3 Patshalar 18 bob
1 Aradan ko'p waqıtlar o'tkennen son', qurg'aqshılıqtın' u'shinshi jılında Jaratqan İyeden İliyasqa: «Patsha Axabtın' aldına barıp, o'zin'di ko'rset. Men jerge jawın jawdırajaqpan», – degen so'z tu'sti.
2 liyas Axabtın' aldına barıw ushın ketti. Sol waqıtta Samariyada ku'shli asharshılıq hu'kim su'rip turg'an edi.
3 Sonlıqtan Axab saray basqarıwshısı Obadiyanı shaqırdı. Obadiya Jaratqan İyeden qattı qorqatug'ın edi.
4 4 İzabel Jaratqan İyenin' payg'ambarların qırıp taslag'an waqıtta, Obadiya ju'z payg'ambardı alıp ketip, eliw-eliwden u'n'girlerge jasırdı da, olardı nan ha'm suw menen ta'miyinlep turg'an edi.
5 Axab Obadiyag'a: «U'lke boylap, barlıq bulaqlar menen saylardı ko'rip shıq. Ba'lkim, at ha'm g'ashırlarımızdı bag'ıw ushın bir jerden ot tabılıp, olardı aman saqlap qalarmız», – dedi.
6 Olar aylanıp shıg'ıw ushın, jerdi bo'lisip alg'annan son', ekewi eki jaqqa qaray jolg'a tu'sti.
7 Obadiya ketip baratırıp, jolda o'zine qaray kiyatırg'an İliyastı ko'rdi. Ol İliyastı tanıp, et-betinen jıg'ılıp, ta'jim etip: – Mırzam İliyas, bul sizbisiz? – dedi.
8 İliyas og'an: – Awa, bul men. Mırzan'a barıp: «İliyas usı jerde», – dep ayt, – dedi.
9 Biraq Obadiya İliyasqa bılay dedi: – Qulın' bolg'an meni o'ltiriw ushın Axabtın' qolına tapsıratug'ınday, men ne gu'na isledim?
10 Sizin' Qudayın'ız, tiri Jaratqan İye haqı ant ishemen: taqsırım sizdi izlew ushın adam jibermegen birde bir xalıq yaki patshalıq qalmadı. Ol: «İliyas bul jerde joq», – degen ha'r bir xalıq ha'm patshalıqlarg'a sizdi taba almag'anı haqqında ant ishtirdi.
11 Al siz bolsan'ız, endi mag'an o'zin'izdin' usı jerde ekenligin'izdi mırzan'a ayt dep atırsız.
12 Men sizin' janın'ızdan ketiwden-aq, Jaratqan İyenin' Ruwxı sizdi men bilmeytug'ın bir jerge alıp baradı. Men barıp, Axabqa xabar bergenimde, ol kelip, sizdi tappay qalsa, meni o'ltiredi. Al qulın'ız bolg'an men balalıg'ımnan Jaratqan İyeden qorqıp jasap keldim.
13 zabel Jaratqan İyenin' payg'ambarların qırıp taslap atırg'anda, menin' ne islegenimnen, mırzam, sizin' xabarın'ız joq pa? Men Jaratqan İyenin' ju'z payg'ambarın eliw-eliwden u'n'girlerge jasırdım, olardı nan ha'm suw menen ta'miyinlep turdım.
14 Endi siz bolsan'ız mag'an: «Mırzan'a barıp: „Mine, İliyas usı jerde“, – dep ayt», – deysiz. Ol meni o'ltiredi-g'o.
15 İliyas Obadiyag'a: – Men da'rgayında turg'an A'lemnin' Jaratqan İyesinin' tiriligi haqı ant ishemen: men bu'gin so'zsiz og'an ushırasaman, – dedi.
16 Obadiya Axabqa barıp, onı waqıyadan xabardar etti. Sonda Axab İliyastı qarsı alıwg'a ketti.
17 Axab İliyastı ko'rgende: – Ha'y, İzraildı ba'lege duwshar etken adam, bul senbisen'?! – dedi.
18 İliyas og'an bılay dedi: – İzraildı ba'lege duwshar etken men emes, al Jaratqan İyenin' buyrıqlarına boysınbay, Baaldın' mu'sinlerine xızmet etip, İzraildı ba'lege duwshar etken siz ha'm sizin' u'y-ishin'iz boladı.
19 ndi barıp, xabar jiberin': pu'tkil İzrail xalqı, İzabeldin' dasturxanınan iship-jeytug'ın Baaldın' to'rt ju'z eliw payg'ambarı ha'm Asheranın' to'rt ju'z payg'ambarı Karmel tawına, menin' janıma jıynalsın.
20 Axab xabar jiberip, pu'tkil İzrail xalqın ha'm payg'ambarlardı Karmel tawına jıynadı.
21 İliyas xalıqtın' aldına shıg'ıp: «Qashang'a deyin, eki kemenin' basın uslap ju'resiz? Eger Jaratqan İyeni Quday dep bilsen'iz, Onın' izine erin'. Al eger Baaldı Quday dep bilsen'iz, onda onın' izine erin'», – dedi. Biraq xalıq İliyasqa hesh qanday juwap bermedi.
22 İliyas so'zin dawam etip bılay dedi: «Jaratqan İyenin' payg'ambarlarınan jalg'ız men qaldım. Al Baaldın' to'rt ju'z eliw payg'ambarı bar
23 Bizlerge eki bug'a alıp kelin'. Birewin Baaldın' payg'ambarları tan'lap alıp, soysın ha'm onı maydalap otınnın' u'stine qoysın. Biraq otındı jaqpasın. Al ekinshi bug'anı men soyıp tayarlap, otınnın' u'stine qoyaman. Biraq otındı jaqpayman.
24 Keyin sizler o'z qudayın'ızdın' atın aytıp shaqırın', men de Jaratqan İyenin' atın aytıp shaqıraman. Sonda kimnin' Qudayı ot arqalı juwap berse, sol – Quday boladı».Pu'tkil xalıq: «Yaqshı, solay bolsın», – dep juwap berdi.
25 liyas Baaldın' payg'ambarlarına: «Sizler ko'psiz. Sonlıqtan da'slep sizler bug'anın' birewin tan'lap alıp, tayarlan'lar ha'm qudayın'ızdın' atın aytıp shaqırın'lar. Biraq otındı jaqpan'lar», – dedi.
26 Olar o'zlerine berilgen bug'anı alıp, tayarlag'annan son', azannan tu'ske shekem: «Ha'y Baal, bizlerge juwap ber», – dep Baaldın' atın aytıp shaqırdı. Biraq hesh bir dawıs ta, juwap ta bolmadı. Sonda olar o'zleri qurg'an qurbanlıq orın a'tirapında sekire basladı
27 Tu's bolg'anda, İliyas: «Qattı baqırıp, shaqırın'! O'ytkeni ol quday-g'o. Ba'lkim, ol oyg'a shu'mip ketken, yamasa bir na'rse menen ba'nt shıg'ar, yaki saparda shıg'ar. Ba'lkim, uyıqlap atırg'an bolıp, onı oyatıw kerek shıg'ar», – dep olardın' u'stinen ku'le basladı.
28 Olar qattı baqırdı. Da'stu'rleri boyınsha, o'zlerine pıshaq ha'm nayza sug'ıp, qan ag'ızıp, denelerin jaraqatladı.
29 Olar tu's awg'annan baslap, keshki qurbanlıq beriletug'ın waqıtqa shekem jinlilenip baqıra berdi. Biraq saza da, belgi de, juwap ta bolmadı.
30 Sonda İliyas pu'tkil xalıqqa: «Menin' janıma kelin'ler», – dedi. Pu'tkil xalıq İliyastın' janına keldi. Ol Jaratqan İyenin' buzılg'an qurbanlıq ornın qayta tikledi.
31 1 İliyas Yaqıptın' ullarınan kelip shıqqan urıwlardın' sanı boyınsha on eki tas aldı. Sebebi Jaratqan İyeden Yaqıpqa: «Senin' atın' İzrail boladı», – degen so'z tu'sken edi.
32 İliyas bul taslardan Jaratqan İyenin' atına arnap qurbanlıq orın qurdı ha'm onın' do'geregine eki sea da'n sıyatug'ın or qazdı.
33 Son'ınan otınlardı qaladı ha'm bug'anı bo'leklep, otınnın' u'stine qoydı da: «To'rt gu'ze suw a'kelip, jandırılatug'ın qurbanlıq penen otınnın' u'stine quyın'lar», – dedi.
34 Keyin ol: «Ja'ne solay islen'ler», – dedi. Olar solay isledi. Keyin ja'ne: «U'shinshi ret te solay islen'ler», – dedi. Olar u'shinshi ret te solay isledi.
35 Suw qurbanlıq orınnın' do'geregine ag'ıp, or da suwg'a toldı.
36 Keshte, qurbanlıq beriletug'ın waqıtta, İliyas payg'ambar qurbanlıq orıng'a jaqınlap, bılay dep duwa etti: «İbrayımnın', Isaqtın' ha'm İzraildın' Qudayı Jaratqan İye! Bu'gin İzrailda O'zin'nin' Quday ekenin'di, menin' de Senin' qulın' ekenimdi ha'm bulardın' ha'mmesin Senin' buyrıqların' boyınsha islegenimdi bildire go'r!
37 Jaratqan İye, meni esitip, mag'an juwap ber. Bul xalıqqa O'zin'nin' Quday ekenin'di ha'm olardın' ju'reklerin qaytadan O'zin'e qaratıp atırg'anın'dı bildire go'r!»
38 Sol waqıtta Jaratqan İyenin' otı tu'sti. Tu'sken ot jandırılatug'ın qurbanlıqtı, otındı, taslardı ha'm topıraqtı jandırıp jiberip, ordag'ı suwdı da jalmap ketti.
39 Pu'tkil xalıq bunı ko'rgende, et-betinen jerge jıg'ılıp: «Jaratqan İye – Quday, Jaratqan İye – Quday!» – dep baqırıstı.
40 Sonda İliyas olarg'a: «Baaldın' payg'ambarların uslap alın'lar, hesh biri qashıp ketpesin!», – dep buyırdı. Olar uslap alındı. İliyas olardı Kishon sayına alıp barıp, sol jerde o'ltirdi.
41 Bunnan keyin, İliyas patsha Axabqa: «Barıp, iship-jen'. Sebebi ku'shli jawınnın' dawısı esitilip tur», – dedi.
42 Axab awqatlanıwg'a ketti. İliyas Karmel tawının' to'besine shıqtı ha'm basın eki dizesinin' arasına tıg'ıp, jerge qarap otırdı.
43 Keyin xızmetshisine: «Barıp, ten'iz ta'repke qara», – dedi. Xızmetshisi barıp, ten'izge qaradı da: «Hesh na'rse joq», – dedi. İliyas xızmetshisin jeti ret ten'iz ta'repke qarap keliw ushın jiberdi.
44 Jetinshi rette xızmetshisi: «Ten'izden u'lkenligi adamnın' alaqanınday bir bult ko'terilip kiyatır», – dedi. Sonda İliyas: «Axabqa barıp ayt, arbasın jegip tez qaytsın, jawında qalıp qoymasın», – dedi.
45 Sol waqıtta, aspandı qalın' bult qaplap, samal esti ha'm no'ser jawın jawa basladı. Axab arbasına mindi de, İzreelge ketti.
46 Jaratqan İyenin' qolı İliyastın' u'stinde boldı. Ol belin bekkem buwdı da, Axabtın' aldına tu'sip, İzreelge shekem juwırıp bardı+.
