1 A'tir mayg'a tu'sip o'lgen shıbınlar a'tir maydı buzadı, Sol sıyaqlı, hu'rmetli adamnın' azg'ana aqılsızlıg'ı onın' danalıg'ı menen abırayına zıyan keltiredi.
2 Dananın' ju'regi durıs jolg'a, Aqılsızdın' ju'regi teris jolg'a talpınadı.
3 Aqılsız qanday joldan ju'rmesin, Og'an ba'ri bir aqıl jetispeydi. Ol o'zinin' aqılsızlıg'ın ha'mmege ko'rsetedi.
4 Eger hu'kimdarın'nın' g'a'zebi sag'an qaray lawlasa, Ornın'nan turıp, ketip qalma. Kishipeyillik u'lken qapashılıqlardı da bastıra aladı.
5 Quyash astında ja'ne bir jawızlıqtı ko'rdim. Ol hu'kimdar islegen qa'telik edi:
6 Aqılsızlar joqarı lawazımlarg'a otırıp, Hu'rmetli adamlar to'mende otıradı.
7 Men ja'ne atqa mingen qullardı, Qulday bolıp, jayaw ju'rgen basshılardı ko'rdim.
8 Shuqır qazg'annın' o'zi sol shuqırg'a tu'sedi, Diywaldı buzg'andı jılan shag'adı.
9 Tas qashag'an adamdı taslar jaraqatlaydı, Ag'ash jarg'andı ag'ash jaraqatlawı mu'mkin.
10 Topır baltanı qayramasa, Ko'p ku'sh sarp etiledi. Biraq tabısqa erisiw ushın, danalıqtın' paydası ko'p.
11 Eger jılan sıyqırlanbastan burın shag'ıp alsa, Onda jılan sıyqırlawshının' ne keregi bar?
12 Dananın' awzınan jag'ımlı so'zler shıg'adı, Al aqılsız o'z so'zi menen o'zin nabıt qıladı.
13 Onın' so'zinin' bası – aqılsızlıq, Aqırı – aqmaqlıq.
14 Aqılsız ko'p so'yleydi, 0 Biraq adam keleshekte ne bolatug'ının bilmeydi. Adam o'lgennen keyin ne bolatug'ının kim ayta aladı?
15 Aqılsızdın' jumısı o'zin sharshatadı, Ol qalag'a baratug'ın joldı da bilmeydi.
16 Ha'y, patshası jas bolıp, Ha'meldarları azannan baslap zıyapat quratug'ın el, ha'siret shegesen'!
17 Al patshası hasıl tuqımnan shıqqan, Ha'meldarları tek ma'slik etiw ushın emes, Al ku'sh toplaw ushın kerek waqtında zıyapat beretug'ın el baxıtlı!
18 Erinsheklikten tamnın' to'besi oyılar, Jalqawlıqtan to'beden suw o'ter.
19 Zıyapat adamnın' kewlin ko'terer, Sharap o'mirge quwanısh alıp keler, Al aqsha ha'mme mu'ta'jlikti qanaatlandırar.
20 Patshanı, ha'tte, ishin'nen bolsa da, jamanlama, Hu'rmetli adamdı to'sekte jatıp ta, g'arg'ama. Sebebi aspandag'ı quslar xabar tasır, Qanatlı barlıqlar so'zin'di jetkizer.
