2 Jılnama 9 bob
1 Sheba hayal patshası Sulaymannın' arttırg'an dan'qı tuwralı esitip, onı jumbaqlar menen sınaw ushın, xosh iyisli zatlar, ko'p mug'darda altın ha'm qımbatbaha taslar ju'klengen u'lken bir ka'rwandı baslap Erusalimge keldi. Ol kewlinde bar bolg'an ha'mme na'rsesin Sulayman menen bo'listi.
2 Sulayman hayal patshanın' ha'mme sorawlarına juwap berdi. Sorawlarda patsha tu'sindire almastay hesh na'rse joq edi.
3 Sheba hayal patshası Sulaymannın' danalıg'ın, ol qurdırg'an saraydı ko'rdi.
4 Ol ja'ne patshanın' dasturxanındag'ı tag'amların, wa'zirlerinin' otırıs-turısın, xızmetshilerinin' xızmetin ha'm olardın' kiyimlerin, sharap quyıwshıların ha'm olardın' kiyimlerin, onın' Jaratqan İyenin' İbadatxanasında bergen jandırılatug'ın qurbanlıqların ko'rgende, artıq o'zin uslap tura almadı.
5 Ol patshag'a bılay dedi: «Sizin' islerin'iz ha'm danalıg'ın'ız haqqında o'z elimde esitkenlerim ıras eken.
6 Biraq men kelip, o'z ko'zlerim menen ko'rmegenshe, sol so'zlerge inanbag'an edim. Mag'an sizin' danalıg'ın'ızdın' yarımın da aytpag'an eken. Siz esitkenimnen de artıq ekensiz.
7 Sizin' adamların'ız ha'm xızmetshilerin'iz qanshelli baxıtlı! Olar ba'rqulla aldın'ızda turıp, danalıg'ın'ızdı tın'lay aladı.
8 Sizge kewli tolıp, sizdi Qudayın'ız Jaratqan İyege xızmet etiw ushın patsha etip O'z taxtına otırg'ızg'an Qudayın'ız Jaratqan İyege alg'ıslar bolsın! Qudayın'ız İzraildı ma'n'gige bekkemlew ushın, onı su'ygenligi sebepli, a'dalattı ha'm tuwrılıqtı ju'zege asırıwın'ız ushın sizdi patsha etip qoydı».
9 Sheba hayal patshası Sulayman patshag'a bir ju'z jigirma talant altın, ju'da' ko'p mug'darda xosh iyisli zatlar ha'm qımbatbaha taslar sawg'a etti. Sheba hayal patshasının' patsha Sulaymang'a sawg'a etkenindey da'rejede sapalı xosh iyisli zatlar hesh qashan alıp kelingen emes.
10 Xiram menen Sulaymannın' Ofirden altın alıp kelgen adamları da sol jerden sapalı arsha ag'ashların ha'm qımbatbaha taslar alıp keldi.
11 Patsha sapalı arsha ag'ashlarınan Jaratqan İyenin' İbadatxanası ha'm o'zinin' sarayı ushın teksheler, qosıqshılar ushın lira ha'm arfa saz a'sbapların isletti. Bu'ginge deyin Yahuda elinde bunday sapalı arsha ag'ashın hesh kim hesh qashan ko'rmegen edi.
12 Sulayman Sheba hayal patshasına o'zinin' a'kelgeninen de ko'birek sawg'alar berdi. Bunnan tısqarı, ol hayal patshag'a sorag'an ha'm qa'legen na'rselerinin' ha'mmesin berdi. Keyin, hayal patsha adamları menen birge o'z eline qaytıp ketti.
13 Ha'r jılı Sulaymang'a kelip turatug'ın altınnın' mug'darı altı ju'z alpıs altı talant edi.
14 Bunnan tısqarı, usaqlap satıwshılar, sawdagerler ha'm Arabstannın' barlıq patshaları menen İzrail u'lkelerinin' ha'kimleri Sulaymang'a altın ha'm gu'mis alıp keletug'ın edi.
15 Patsha Sulayman eki ju'z u'lken qalqan isletip, olardı altın menen qaplattı. Ha'r bir qalqang'a altı ju'z shekel altın jumsaldı.
16 Ja'ne altınnan ha'r biri u'sh ju'z shekel keletug'ın u'sh ju'z kishkene qalqan isletti. Patsha bul qalqanlardı Lebanon tog'ayı dep atalatug'ın sarayg'a qoydı.
17 Ol ja'ne pildin' su'yeginen u'lken taxt isletip, onı sap altın menen qaplattı.
18 Taxttın' altı tekshedegi ha'm taxtqa bekitilgen altın taban tiregishi bar edi. Taxttın' otırg'ıshının' eki ta'repinde shıg'anaq qoyg'ıshı ha'm onın' janında eki arıslannın' mu'sini bar edi.
19 Taxttın' altı basqaldag'ının' ha'r birinin' eki ta'repinde bir-birden on eki arıslannın' mu'sini tur edi. Hesh bir patshalıqta bunday na'rse joq edi.
20 Patsha Sulaymannın' ishimlik ishetug'ın ıdısları altınnan islendi. Onın' Lebanon tog'ayı dep atalatug'ın sarayındag'ı ha'mme ıdıslar da altınnan islengen edi. Sebebi Sulaymannın' waqtında gu'mis qa'dirsiz bolıp qalg'an edi.
21 Ten'izde Xiramnın' adamlarının' basshılıg'ında Sulaymannın' Tarshish sawda kemeleri bar edi. Bul kemeler u'sh jılda bir ma'rte qaytıp keletug'ın ha'm sonda altın, gu'mis, pil su'yegi, maymıllar ha'm tawıs qusların alıp keletug'ın edi.
22 Patsha Sulayman baylıqta ha'm danalıqta du'nyanın' barlıq patshalarınan u'stin boldı.
23 Qudaydın' Sulaymang'a bergen danalıg'ın tın'law ushın, jer betindegi barlıq patshalar onı ko'riwge qushtar edi.
24 Onı ko'riwge kelgenlerdin' ha'r biri ha'r jılı sawg'a ushın gu'mis ha'm altın ıdıslar, kiyimler, qural-jaraqlar, xosh iyisli zatlar, at ha'm g'ashırlar alıp kelip turdı.
25 Sulaymannın' atları menen sawash arbalarına arnalg'an to'rt mın' qorası ha'm on eki mın' atı bar edi. Olardın' bir bo'legin sawash arbaları ushın ajıratılg'an qalalarg'a, bir bo'legin o'zinin' janına, Erusalimge jaylastırdı.
26 Sulayman Evfrat da'ryasınan filistlerdin' jerine ha'm Mısır shegarasına deyingi barlıq patshalıqlar u'stinen hu'kimdarlıq etti.
27 Patsha Erusalimde gu'misti a'piwayı taslarg'a ten' qıldı. Al kedr ag'ashı ju'da' ko'p bolg'anlıqtan, batıstag'ı taw eteklerinde o'setug'ın jabayı a'njir ag'ashına ten' bolıp qaldı.
28 Sulaymannın' atları Mısırdan ha'm basqa barlıq u'lkelerden alıp kelinetug'ın edi.
29 Sulaymannın' basqa isleri basınan aqırına deyin, Natan payg'ambardın' tariyx kitabında, shilolı Axiya payg'ambardın' payg'ambarshılıqlarında ha'm wa'liy İddonın' Nabat ulı Yarobam tuwralı ko'rgen ayanı bayan etilgen jazıwlarda jazılg'an.
30 Sulayman Erusalimde pu'tkil İzrail u'stinen qırıq jıl patshalıq etti.
31 Keyin Sulayman o'lip, atababalarına qosıldı ha'm a'kesi Dawıttın' qalasına jerlendi. Onın' ornına ulı Rexabam patsha boldı.
