2 Jılnama 5 bob
1 Sulayman Jaratqan İyenin' İbadatxanasına tiyisli bolg'an barlıq islerdi tamamlag'annan keyin, a'kesi Dawıt atag'an ha'mme na'rseni: gu'mis, altın ha'm basqa zatlardı a'kelip, Qudaydın' İbadatxanasının' qaznalarına qoydı.
2 Patsha Sulayman Jaratqan İyenin' Kelisim sandıg'ın Dawıttın' qalası bolg'an Sionnan alıp keliw ushın İzraildın' aqsaqalların, İzrail xalqının' barlıq urıw ha'm a'wlad basshıların Erusalimge shaqırdı.
3 Ha'mme izraillılar jetinshi aydag'ı bayram waqtında patshanın' aldına jıynaldı.
4 Ha'mme izraillılar jetinshi aydag'ı bayram waqtında patshanın' aldına jıynaldı.
5 Ruwxaniyler menen lebiyliler Kelisim sandıg'ın, Ushırasıw shatırın ha'm shatırdag'ı ha'mme muxaddes buyımlardı İbadatxanag'a tasıdı.
6 Patsha Sulayman ha'm onın' janındag'ı pu'tkil İzrail ja'miyeti sandıqtın' aldında, san-sanaqsız qoy ha'm bug'alardı qurbanlıqqa shaldı.
7 Ruwxaniyler Jaratqan İyenin' Kelisim sandıg'ın İbadatxananın' en' to'rine, En' muxaddes bo'lmege kirgizip, kerublardın' qanatlarının' astındag'ı o'z ornına qoydı.
8 Kerublardın' qanatları sandıqtın' u'sti boylap sozılıp, sandıqtı da, onın' sırıqların da jawıp turdı.
9 Sırıqlar ju'da' uzın bolg'anlıqtan, olardın' ushları En' muxaddes bo'lmenin' aldındag'ı Muxaddes bo'lmeden ko'rinip turatug'ın edi. Biraq olar sırttan ko'rinbeytug'ın edi. Olar ha'zir de sol jerde tur.
10 Sandıqtın' ishinde Muwsanın' Xoreb tawında qoyg'an eki tas taxtasınan basqa hesh na'rse joq edi. Mısırdan shıqqanda Jaratqan İye bul tawda izraillılar menen kelisim du'zgen edi.
11 Ruwxaniyler Muxaddes bo'lmeden shıqtı. Ol jerdegi barlıq ruwxaniyler qaysı toparg'a tiyisli bolıwına qaramastan, tazalanıw ra'siminen o'tken edi.
12 Barlıq lebiyli sazendeler: Asaf, Heman, Edutun, olardın' ulları ha'm ag'ayinleri juqa hasıl zıg'ırdan kiyim kiyip alg'an edi. Olar kimbal, arfa ha'm lira shertip qurbanlıq orınnın' shıg'ıs jag'ında turg'an edi. Olardın' janında ka'rnay shalatug'ın bir ju'z jigirma ruwxaniy turdı.
13 Ka'rnayshılar menen qosıqshılar birigip, ba'lent dawıs penen Jaratqan İyege alg'ıs-maqtawlar aytıp, Onı ta'riyipledi. Ka'rnay, kimbal ha'm basqa saz a'sbaplarına qosılıp qosıqshılar: «Jaratqan İye iygilikli, Onın' sadıqlıg'ı ma'n'gilik!» – dep Jaratqan İyege alg'ıs-maqtawlar ayttı. Sonda bir bult Jaratqan İyenin' İbadatxanasın toltırdı.
14 Bul bult sebepli ruwxaniyler xızmetin dawam ettire almadı. Sebebi Jaratqan İyenin' saltanatı Qudaydın' İbadatxanasın toltırıp turg'an edi.
