Shıg'ıw 16 bob
1 İzrail xalqının' pu'tkil ja'miyeti Elimnen shıqtı. Olar Mısırdan shıqqanınan keyingi ekinshi aydın' on besinshi ku'ni Elim ha'm Sinay arasında jaylasqan Sin sho'line keldi.
2 Sho'lde ha'mmesi Muwsa menen Xarong'a narazı bolıp,
3 olarg'a bılay dep ton'qıldadı: – Qa'nekey, Mısırda-aq Jaratqan İyenin' qolınan o'lip qoya qoyg'anda bolar edi. Hesh bolmasa, ol jerde go'sh salıng'an qazanlardın' qasında otırıp, toyg'anımızsha nan jer edik. Biraq sizler pu'tkil xalıqtı ashlıqtan o'ltiriw ushın, bizlerdi usı sho'lge alıp keldin'iz.
4 Sonda Jaratqan İye Muwsag'a bılay dedi: – Mine, Men sizlerge aspannan nan jawdıraman. Xalıq ha'r ku'ni shıg'ıp, bir ku'nlik nanın jıynap alsın. Usılayınsha Men olardı sınap, olardın' Menin' ko'rsetpelerim boyınsha jasaytug'ının yamasa jasamaytug'ının ko'rejaqpan.
5 Al altınshı ku'ni olar ha'r ku'ni jıynag'anınan eki ese artıq qılıp toplap, tayarlap qoysın.
6 Muwsa menen Xaron pu'tkil izraillılarg'a bılay dedi: – Sizlerdi Mısırdan Jaratqan İyenin' O'zi alıp shıqqanın bu'gin keshte bilip alasızlar.
7 Al erten' azanda Jaratqan İyenin' saltanatın ko'resizler. Sebebi Ol sizlerdin' O'zine narazı bolıp, ton'qıldag'anın'ızdı esitti. Biraq bizlerge narazı bolatug'ınday, bizler kim bolıppız?
8 Keyin Muwsa bılay dedi: – Keshqurın sizlerge jew ushın go'sh, azanda toyg'anın'ızsha nan berilgende, sizler Jaratqan İyenin' saltanatın ko'resizler. O'ytkeni Jaratqan İye sizlerdin' O'zine qarsı narazılıq bildirgenin'izdi esitti. Al bizler kim bolıppız? Sizler bizlerge emes, al Jaratqan İyege narazılıq bildirip atırsızlar.
9 Keyin Muwsa Xarong'a: – İzrail xalqının' pu'tkil ja'miyetine ayt, Jaratqan İyenin' aldına kelsin. Sebebi Jaratqan İye olardın' ton'qıldıların esitti, – dedi.
10 Xaron İzrail xalqının' pu'tkil ja'miyetine usılardı aytıp turg'anda, olar sho'lge qaradı. Sonda Jaratqan İyenin' saltanatı bult ishinde ko'rindi.
11 Jaratqan İye Muwsag'a bılay dedi:
12 Men izraillılardın' ton'qıldıların esittim. Olarg'a mınaday dep ayt: «Keshqurın go'sh jep, azanda nang'a toyatug'ın bolasızlar. Sonda sizler Menin' – Qudayın'ız Jaratqan İye ekenimdi bilip alasızlar».
13 Keshqurın bo'deneler ushıp kelip, ordanı basıp ketti. Al azanda ordanın' a'tirapın shıq qapladı.
14 Shıq kepkende, sho'ldegi jerdin' betinde qırawg'a uqsag'an, mayda da'n sıyaqlı bir na'rse ko'rindi.
15 Bunı ko'rgende, izraillılar bir-birinen: «Bul ne?» – dep sorastı. Sebebi olar bunın' ne ekenin bilmeytug'ın edi. Muwsa olarg'a: – Bul – Jaratqan İyenin' sizlerge jew ushın bergen nanı.
16 Jaratqan İye bılay dep buyıradı: «Ha'r bir adam jey alg'andayın jıynap alsın. Shatırın'ızdag'ı ha'r bir adam ushın bir omerden* alın'lar».
17 İzraillılar solay islep, kimisi ko'p, kimisi az jıynadı.
18 Omer menen o'lshegende, ko'p jıynag'annın' artıg'ı, az jıynag'annın' kemisi bolmadı. Ha'r bir adam jey alatug'ın mug'darda jıynag'an edi.
19 Muwsa olarg'a: – Hesh kim onnan azang'a deyin bir tu'yir qaldırmasın, – dedi.
20 Degen menen, ayırımlar Muwsanı tın'lamay, azang'a deyin qaldırg'anda, ol qurtlap, sasıy basladı ha'm Muwsanın' olarg'a g'a'zebi keldi.
21 Ha'r ku'ni azanda ha'r bir adam o'zi jey alatug'ın mug'darda jıynaytug'ın edi. Al quyash qızg'an waqıtta jerde qalg'anları erip ketetug'ın edi.
22 Altınshı ku'ni adam basına eki omerden, yag'nıy eki ese jıynaytug'ın edi. Ja'miyet basshıları kelip, awhaldı Muwsag'a bildirdi.
23 Muwsa olarg'a bılay dedi: – Jaratqan İyenin' buyrıg'ı usı. Erten' Jaratqan İyege arnalg'an tolıq dem alatug'ın muxaddes Shabbat ku'ni. Sonın' ushın, bu'gin pisiretug'ının'ızdı pisirip, qaynatatug'ının'ızdı qaynatıp alın'lar. Al awısıp qalg'anın azang'a deyin saqlap qoyın'lar+.
24 Muwsanın' buyırg'anınday, xalıq awısıp qalg'andı azang'a deyin saqlap qoyg'anda, ol sasımadı da, qurtlap ta ketpedi.
25 Sonda Muwsa olarg'a bılay dedi: – Awısıp qalg'andı bu'gin jen'ler. Sebebi bu'gin Jaratqan İye ushın Shabbat ku'ni. Bu'gin daladan manna taba almaysızlar.
26 Sizler onı altı ku'n jıynan'lar. Biraq jetinshi ku'ni bolg'an Shabbat ku'ni ol ulıwma bolmaydı.
27 Jetinshi ku'ni ayırımlar nan jıynaw ushın sırtqa shıqqanda, hesh na'rse taba almadı.
28 Sonda Jaratqan İye Muwsag'a bılay dedi: – Qashang'a shekem buyrıqlarım ha'm ko'rsetpelerimdi orınlawdan moyın tawlaysızlar?
29 Minekey, Men sizlerge Shabbat ku'nin berdim. Sonlıqtan altınshı ku'ni sizlerge eki ku'nlik nan berip atırman. Jetinshi ku'ni ha'r bir adam qay jerde jasap atırg'an bolsa, sol jerde qalsın, sırtqa shıqpasın.
30 Solay etip, xalıq jetinshi ku'ni dem aldı.
31 İzraillılar sol nandı manna dep atadı. Onın' ko'rinisi kinza tuqımı sıyaqlı bolıp, da'mi pal qosılg'an sho'rekke uqsaytug'ın edi.
32 Muwsa xalıqqa bılay dedi: – Jaratqan İye bılay dep buyıradı: «Sizlerdi Mısırdan alıp shıqqanımda, Menin' sizlerge sho'lde bergen nanımdı keleshek a'wladlardın' ko'riwi ushın, onın' bir omerin saqlap qoyın'lar»
33 Muwsa Xarong'a: – Bir ıdıstı alıp, ishine bir omer manna sal. Keleshek a'wladlarg'a saqlanıp qalıwı ushın, onı Jaratqan İyenin' aldına qoy, – dedi.
34 Jaratqan İyenin' Muwsag'a buyırg'anınday, Xaron mannanı saqlap qoyıw ushın, onı Kelisim sandıg'ının' aldına qoydı.
35 İzraillılar ma'kan etilgen Qanan jerine jetip barg'ansha, qırıq jıl manna jedi.
36 Bir omer efanın'* onnan bir bo'legine tuwrı keletug'ın edi.
