Shıg'ıw 10 bob
1 Jaratqan İye Muwsag'a bılay dedi: – Faraong'a bar. Olardın' arasında ka'ramatlı belgilerimdi ko'rsetiw ushın, Men faraonnın' ha'm onın' xızmetkerlerinin' ju'regin qatal qılıp qoydım.
2 Al sizler bolsa, Menin' Jaratqan İye ekenimdi bilip alıwın'ız ushın, mısırlılardı qalay masqara etkenim ha'm olardın' arasında ko'rsetken ka'ramatlarım haqqında balaların'a ha'm balaların'nın' balalarına aytıp berin'.
3 Muwsa menen Xaron faraong'a barıp, og'an bılay dedi: – Evreylerdin' Qudayı Jaratqan İye bılay deydi: «Qashang'a deyin Mag'an bas iymeyjaqsan'? Mag'an sıyınıwı ushın, xalqımdı jiber.
4 Xalqımdı jiberiwden bas tartsan', erten' elin'e shegirtkelerdi jiberemen.
5 Olardın' jer betin qaplaytug'ını sonshelli, jer beti ko'rinbey qaladı. Olar burshaqtan aman qalg'an o'nimlerin'izdi ha'm daladag'ı barlıq tereklerin'izdin' qalg'an japıraqların jep qoyadı.
6 Senin' u'ylerin', barlıq xızmetkerlerin'nin' ha'm pu'tkil mısırlılardın' u'yleri shegirtkege tolıp ketedi. Ata-babaların' usı jerge qonıs basqan ku'nnen bu'ginge deyin, hesh qashan bunday na'rseni ko'rgen emes». Keyin Muwsa burılıp, faraonnın' qasınan shıg'ıp ketti.
7 Sonda xızmetkerleri faraong'a: – Bul adam qashang'a deyin bizlerdi qıynaydı? Olardı jiberin'. Barıp, Qudayı Jaratqan İyege sıyınsın. Mısırdın' nabıt bolıp atırg'anın ele tu'sinbey atırsız ba? – dedi.
8 Solay etip, olar Muwsa menen Xarondı faraonnın' aldına ja'ne shaqırtıp aldı. Faraon olarg'a: – Barın'lar, Qudayın'ız Jaratqan İyege sıyının'lar. Biraq, kimler barajaq? – dedi.
9 Muwsa og'an: – Bizler jas ha'm g'arrımız, ullarımız, qızlarımız, mayda ha'm iri mallarımız, ha'mmemiz birge ketemiz. O'ytkeni Jaratqan İyege arnap bayram qılıwımız kerek, – dedi.
10 Faraon olarg'a: – Awa, sizlerge Jaratqan İye yar bolsın dep, bala-shag'aların'ız benen birge jibereyin be? A'ne, niyetin'iz qara ekeni ko'rinip tur!
11 Bul bolmaydı. Tek er adamlar ketip, Jaratqan İyege sıyınsın. Sizlerdin' sorag'anın'ız da sol emes pe? – dedi. Son' Muwsa menen Xaron faraonnın' aldınan quwıp shıg'arıldı.
12 Sonda Jaratqan İye Muwsag'a: – Qolın'dı Mısır eline qaray soz. Eldi shegirtke qaplasın ha'm burshaqtan aman qalg'an barlıq o'simliklerdi jep qoysın, – dedi.
13 Solay etip, Muwsa tayag'ın Mısır eline qaray sozdı. Jaratqan İye sol ku'ni ku'ndiz-tu'ni udayına elde shıg'ıs samalın estirdi. Azan bolg'anda, shıg'ıs samalı shegirtkelerdi alıp keldi.
14 Shegirtkeler Mısırg'a hu'jim jasap, onın' ha'mme jerin jaylap ketti. Olardın' ko'p bolg'anı sonshelli, bunday esapsansız shegirtke burın bolmag'an da, bunnan bılay bolmaydı da.
15 Shegirtkeler jer betin basıp ketkenlikten, jer qap-qara bolıp qaldı. Olar barlıq o'simliklerdi, burshaqtan aman qalg'an tereklerdegi miywelerdin' ha'mmesin jep qoydı. Mısırdın' hesh bir jerinde, ya tereklerde bolıp, ya daladag'ı o'simliklerde bolıp, jasıl japıraq qalmadı.
16 Faraon tezlik penen Muwsa menen Xarondı shaqırttı da, olarg'a bılay dedi: – Men Qudayın'ız Jaratqan İyege ha'm sizlerge qarsı gu'na isledim.
17 O'tinemen, ja'ne bir ma'rtebe gu'namdı keshirip, Qudayın'ız Jaratqan İyege duwa etin'ler. Ol meni bul o'lim a'keletug'ın apattan qutqarsın.
18 Muwsa faraonnın' aldınan shıg'ıp, Jaratqan İyege duwa etti.
19 Sonda Jaratqan İye samaldın' bag'ıtın o'zgertip, batıs jaqtan ku'shli samal estirdi. Samal shegirtkelerdi ko'terip aparıp, Qamıs ten'izine to'kti. Pu'tkil Mısır elinde birde bir shegirtke qalmadı.
20 Degen menen, Jaratqan İye faraonnın' ju'regin qatal etip qoyg'anlıqtan, ol izraillılardı jibermedi.
21 Bunnan son', Jaratqan İye Muwsag'a: – Qolın'dı aspang'a qaray soz, Mısır elin tas tu'nek qaran'g'ılıq qaplaydı, – dedi.
22 Muwsa qolın aspang'a qaray sozg'anda, Mısırdı u'sh ku'n boyı qoyıw qaran'g'ılıq qapladı.
23 U'sh ku'n dawamında adamlar birbirewin ko're almay qalıp, hesh kim ornınan qozg'ala almadı. Biraq izraillılar jasag'an jer g'ana jaqtı boldı.
24 Sonda faraon Muwsanı shaqırtıp alıp, og'an: – Barın'lar, Jaratqan İyege sıyının'lar. Bala-shag'an'ız sizler menen kete bersin. Tek mayda ha'm iri malların'ız qalsın, – dedi.
25 Degen menen, Muwsa og'an bılay dedi: – Bolmaydı! Mallarımızdı da alıp ketiwimizge ruxsat beriwin'iz kerek. Sebebi Qudayımız Jaratqan İyege jandırılatug'ın qurbanlıqlar ha'm basqa qurbanlıqlar beremiz.
26 Mallarımızdı da birge alıp ketemiz. Bul jerde birde bir tuyaq qalmawı tiyis. Sebebi Qudayımız Jaratqan İyege sıyınıwımız ushın, shalınatug'ın maldı olardın' ishinen alamız. Ol jerge barg'anımızsha, Jaratqan İyege qaysı mallardı beriwimiz kerekligin bilmeymiz.
27 Biraq Jaratqan İye faraonnın' ju'regin qatal qılıp qoyg'anlıqtan, ol izraillılardı jibergisi kelmedi.
28 Faraon Muwsag'a: – Qaran'dı batır. Endi qaytıp ko'zime ko'rinbe. Ko'zime ko'ringen ku'niaq, o'lesen', – dedi.
29 Muwsa og'an: – Aytqanın'ızday bolsın. Endi qaytıp, ko'zin'izge ko'rinbeymen, – dedi.
