1 Jılnama 22 bob
1 Sonda Dawıt: «Quday İyenin' İbadatxanası da, İzrail ushın jandırılatug'ın qurbanlıq orın da usı jerde boladı», – dedi.
2 Dawıt İzrailda jasaytug'ın kelgindilerdin' ha'mmesin jıynawdı buyırdı. Qudaydın' İbadatxanasın qurıw ushın, olardın' arasınan taslardı kesetug'ın ha'm jonatug'ın adamlardı tayınladı.
3 Dawıt da'rwaza esiklerinin' shegeleri ha'm qazıq shegeler ushın ko'p mug'darda temir tayarlap qoydı. Tayarlang'an qolanın' da ko'pligi sonshelli, onın' salmag'ın anıqlaw mu'mkin emes edi.
4 Ja'ne de, ol sansız kedr ag'ashın da jıynap qoydı. O'ytkeni sidonlılar menen tirliler Dawıtqa ko'p mug'darda kedr ag'ashın a'kelgen edi.
5 Dawıt: «Ulım Sulayman jas ha'm ta'jiriybesiz. Al Jaratqan İyege arnap qurılatug'ın İbadatxana ju'da' sawlatlı bolıp, dan'qı barlıq xalıqlarg'a jayılıwı kerek. Sonlıqtan onın' qurılısı ushın tayarlıq ko'rip qoya bereyin», – dedi. Solay etip, Dawıt o'lmesinen aldın İbadatxana qurıw ushın u'lken tayarlıqlar ko'rdi.
6 Dawıt ulı Sulaymandı qasına shaqırıp aldı ha'm og'an İzraildın' Qudayı Jaratqan İye ushın İbadatxana qurıwdı tapsırıp,
7 bılay dedi: «Ulım, men Qudayım Jaratqan İyege arnap, İbadatxana qurıwdı qa'legen edim.
8 Biraq Jaratqan İye mag'an bılay dedi: „Sen u'lken sawashlarda qatnasıp, ko'p qan to'ktin'. Menin' aldımda jerge ko'p qan to'kkenin' ushın, Menin' atıma arnap İbadatxananı sen qurmaysan'.
9 Biraq sennen tınıshlıqtı su'yetug'ın bir ul tuwıladı. Men onı do'geregindegi barlıq dushpanlarınan qutqarıp, ra'ha'tke eristiremen. Onın' atı Sulayman boladı. Onın' da'wirinde İzrailg'a tınıshlıq ha'm aman-esenlik inam etemen.
10 Menin' atıma arnap İbadatxananı ol quradı. Ol Mag'an ul boladı, Men de og'an A'ke bolaman. Onın' İzrail u'stinen quratug'ın patshalıq taxtın ma'n'gige bekkemleymen“.
11 Endi, ulım, Jaratqan İye sag'an yar bolsın! O'zi sag'an wa'de etkenindey, Quday İyen'e arnap İbadatxana qurg'anın'da, seni tabısqa eristirsin.
12 Jaratqan İye seni İzrailg'a hu'kimdar etip qoyg'anda, Qudayın' Jaratqan İyenin' Nızamına a'mel qılıwın' ushın, Ol sag'an aqıl-parasat bersin.
13 Jaratqan İyenin' Muwsa arqalı İzrailg'a bergen qag'ıyda ha'm nızamların muqıyatlı tu'rde orınlawg'a tırıssan', tabısqa erisesen'. Ku'shli ha'm ma'rt bol! Qorqpa, ruwxın' tu'spesin!
14 Men ko'p mashaqatlar menen Jaratqan İyenin' İbadatxanası ushın ju'z mın' talant altın, bir million talant gu'mis, o'lshep bolmas da'rejede ko'p qola menen temir, ja'ne de, ag'ash penen tas ta jıynap, tayarlap qoydım. Bularg'a sen de qosarsan'.
15 Sende ko'p jumısshılar: tas jonıwshılar, tas qalawshılar, ag'ash ustaları, ha'r tu'rli o'nerge iye adamlar,
16 altın, gu'mis, qola ha'm temirdi islete alatug'ın sansız o'nermentler bar. Endi iske kiris. Jaratqan İye sag'an yar bolsın!»
17 Dawıt İzraildın' barlıq basshılarına ulı Sulaymang'a ja'rdem beriwdi buyırıp,
18 bılay dedi: «Qudayın'ız Jaratqan İye sizler menen birge emes pe? Sizlerdi ha'r ta'repleme tınıshlıqqa bo'lemedi me? Ol usı jerdin' turg'ınların mag'an ta'slim qıldı. Sol sebepli bul jer Jaratqan İyege ha'm Onın' xalqına bag'ınıshlı boldı
19 Endi ju'regin'izdi ha'm janın'ızdı Qudayın'ız Jaratqan İyeni izlewge bag'ıshlan'lar. Quday İyenin' İbadatxanasın qurıwdı baslan'lar. Keyin Jaratqan İyenin' Kelisim sandıg'ın ha'm Qudayg'a bag'ıshlang'an basqa muxaddes buyımlardı Jaratqan İyenin' atına arnap qurılg'an İbadatxanag'a aparıp qoyın'lar», – dedi.
