2 Jılnama 21 bob
1 Ehoshafat o'lip, ata-babalarına qosıldı ha'm Dawıttın' qalasına, atababalarının' janına jerlendi. Onın' ornına ulı İoram patsha boldı.
2 Ehoshafat ulı İoramnın' Azariya, Exiel, Zexariya, Azariyahu, Mixail, Shefatiya atlı inileri bar edi. Bulardın' ha'mmesi İzrail patshası Ehoshafattın' ulları edi.
3 A'kesi Ehoshafat olarg'a mol gu'mis, altın ha'm qımbatbaha na'rselerge qosa, Yahudadag'ı qorg'an qalalardı da sawg'a etti. Al İoram tun'g'ısh perzent bolg'anlıqtan, patshalıqtı og'an berdi.
4 Biraq İoram a'kesinin' taxtına otırıp, onı bekkemlegennen son', barlıq inilerin ha'm bir qatar İzrail basshıların qılıshtan o'tkizdi.
5 İoram patsha bolg'an waqıtta otız eki jasta edi. Ol Erusalimde segiz jıl patshalıq etti.
6 Onın' hayalı Axabtın' qızı bolg'anlıqtan, ol da Axabtın' u'y-ishi sıyaqlı İzrail patshalarının' jolınan ju'rip, Jaratqan İyenin' na'zerinde jaman bolg'an islerdi isledi.
7 Biraq Jaratqan İye Dawıt penen du'zgen kelisimi sebepli, Dawıttın' u'y-ishin joq qılmadı. O'ytkeni Ol Dawıtqa ha'm onın' urpag'ına ma'n'gige so'nbeytug'ın shıraq beriwdi wa'de etken edi.
8 İoramnın' patshalıg'ı da'wirinde edomlılar Yahuda hu'kimdarlıg'ına qarsı bas ko'terip, o'zlerine patsha qoyıp aldı.
9 İoram a'skerbasıları ha'm barlıq sawash arbaları menen birge sol jerge ketti. Ol jerde edomlılar onı ha'm onın' sawash arbalarının' sa'rdarların qorshap aldı. Biraq İoram tu'nde turıp, qamaldı jarıp shıqtı.
10 Sonnan baslap usı ku'nge deyin edomlılar Yahudanın' hu'kimdarlıg'ına boysınbay keledi. Sol waqıtta Libna qalası da İoramnın' hu'kimdarlıg'ına qarsı bas ko'terdi. Sebebi İoram ata-babalarının' Qudayı Jaratqan İyeni ta'rk etken edi.
11 Sonday-aq, İoram Yahudadag'ı to'beshikli jerlerge sıyınıw orınların qurıp, Erusalim turg'ınların Qudayg'a opasızlıq qılıwg'a jeteledi ha'm Yahuda xalqın joldan azg'ırdı.
12 Bir ku'ni İoramg'a payg'ambar İliyastan xat keldi. Onda bılay dep jazılg'an edi: «Baban' Dawıttın' Qudayı Jaratqan İye bılay deydi: „Sen a'ken' Ehoshafattın' ha'm Yahuda patshası Asanın' jolınan ju'rmedin'.
13 Kerisinshe, İzrail patshalarının' jolınan ju'rdin' ha'm Axabtın' u'y-ishinin' islegeni kibi, Yahuda ha'm Erusalim turg'ınların opasızlıqqa basladın'. Bunın' u'stine, bir a'keden tuwılg'an, sennen jaqsıraq bolg'an o'z inilerin'di o'ltirdin'.
14 Sonlıqtan Jaratqan İye, yag'nıy Men senin' xalqın'a, hayalların'a, balaların'a ha'm pu'tkil mal-mu'lkin'e ullı apat jiberemen.
15 O'zin'di bolsa awır ishek keselligine jolıqtıraman. İsheklerin' sırtqa to'gilgenshe, awırıw ku'nnen-ku'nge ku'sheye beredi“».
16 Bunnan keyin Jaratqan İye filistlerdi ha'm kushlılardın' janında jasap atırg'an arablardı İoramg'a qarsı qozg'adı.
17 Olar Yahudag'a shabıwıl jasap, ishkerige bastırıp kirdi ha'm patshanın' sarayınan tapqan ha'mme baylıqlardı, sonday-aq patshanın' balaları menen hayalların alıp ketti. Tek İoramnın' Ehoaxaz atlı genje ulı g'ana o'zinde qaldı.
18 Bul waqıyalardan keyin, Jaratqan İye İoramdı dawası joq ishek keselligine duwshar etti.
19 Waqıt o'te berdi, aradan eki jıl o'tkende, kesellik sebepli onın' ishekleri sırtqa atılıp shıqtı. Ol qattı qıynalıp jan tapsırdı. İoramnın' ata-babaları o'lgende, xalıq olardın' hu'rmetine ot jag'ıw ra'simin o'tkergen edi, al İoramnın' hu'rmetine ot jag'ılmadı.
20 İoram taxtqa otırg'anda otız eki jasta bolıp, Erusalimde segiz jıl patshalıq etti. Ol ushın hesh kim joqlaw aytıp jılamadı. Ol Dawıttın' qalasına jerlengen bolsa da, patshalar qa'birine qoyılmadı.
