaratqan İyenin' so'zine muwapıq aytqan belgisi boyınsha, qurbanlıq orın qaq ayırılıp, u'stindegi ku'l to'gildi.

⁶ Sol waqıtta patsha Yarobam Qudaydın' adamına: «O'tinemen, qolımnın' burıng'ı halına keliwi ushın, Qudayın' Jaratqan İyege duwa etip, Onnan rehim etiwdi sora», – dedi. Qudaydın' adamı Jaratqan İyege jalbarıng'anda, patshanın' qolı jazılıp, burıng'ı halına keldi.

⁷ Patsha Qudaydın' adamına: – Menin' menen u'yime barıp, awqatlanıp, ha'llenip al, sag'an sıylar bereyin, – dedi.

⁸ Biraq Qudaydın' adamı og'an: – Baylıg'ın'ızdın' yarımın bersen'iz de, men siz benen birge barmayman, bul jerden nan da jemeymen, suw da ishpeymen.

⁹ Sebebi Jaratqan İye mag'an: «Ol jerde hesh na'rse iship-jeme ha'm barg'an jolın' menen qaytpa», – dep buyrıq berdi, – dep juwap berdi.

¹⁰ Solay etip, Qudaydın' adamı Beyt-Elge kelgen jolınan keri qaytpay, basqa jol menen ketti.

¹¹ Beyt-Elde jasaytug'ın bir g'arrı payg'ambar bar edi. Ulları kelip, og'an sol ku'ni Qudaydın' adamının' Beyt-Elde islegen isleri ha'm patshag'a aytqanları haqqında a'kesine aytıp berdi.

¹² G'arrı olardan: «Qudaydın' adamı qaysı joldan ketti?» – dep soradı. Ulları og'an Yahudadan kelgen Qudaydın' adamının' qaysı joldan ketkenin ko'rsetti.

¹³ Sonda g'arrı ullarına: «Eshegimdi ertlen'ler», – dedi. Ulları eshegin ertlegennen son', ol eshekke minip,

¹⁴ Qudaydın' adamının' izinen ketti. Onı terebinf ag'ashının' astında otırg'an jerinen taptı ha'm onnan: – Yahudadan kelgen Qudaydın' adamı senbisen'? – dep soradı. Sol adam: – Awa, men, – dep juwap berdi.

¹⁵ G'arrı payg'ambar og'an: – Ju'r, menin' menen u'yge barıp, awqat jep ket, – dedi.

¹⁶ Qudaydın' adamı og'an: – Jolımnan qaytıp, siz benen kete almayman. Bul jerde nan da jemeymen, suw da ishpeymen.

¹⁷ O'ytkeni Jaratqan İye mag'an: «Ol jerde hesh na'rse iship-jeme ha'm barg'an jolın' menen qaytpa», – dep buyrıq berdi, – dep juwap berdi.

¹⁸ G'arrı payg'ambar og'an: – Men de sen sıyaqlı bir payg'ambarman. Jaratqan İyenin' buyrıg'ı boyınsha bir perishte kelip, mag'an: «Onı qaytarıp, u'yin'e a'kel. Ol nan jep, suw iship alsın», – dep ayttı, – dedi. Biraq g'arrı payg'ambar Qudaydın' adamın aldag'an edi.

¹⁹ Solay etip, Qudaydın' adamı g'arrı payg'ambar menen birge izine qayttı ha'm onın' u'yine barıp, iship-jedi.

²⁰ Olar ele dasturxan a'tirapında otırg'anda, Qudaydın' adamın jolınan qaytarg'an payg'ambarg'a Jaratqan İyeden so'z tu'sti.

²¹ G'arrı payg'ambar Yahudadan kelgen Qudaydın' adamına bılay dep baqırdı: «Jaratqan İye bılay deydi: „Sen Menin' so'zime boysınbadın', Qudayın' Jaratqan İyenin' o'zin'e bergen buyrıg'ın orınlamadın'.

²² Jolın'nan qaytıp, sag'an iship-jeme degen jerimde iship-jedin'. Sonlıqtan senin' denen' ata-babaların'nın' qa'birine qosılmaydı“».

²³ Qudaydın' adamı iship-jep bolg'annan son', g'arrı payg'ambar onın' eshegin ertlep berdi.

²⁴ Qudaydın' adamı ketip baratırıp, jolda bir arıslang'a tap boldı, arıslan onı o'ltirdi. Eshek te, arıslan da sozılıp jatırg'an denenin' janında turg'an edi.

²⁵ Joldan o'tip baratırg'anlar jolda jatırg'an o'likti ha'm onın' janında turg'an arıslandı ko'rdi. Olar g'arrı payg'ambar jasap atırg'an qalag'a barıp, ko'rgenlerin aytıp berdi.

²⁶ Qudaydın' adamın joldan qaytarg'an g'arrı payg'ambar bunı esitkende: «Jaratqan İyenin' so'zine boysınbag'an Qudaydın' adamı sol boladı. Sonlıqtan Jaratqan İye O'z so'zi boyınsha og'an bir arıslandı jiberdi. Arıslan onı tilkimlep o'ltirdi», – dedi.

²⁷ Ol ullarına: «Eshegimdi ertlen'ler», – dedi. Olar eshekti ertledi.

²⁸ G'arrı ketip, jolda jatırg'an deneni tawıp aldı. Eshek penen arıslan ele denenin' janında turg'an eken. Arıslan deneni de jemegen, eshekke de tiymegen edi.

²⁹ G'arrı payg'ambar Qudaydın' adamının' denesin ko'terip alıp, eshekke arttı. Joqlaw aytıp jerlew ushın, onı o'z qalasına qaytarıp alıp keldi.

³⁰ Son'ınan g'arrı marhumdı o'zinin' qa'birine qoydı. Adamlar: «Wah, bawırım!» – dep og'an joqlaw ayttı.

³¹ Qudaydın' adamın jerlegennen keyin, payg'ambar g'arrı ullarına bılay dedi: «O'lgenimnen keyin, meni Qudaydın' adamının' qa'birine qoyın', su'yeklerimdi de onın' su'yeklerinin' janına qoyın'.

³² Sebebi onın' BeytEldegi qurbanlıq orın ha'm Samariya qalalarındag'ı barlıq sıyınıw orınları tuwralı Jaratqan İyenin' buyrıg'ı boyınsha aytqan so'zleri so'zsiz orınlanadı».

³³ Bul waqıyadan keyin de, Yarobam o'zinin' jaman jolınan qaytpadı. Ol xalıq arasınan qa'legen adamın sıyınıw orınlarına ruwxaniyler etip qoyıwın dawam etip, ruwxaniy bolıwdı qa'legen ha'r bir adamg'a xızmet berdi.

³⁴ Bul isler Yarobamnın' urpag'ının' gu'nag'a batıwına ha'm qırılıp, jer betinen joq bolıp ketiwine alıp keldi.