Wazshı 12 bob
1 Qayg'ılı ku'nler, yag'nıy aqırg'ı ku'nler kelip: «Men olardan hesh ra'ha't tappadım», – dep aytpasın'nan aldın, Jaslıq shag'ın'da Jaratıwshın'dı eske al!
2 Quyash, jarıqlıq, ay ha'm juldızlar gu'n'girtlenip, Jawın izinen ja'ne qara bultlar qaplamastan aldın, Onı eske al!
3 Sol ku'n kelgende, U'ydi qorg'aytug'ınlar qaltıraydı, Ku'shliler iyiledi, Digirman tartıwshılar az qalg'anlıqtan, isin toqtatadı, Terezeden sırtqa qaraytug'ınlardı gu'n'girt tartadı.
4 Ko'shege qarag'an qapılar jabıladı, Digirmannın' sestin esitpeytug'ın boladı. Qus sestinen oyanadı, Biraq sayrag'anın zorg'a esitedi.
5 Ba'lentlikten qorqatug'ın bolıp qaladı, Ko'shege shıg'ıwg'a ju'reksinbeydi, Badam ag'ashı aq tu'ske enedi, Shegirtke su'yretilip qaladı, Hesh bir miywe qushtarlıq oyatıwg'a ja'rdem bermeydi. Adam o'zinin' ma'n'gilik u'yine kirejaq, Ko'she joqlaw aytıp jılag'anlarg'a tolıp ketedi.
6 Sonlıqtan gu'mis shınjır u'zilip, Altın kese sınbastan, Bulaq basındag'ı gu'ze qıyrap, Qudıq u'stindegi suw tartqısh u'zilmesten,
7 Topıraqtan islengen denen' jerge qaytpastan, Quday bergen ruwxın' da Qudayg'a qaytpastan burın, O'zin'di Jaratqandı eske al!
8 Biyhuda, biyhuda! – deydi Wazshı, – Ha'mmesi biyhuda!
9 Wazshı dana adam bolıp g'ana qoymay, bilgenlerin xalıqqa da u'yretti. Ol ko'plegen naqıl-maqallardı oy eleginen o'tkizip, izertledi ha'm qayta 2 islep, ornı-ornına qoydı.
10 Wazshı teren' ma'nili so'zlerdi izledi, ol haqıyqat so'zlerin durıs jazdı.
11 Danalardın' so'zleri shopannın' ushlı tayag'ına, jıynalg'an naqıl so'zler bekkem qag'ılg'an shegege uqsaydı. Bul so'zler bir Shopan ta'repinen berilgen.
12 Bulardan tısqarı, balam, mınalardı bilip qoy: ko'p kitap jazıwdın' shegi joq, ko'p kitap oqıw deneni sharshatadı.
13 Ha'mme na'rse aytıldı, endi juwmaqtı tın'layıq: Qudaydan qorq, Onın' buyrıqların orınla! Bul ha'r bir adamnın' parızı.
14 Quday ha'r bir isti, Jasırın islengen jaqsı-jaman islerdin' ha'mmesin hu'kim qıladı.
