Nexemiya 4 bob
1 Sanballat bizlerdin' diywaldı qayta qurıp atırg'anımızdı esitkende, qanı qaynap, g'a'zepke mindi ha'm yahudiylerdi masqaralay basladı.
2 Ol o'z sherikleri menen Samariya la'shkerleri aldında bılay dedi: «Mına biyshara yahudiyler ne islep atır? Irasında da, olar o'z diywalın qayta tiklemekshi me? Irasında da, olar qurbanlıq bermekshi me? Bular ne, bir ku'n ishinde qurılıstı pitkermekshi me? Irasında da, olar janıp, u'yilgen shıg'ındıg'a aylang'an taslardı janlandırmaqshı ma?»
3 Sanballattın' janında turg'an ammon xalqınan bolg'an Tobiya da: «Qurıp atırg'an diywalına qaran'lar! Eger bir tu'lki kelip u'stine minse, tas diywalı tas-talqan boladı», – dedi.
4 Sonda men bılay dep duwa ettim: «Qudayımız, bizlerge qulaq sal! Bizler xorlanıp atırmız. Olardın' bizlerge ko'rsetken xorlıg'ın o'zlerinin' basına jawdır ha'm olar da tutqın bolıp, jat elde talanatug'ın bolsın.
5 Olardın' ayıpların jawıp, gu'naların keshirip, ko'z aldın'nan o'shirip taslay go'rme! Sebebi olar qurılısshılardın' arına tiydi».
6 Degen menen, bizler diywal qurılısın dawam ettik. Xalıq bar ıqlası menen islegenlikten, pu'tkil diywaldı onın' yarımına deyin tikledik.
7 Biraq Sanballat, Tobiya, arablar, ammonlar ha'm ashdodlılar Erusalim diywallarının' tikleniw islerinin' alg'a ilgerilep, buzılg'an jerlerinin' pitelip atırg'anın esitkende, qattı ashıwlandı.
8 Olar ha'mmesi birge kelip, Erusalimge qarsı urıs ashıwg'a ha'm ol jerde ta'rtipsizlikti keltirip shıg'arıwg'a kelisip aldı.
9 Sonda bizler Qudayımızg'a duwa etip, olardan qorg'anıw ushın ku'ni-tu'ni saqshılar qoydıq.
10 Biraq yahudalılar ton'qıldap: «Ju'k tasıwshılar haldan taydı, Shıg'ındı bolsa ju'da' ko'p. Sonlıqtan o'z ku'shimiz benen Diywaldı qayta qura almaymız», – dedi.
11 Al dushpanlarımız bolsa: «Bizlerdi bilip, ko'rip qoymasınan burın aralarına kirip alıp, olardı o'ltireyik ha'm isti toqtatayıq», – dep atır.
12 Olardın' janında jasaytug'ın yahudiyler kelip, bizlerge: «Olar ha'r ta'repten sizlerge bastırıp kelmekshi», – dep on ma'rtelep ayttı.
13 Sol sebepli diywaldın' en' pa's, ashıq jerlerinin' artına qılısh, nayza ha'm oq jay menen qurallang'an adamlardı tiyreleri boyınsha ornalastırdım.
14 Bulardı ko'rip shıqqannan son', aqsu'yeklerge, basshılarg'a ha'm pu'tkil xalıqqa: «Olardan qorqpan'lar. Ullı ha'm aybatlı İyemizdi eske alın'lar. Tuwısqanların'ız, ul-qızların'ız, hayalların'ız ha'm u'ylerin'iz ushın urısın'lar», – dedim.
15 O'zlerinin' niyetlerinen xabardar ekenimiz ha'm Quday olardı pushqa shıg'arg'anı dushpanlarımızdın' qulag'ına jetip bardı. Sonda bizler ha'mmemiz diywalg'a, ha'r birimiz o'z isimizge qayttıq.
16 Sol ku'nnen baslap, adamlarımnın' yarımı qurılısta isledi, yarımı nayza, qalqan, oq jay uslap, sawıt kiydi. Al basshılar diywal qurıp atırg'an pu'tkil Yahuda xalqının' artında turdı.
17 Diywal qurıwshılar ha'm ju'k tasıwshılar bir qolı menen jumıs islep, ekinshi qolına quralın alıp ju'rdi.
18 Ha'r bir qurılısshı beline qılıshın baylap alıp, jumıs isledi. Ka'rnay shertetug'ınlar menin' janımda ju'rdi.
19 Men aqsu'yeklerge, basshılarg'a ha'm pu'tkil xalıqqa bılay dedim: «Jumıs ko'lemi u'lken ha'm ken'. Bizler diywal boylap jayılıp ketip, bir-birimizden uzaqlasıp baratırmız.
20 Sonlıqtan qay jerden ka'rnay sestin esitsen'iz, sol jerge, qasımızg'a jıynalın'lar. Qudayımız bizler ushın urısadı».
21 Bizler jumıstı azanda erte, ku'n shıqqanda baslap, keshte kesh, juldızlar shıqqanda tamamladıq. Adamlardın' yarımı ba'rqulla saqshılıqta turdı.
22 Sol waqıtları men xalıqqa ja'ne: «Ha'r bir adam o'z xızmetshileri menen birge Erusalimde tu'nesin. Olar tu'nde qarawıllıqta turıp, ku'ndiz jumıs islesin», – dedim.
23 Men de, tuwısqanlarım da, xızmetshilerim de, janımdag'ı qarawıllar da, hesh birimiz kiyimlerimizdi sheshpedik. Ha'r bir adamnın' quralı qolında boldı.
