Ezra 9 bob
1 Bul waqıyalardan keyin, basshılar aldıma kelip bılay dedi: «İzrail xalqı, ha'tte, ruwxaniyler menen lebiyliler de aynalamızdag'ı xalıqlardın': kenaan, xett, periz, ebus, ammon, moab, amor xalıqlarının' ha'm mısırlılardın' jerkenishli na'rselerinen ele arılmadı.
2 ebebi o'zleri de, ulları da usı xalıqlardın' qızlarına u'ylengen. Usılayınsha muxaddes tuqım a'tiraptag'ı xalıqlar menen aralasıp ketken. Basshılar ha'm xızmetker adamlar bul opasızlıqqa bas boldı».
3 Men bul ga'plerdi esitkenimde, ko'ylek-shapanımdı jırtıp, shashsaqalımdı julıp, qattı qapa bolıp jerge otıra kettim.
4 Sonda su'rginnen qaytqanlardın' opasızlıg'ına baylanıslı, İzraildın' Qudayının' so'zlerinen qorqqanlardın' ha'mmesi menin' janıma toplandı. Men bolsam, keshki qurbanlıq waqtına shekem qayg'ıg'a batıp otırdım.
5 Al keshki qurbanlıq waqtında qayg'ıg'a batıp, ko'ylek-shapanım jırtılg'an halda otırg'an ornımnan turdım. Dizerlep otırıp qollarımdı jayıp, Qudayım bolg'an Jaratqan İyege.
6 bılay dedim: «Qudayım! Basımdı ko'terip Sag'an qarawg'a uyalıp ha'm qısınıp turman. Sebebi gu'namız basımızdan asıp, ayıbımız aspang'a jetken.
7 Ata-babalarımızdın' zamanınan baslap usı ku'nge shekem ayıpqa ko'milip qalg'anbız. Gu'namız sebepli bizler o'zlerimiz, patshalarımız, ruwxaniylerimiz basqa ellerdin' patshalarının' qolına tapsırıldıq, o'ltirildik, tutqıng'a alındıq, talandıq ha'm bu'gingidey shermende boldıq.
8 Biraq bu'gin Qudayımız Jaratqan İye! Sen bizlerge qısqa waqıtqa miyrim ko'rsetip, ayırımlarımızdı tiri qaldırdın'. Qullıqta bolg'anımızda ko'zimizge nur beriw ha'm azg'ana bolsa da, en'semizdi ko'teriw ushın, O'zin'nin' muxaddes ornın'nan ma'kan jay berdin'.
9 Sebebi bizler qullar edik. Biraq Qudayımız, Sen bizlerdi qullıqqa taslap qoymadın'. Sen Persiya patshalarının' ju'reginde bizlerge degen miyrim oyattın'. O'zin'nin' İbadatxanan'dı qurıwımız ha'm qarabaqanag'a aylang'an İbadatxananı qayta tiklewimiz ushın jan'a o'mir berdin'. Ja'ne de, Erusalimde ha'm Yahudada bizlerge qorg'anıw diywalın berdin'.
10 Al endi, Qudayımız, bunnan keyin ne dey alamız? O'ytkeni Senin' buyrıqların'nan ju'z burdıq.
11 Sen O'z qulların' payg'ambarlar arqalı mınaday buyrıq bergen edin': „Sizler iyelik etiw ushın kirip atırg'an jer – haram jer. Ol sol jerde jasap atırg'an xalıqlardın' haramlıqları ha'm jerkenishli da'stu'rleri menen haramlang'an. Olar eldi bastan ayag'ına o'z napa'kligine toltırg'an.
12 Sonlıqtan olar menen qız berisip, qız alıspan'lar. Hesh qashan olardın' tınıshlıg'ı ha'm iygiligi ushın ha'reket etpen'ler. Sonda ku'shli bolasız, bul jerdin' o'niminen jep, olardı o'z balaların'ızg'a ma'n'gige miyras etip beresiz“.
13 Basımızg'a tu'skenlerdin' ha'mmesi o'zlerimizdin' jaman islerimiz ha'm u'lken ayıbımız sebepli boldı. Biraq Sen, Qudayımız, bizlerdi islegen isimizge qarag'anda jen'il jazaladın' ha'm ayırımlarımızdı tiri qaldırdın'.
14 Endi qalayınsha ja'ne Senin' buyrıqların'dı buzıp, usınday jerkenishli islerdi islep atırg'an xalıqlar menen quda-tamır bola alamız? Eger solay islesek, onda Sen bizlerge g'a'zeplenip, birde birewimizdi tiri qaldırmay, qırıp taslamaysan' ba?
15 İzraildın' Qudayı Jaratqan İye! Sen a'dilsen'. Bu'gingi ku'nge kelip bizler aman qaldıq. Senin' aldın'da turıwg'a haqımız bolmasa da, mine, bizler o'z ayıplarımızdı arqalap, Senin' aldın'da turmız».
