2 Jılnama 31 bob
1 Bayram tolıq tamam bolg'annan keyin, og'an qatnasqan izraillılardın' barlıg'ı Yahuda qalalarına barıp, kiyeli taslardı maydalap, kiyeli ag'ashların kesip tasladı. Olar pu'tkil Yahuda, Benyamin, Efrayım ha'm Menashshe jerlerindegi sıyınıw orınların ha'm qurbanlıq orınların birde birewin qaldırmay buzıp tasladı. Son'ınan izraillılar o'z qalalarına, o'z iyeliklerine qayttı.
2 Xizkiya ruwxaniyler menen lebiylilerdi atqaratug'ın wazıypalarına qarap, toparlarg'a bo'ldi. Olardın' ayırımlarına jandırılatug'ın qurbanlıqlardı ha'm tatıwlıq qurbanlıqların usınıw, ayırımlarına Jaratqan İyenin' ma'kanının' da'rwazalarında xızmet etiw, ayırımlarına ta'riyiplew ha'm alg'ıs-maqtaw qosıqların aytıw tapsırıldı.
3 3Patsha Jaratqan İyenin' nızamına muwapıq, ha'r ku'ni azanda ha'm keshte, Shabbat ku'nleri, Jan'a ay bayramında ha'm Jaratqan İyenin' Nızamında belgilengen bayramlarda usınılatug'ın jandırılatug'ın qurbanlıqlar ushın o'z mal-mu'lkinen mallar ajırattı.
4 Ruwxaniyler menen lebiylilerdin' o'zlerin Jaratqan İyenin' Nızamın orınlawg'a bag'ıshlawı ushın, patsha Erusalimde jasaytug'ın xalıqqa ruwxaniyler menen lebiylilerge tiyisli bolg'an payların berip turıwdı buyırdı.
5 Bul pa'rman ja'riyalanıwdan-aq, izraillılar biydaydın', jan'a sharaptın', za'ytu'n mayının', paldın', jerden o'ngen barlıq o'nimlerdin' birinshi zu'ra'a'tinen saqıylıq penen alıp kele basladı. Sonday-aq qollarında bar bolg'annan mol etip u'sir berdi.
6 Yahuda qalalarında jasap atırg'an izraillılar menen yahudalılar da o'z su'riw ha'm padalarınan u'sir berdi, ja'ne Qudayı Jaratqan İyege arnalg'an muxaddes zatlarınan da u'sir berip, olardı bir jerge jıynap u'yin-u'yin qıldı.
7 Olar bul isti u'shinshi ayda baslap, jetinshi ayda tamamladı.
8 Patsha Xizkiya ha'm onın' ha'meldarları kelip, u'yinlerdi ko'rgende, Jaratqan İyege alg'ıs aytıp, Onın' xalqı İzrailg'a pa'tiyasın berdi.
9 9Xizkiya ruwxaniyler menen lebiylilerden bul u'yinler haqqında sorag'anda,
10 Sadoq tiyresinen bolg'an bas ruwxaniy Azariya juwap berip: «Xalıq Jaratqan İyenin' İbadatxanasına sadaqaların alıp kele baslag'annan beri, tamag'ımız toq, artıp ta qalmaqta. Jaratqan İye O'z xalqın jarılqag'anlıqtan, awısıg'ının' o'zi ag'ıl-tegil», – dedi.
11 Sonda Xizkiya Jaratqan İyenin' İbadatxanasına zat saqlanatug'ın bo'lmeler qurıwdı buyırdı ha'm olar qurıldı.
12 ul bo'lmelerge barlıq sadaqalar, u'sirler, bag'ıshlang'an zatlar sadıqlıq penen aparıp qoyıldı. Bul islerdin' basında lebiyli Kenaniya turdı, al inisi Shimey onın' orınbasarı boldı.
13 Patsha Xizkiya ha'm Qudaydın' İbadatxanasının' basqarıwshısı Azariyanın' tapsırması boyınsha, Exiel, Azaziya, Naxat, Asahel, Erimot, İozabad, Eliel, İsmaxiya, Maxat ha'm Benaya Kenaniya menen onın' inisi Shimeydin' qol astında baqlawshılar xızmetin atqara basladı.
14 İbadatxananın' Shıg'ıs da'rwazasının' qarawılı lebiyli İmna ulı Qore Qudayg'a ıqtıyarlı tu'rde berilgen qurbanlıqlarg'a juwapker bolıp, ol Jaratqan İyege atalg'an sıylardı ha'm bag'ıshlap, arnawlı tu'rde berilgen sıylardı bo'lip beriw wazıypasın alıp bardı.
15 Eden, Minyamin, Eshua, Shemaya, Amariya ha'm Shekaniya ruwxaniyler jasap atırg'an qalalarda ruwxaniylerge tiyisli u'leslerin toparları boyınsha, u'lken-kishisine birdey etip bo'lip beriwde Qorege ja'rdemlesti.
16 Bunnan tısqarı, Jaratqan İyenin' İbadatxanasına kirip, o'zinin' wazıypası ha'm toparına say ondag'ı ku'ndelikli jumıslardı atqaratug'ın u'sh jas ha'm onnan joqarı bolg'an, shejirege kirgizilgen erkeklerge,
17 sonday-aq, a'wladları boyınsha shejirege kirgizilgen ruwxaniylerge, jigirma ha'm onnan joqarı jastag'ı lebiylilerge wazıypaları menen toparlarına say u'les bo'lip berdi.
18 Ja'ne de, ruwxaniyler menen lebiylilerdin' shejirege kirgizilgen na'restelerine, hayallarına ha'm ul-qızlarına da u'les tiydi. Sebebi olar o'zlerin sadıqlıq penen Qudayg'a bag'ıshlag'an edi.
19 Qalalarının' a'tirapındag'ı awıllarda jasap atırg'an Xaron urpaqlarınan bolg'an ruwxaniylerge kelsek, olardan bolg'an barlıq erkeklerge ha'm lebiylilerdin' shejiresine kirgen ha'r bir adamg'a tiyisli u'lesin beriw ushın atları atalıp, ayırım adamlar tayınlandı.
20 Xizkiya pu'tkil Yahuda boylap usılay is alıp bardı. Ol Qudayı Jaratqan İyenin' na'zerinde iygilikli, tuwrı ha'm hadal islerdi isledi.
21 Ol Qudaydın' İbadatxanasındag'ı xızmette ha'm Nızam menen buyrıqlarg'a a'mel qılıw islerinde neler islegen bolsa da, Qudayına boysınıp, shın ju'rekten ha'reket etti. Na'tiyjede ol tabısqa eristi.
