2 Jılnama 4 bob
1 Sulayman qoladan qurbanlıq orın da isletti. Onın' uzınlıg'ı jigirma shıg'anaq, eni jigirma shıg'anaq, biyikligi on shıg'anaq edi.
2 Keyin qolanı eritip, u'lken hawız quydırdı. Onın' bir erneginen ekinshi ernegine shekemgi aralıg'ı on shıg'anaq, biyikligi bes shıg'anaq, aylana uzınlıg'ı otız shıg'anaq edi.
3 Hawız quyılg'an waqıtta, onın' erneginin' astına eki qatar etip bug'alardın' ko'rinisleri qosıp quyılg'an bolıp, olar ha'r bir shıg'anaqqa on-onnan tuwrı keletug'ın edi.
4 Hawız on eki bug'anın' u'stine ornatılg'an bolıp, olardın' u'shewi arqag'a, u'shewi batısqa, u'shewi qublag'a, u'shewi shıg'ısqa qarap turg'an edi. Bug'alardın' artqı jag'ı hawızdın' astında, ishte edi.
5 Hawızdın' qalın'lıg'ı to'rt eli bolıp, ernegi kesenin' ernegine, ashılıp turg'an lala gu'lge uqsaytug'ın edi. Og'an u'sh mın' bat suw sıyatug'ın edi.
6 Sulayman on la'gen isletip, onın' besewin qubla ta'repke, besewin arqa ta'repke qoydı. Bularda jandırılatug'ın qurbanlıqlar juwılatug'ın edi. Al hawızda ruwxaniyler juwınatug'ın edi.
7 Sulayman berilgen ko'rsetpeler boyınsha on altın ha'ste isletip, olardın' besewin İbadatxananın' ishine on' ta'repke, besewin shep ta'repke qoydı.
8 Keyin ol on stol soqtırıp, onın' besewin İbadatxananın' ishine on' ta'repke, besewin shep ta'repke qoydı. Ja'ne altınnan ju'z dana qan sebetug'ın tabaq ta isletti.
9 Keyin ol on stol soqtırıp, onın' besewin İbadatxananın' ishine on' ta'repke, besewin shep ta'repke qoydı. Ja'ne altınnan ju'z dana qan sebetug'ın tabaq ta isletti.
10 Hawızdı İbadatxananın' qubla-shıg'ıs ta'repine qoydırdı.
11 Bunnan keyin Xuram ku'l salınatug'ın ıdıslar, ku'l alatug'ın belsheler ha'm qan sebetug'ın tabaqlar soqtı. Solay etip, Xuram patsha Sulaymannın' tapsırması boyınsha Qudaydın' İbadatxanası ushın islep atırg'an mına islerin tamamladı:
12 eki o're, o'relerdin' to'besine qoyılatug'ın eki to'belik, o'relerdin' to'beligin orap turg'an eki torlı a'sheko'y,
13 o'renin' to'beligin jawıp turıw ushın arnalg'an ha'r bir tordag'ı eki qatar anar, yag'nıy eki tordag'ı to'rt ju'z anar,
14 tu'beldirikler ha'm tu'beldirik u'stine la'genler,
15 hawız ha'm hawızdın' astındag'ı on eki bug'a,
16 ku'l salınatug'ın ıdıslar, ku'l alatug'ın belsheler, shanıshqılar. Xuram-Abiydin' Jaratqan İyenin' İbadatxanası ushın patsha Sulaymang'a islep bergen ha'mme buyımları jıltıratılg'an qoladan islendi.
17 Patsha bulardı İordan tegisliginde, Sukkot penen Sereda arasındag'ı saz ılaylı jerlerde quydırdı.
18 Sulayman isletken buyımlar sonshelli ko'p bolg'anlıqtan, olar ushın ketken qolanın' o'lshemi anıqlanbadı.
19 Sulayman Qudaydın' İbadatxanası ushın to'mendegi zatlardı isletti: altınnan islengen tu'tetki tu'tetiletug'ın orın, u'stinde usınılg'an nanlar turatug'ın stollar,
20 qag'ıydag'a muwapıq, En' muxaddes bo'lmege kirer awızda janıp turıwı ushın, sap altınnan ha'steler ha'm olardın' shıraları,
21 sapalı altınnan islengen gu'ller, shıralar ha'm pilik tazalaytug'ın qısqıshlar,
22 sap altınnan pilik keskishler, qan sebetug'ın tabaqlar, lawabı keseler, shoq salınatug'ın ıdıslar. İbadatxananın' En' muxaddes bo'lmesinin' ha'm u'lken bo'lmenin' qapıları da altınnan islendi.
