2 Jılnama 24 bob
1 İoash jeti jasında patsha bolıp, Erusalimde qırıq jıl patshalıq etti. Onın' anası beer-shebalı bolıp, atı Sibiya edi.
2 İoash ruwxaniy Ehoyadanın' ko'zinin' tirisinde Jaratqan İyenin' na'zerinde tuwrı bolg'an islerdi isledi.
3 Ehoyada İoashqa eki hayal alıp berdi. İoash olardan ul-qızlar ko'rdi.
4 Aradan biraz waqıt o'tkennen keyin, İoash Jaratqan İyenin' İbadatxanasın on'lawg'a qarar qıldı.
5 Ol ruwxaniyler menen lebiylilerdi jıynap, olarg'a: «Yahuda qalalarına barıp, pu'tkil İzrail xalqınan Qudayın'ızdın' İbadatxanasın on'law ushın kelip tu'setug'ın jıllıq salıqtı jıynap kelin'. Bul isti tez orınlan'», – dedi. Biraq lebiyliler asıqpadı.
6 Sonda patsha bas ruwxaniy Ehoyadanı shaqırtıp og'an: «Ne ushın siz lebiylilerdi Yahudadan ha'm Erusalimnen salıq jıynap keliwge jibermedin'? Jaratqan İyenin' qulı Muwsa ha'm İzrail ja'miyeti bul salıqtı Kelisim shatırının' qa'rejetleri ushın belgilep qoyg'an-g'o», – dedi.
7 Sebebi zalım hayal Ataliyanın' ulları Qudaydın' İbadatxanasına bastırıp kirip, ha'tte, ol jerdegi muxaddes na'rselerdi de Baallar ushın qollang'an edi.
8 Patshanın' buyrıg'ı boyınsha bir qutı islenip, qutı Jaratqan İyenin' İbadatxanasının' da'rwazasının' sırtına qoyıldı.
9 Qudaydın' qulı Muwsanın' sho'lde İzrail xalqı ushın belgilegen salıg'ın Jaratqan İyege alıp keliw Yahuda ha'm Erusalim boylap ja'riyalandı.
10 Barlıq ha'meldarlar ha'm pu'tkil xalıq salıqtı quwanıshlı tu'rde alıp kelip, tolg'ansha qutıg'a tasladı.
11 Lebiyliler qutını patshanın' xızmetshilerine alıp keletug'ın edi. Olar qutının' tolg'anın ko'rgende, patshanın' xatkerine ha'm bas ruwxaniydin' ja'rdemshisine xabar beretug'ın edi. Olar da kelip, qutını bosatıp, keyin qaytadan ornına aparıp qoyatug'ın edi. Olar ba'rqulla solay isledi ha'm ko'p pul jıynadı.
12 Patsha ha'm Ehoyada bul pullardı Jaratqan İyenin' İbadatxanasının' islerin ju'rgiziw ushın qoyılg'an adamlarg'a berdi. Olar bul pullarg'a Jaratqan İyenin' İbadatxanasın qayta tiklew ushın tas o'riwshilerdi ha'm ag'ash ustaların, sonday-aq İbadatxananı on'law ushın temir ha'm qolag'a islew beretug'ın jumısshılardı jalladı.
13 Jumısshılar ıqlas penen isledi ha'm isler olardın' qolında alg'a ilgeriledi. Qudaydın' İbadatxanası da'slepki awhalına qaytıp, bekkemlendi.
14 Olar islerin tamamlap, qalg'an pullardı patshag'a ha'm Ehoyadag'a alıp keldi. Bul pullarg'a Jaratqan İyenin' İbadatxanası ushın xızmette ha'm jandırılatug'ın qurbanlıqlar bergende qollanılatug'ın buyımlar, tostag'anlar, basqa altın ha'm gu'mis buyımlar islendi. Ehoyadanın' ko'zinin' tirisinde Jaratqan İyenin' İbadatxanasında ha'r ku'ni jandırılatug'ın qurbanlıqlar berilip bardı.
15 Ehoyada mazmunlı o'mir su'rip, qartayıp, bir ju'z otız jasında du'nyadan o'tti.
16 İzrailda Quday ha'm Onın' İbadatxanası ushın islegen xızmetleri esapqa alınıp, onın' denesi Dawıttın' qalasına patshalardın' qasına qoyıldı.
17 Ehoyadanın' o'liminen son', Yahuda basshıları patshag'a kelip, og'an ta'jim etti. Patsha da olarg'a qulaq saldı.
18 Olar ata-babalarının' Qudayı Jaratqan İyenin' İbadatxanasın ta'rk etip, kiyeli ag'ashlarına ha'm basqa butlarg'a tabına basladı. Olardın' gu'nası sebepli, Yahuda ha'm Erusalimge Jaratqan İyenin' g'a'zebi keldi.
19 Jaratqan İye xalıqtı O'zine qaytarıw ushın payg'ambarlar jibergen bolsa da, payg'ambarlar olarg'a eskertken bolsa da, ba'ri bir xalıq payg'ambarlarg'a qulaq aspadı.
20 Sonda Qudaydın' Ruwxı ruwxaniy Ehoyada ulı Zexariyanı biylep aldı. Zexariya xalıqtın' aldına shıg'ıp, bılay dedi: «Quday bılay deydi: „Nege buyrıqlarıma qarsı shıg'ıp atırsızlar? Sizler tabısqa erise almaysızlar. Sebebi sizler Meni ta'rk ettin'ler, Men de sizlerdi ta'rk ettim“».
21 Biraq Zexariyag'a qarsı til biriktirilip, patshanın' buyrıg'ı menen Jaratqan İyenin' İbadatxanasının' ha'wlisinde ol tas boran qılıp o'ltirildi.
22 Patsha İoash Zexariyanın' a'kesi Ehoyada ko'rsetken jaqsılıqlardı umıtıp, onın' ulın o'ltirdi. Zexariya jan berip atırıp: «Jaratqan İye bul islerin'izdi ko'rip, esesin qaytarsın!» – dedi.
23 Sol jıldın' aqırında, Aram ordası İoashqa hu'jim jasadı. Olar Yahuda ha'm Erusalimge kirip, xalıqtın' barlıq basshıların o'ltirdi, al alg'an oljalarının' ha'mmesin Damaskke, o'z patshasına jiberdi.
24 Aram ordası ko'p sanlı bolmasa da, Jaratqan İye o'zlerinen ju'da' u'lken bolg'an ordanı olarg'a ta'slim etti. O'ytkeni Yahuda xalqı o'zlerinin' ata-babalarının' Qudayı Jaratqan İyeni ta'rk etken edi. Solay etip, İoash o'z jazasın aldı.
25 Aram a'skerleri İoashtı awır jaralang'an halda taslap ketti. Sonda İoashtın' xızmetkerleri ruwxaniy Ehoyadanın' ulının' qanı ushın o'sh almaqshı bolıp til biriktirdi ha'm İoashtı o'z to'seginde o'ltirdi. Onı Dawıttın' qalasına jerledi, biraq patshalardın' qa'birine qoymadı.
26 Aram a'skerleri İoashtı awır jaralang'an halda taslap ketti. Sonda İoashtın' xızmetkerleri ruwxaniy Ehoyadanın' ulının' qanı ushın o'sh almaqshı bolıp til biriktirdi ha'm İoashtı o'z to'seginde o'ltirdi. Onı Dawıttın' qalasına jerledi, biraq patshalardın' qa'birine qoymadı.
27 İoashtın' ulları haqqında mag'lıwmat, İoashqa qarsı aytılg'an ko'p sanlı payg'ambarshılıqlar ha'm İbadatxananın' on'lanıwı haqqındag'ı mag'lıwmatlar Patshalar kitabında jazılg'an. İoashtın' ornına onın' ulı Amasiya patsha boldı.
