2 Jılnama 8 bob
1 Sulayman Jaratqan İyenin' İbadatxanası menen o'zinin' sarayın jigirma jılda pitkerdi.
2 Sonın' menen birge Sulayman o'zine Tir patshası Xiram bergen qalalardı da qayta qurıp, olarg'a izraillılardı ornalastırdı.
3 Sulayman Xamat-Soba patshalıg'ına ju'ris qılıp, onı da qolg'a kirgizdi.
4 Ol sho'ldegi Tadmor qalasın ha'm Xamat elindegi barlıq telekleri bar qalalardı qurıp pitkerdi.
5 Joqarg'ı ha'm to'mengi Beyt-Xoron qalaların qayta salıp, diywal menen qorshap, ta'mbilenetug'ın da'rwaza qurdı.
6 Sonday-aq, Baalat qalasın, o'zine tiyisli barlıq telekleri bar qalalardı, barlıq sawash arbaları ha'm atları saqlanatug'ın qalalardı qayta qurıp, bekkemledi. Solay etip, Sulayman Erusalimde, Lebanon tawlarında ha'm qol astındag'ı ha'mme qalalarda qa'legen na'rselerin qurdı.
7 U'lkede İzrail xalqınan bolmag'an xalıqlar: xett, amor, periz, xiw ha'm ebus xalıqları qalıp ketken edi.
8 İzrail xalqı olardı tolıq joq qıla almag'an edi. Sulayman bul xalıqlardın' urpaqların ma'rdikarg'a aldı. Bul ha'zir de dawam etpekte.
9 Biraq Sulayman İzrail xalqının' birewin de qara jumısqa salmadı. Olardı o'zine a'sker, a'skerbasılar, arbalı a'skerlerdin' basshıları etip qoydı.
10 Sulayman patshanın' xalıqtı basqarıp turg'an eki ju'z eliw qadag'alawshısı da izraillılardan edi.
11 Sulayman: «Hayalım İzrail patshası Dawıttın' sarayında turmawı kerek. Sebebi Jaratqan İyenin' Kelisim sandıg'ı turg'an jer – muxaddes», – dep, faraonnın' qızın Dawıttın' qalasınan ol ushın saldırg'an sarayg'a ko'shirdi.
12 Sulayman İbadatxananın' aywanının' aldına qurılg'an qurbanlıq orında Jaratqan İyege arnap jandırılatug'ın qurbanlıqlar usınatug'ın edi.
13 Ol bul qurbanlıqlardı Muwsanın' ha'r ku'n ushın belgilep bergen qag'ıydasına muwapıq, Shabbat ku'nleri, Jan'a ay bayramlarında, jıldın' u'sh bayramında: Ashıtqısız nan bayramı, Ha'pteler bayramı ha'm Qos bayramı ku'nleri usınatug'ın edi.
14 Sulayman a'kesi Dawıttın' buyrıg'ı boyınsha, ruwxaniylerdi toparları boyınsha xızmetlerge qoydı. Lebiylilerdi bolsa alg'ısmaqtaw aytıw ha'm ku'ndelikli islerde ruwxaniylerge ja'rdemlesiw xızmetine qoydı. Da'rwaza qarawılların da toparları boyınsha da'rwazalarg'a bo'lip qoydı. Sebebi Qudaydın' adamı Dawıt usılay buyırg'an edi.
15 Patshanın' ruwxaniylerge, lebiylilerge, sonday-aq qaznag'a baylanıslı bergen buyrıqları buljıtpay orınlandı.
16 Sulayman islewdi qa'legen isler, Jaratqan İyenin' İbadatxanasının' negizin qoyg'an ku'nnen ol tamamlang'ang'a shekemgi isler tolıq orınlandı. Solay etip, Jaratqan İyenin' İbadatxanası qurıp bolındı.
17 Patsha Sulayman Edom jerinde, ten'iz jag'asında jaylasqan Esion-Geber ha'm Elat qalalarına bardı.
18 Patsha Xiram Sulaymang'a ten'izdi jaqsı biletug'ın adamları menen birge kemelerin jiberdi. Olar Sulaymannın' kemeshileri menen birge Ofirge barıp, ol jerden patsha Sulaymang'a to'rt ju'z eliw talant altın a'kelip berdi.
