Eremiya 11 bob
1 Eremiyag'a Jaratqan İyeden mınaday so'z tu'sti:
2 – Mına kelisimnin' sha'rtlerin tın'la! Bulardı Yahuda xalqına ha'm Erusalim turg'ınlarına bayan et.
3 Olarg'a ayt: «İzraildın' Qudayı Jaratqan İye bılay deydi: Bul kelisimnin' sha'rtlerine qulaq aspag'an adamg'a na'let jawadı.
4 Men ata-babaların'ızdı Mısırdan, temir oshaqtan alıp shıqqan ku'nimde olarg'a bılay dep buyrıq berdim: „Menin' dawısıma qulaq salın' ha'm buyırg'an na'rselerimnin' ba'rin orınlan'. Sonda sizler Menin' xalqım, Men de sizlerdin' Qudayın'ız bolaman.
5 Solay islesen'iz, ata-babaların'ızg'a bergen antımdı orınlap, o'zlerin'iz ha'zir iyelegen jerdi, su't ha'm pal ag'ıp turg'an jerdi beremen“». Sonda men: – Awmiyin, Jaratqan İye, – dep juwap berdim.
6 Keyin Jaratqan İye mag'an bılay dedi: – Bul so'zlerdin' ha'mmesin Yahuda qalalarında ha'm Erusalim ko'shelerinde ja'riyalap, bılay dep ayt: «Bul kelisimnin' sha'rtlerin tın'lan' ha'm olardı orınlan'.
7 Men ata-babaların'ızdı Mısırdan alıp shıqqan ku'nnen tap usı ku'nge shekem u'zliksiz: „So'zime qulaq salın'“, – dep qattı eskertip keldim.
8 Degen menen, olar tın'lamadı, qulaq aspadı. Qaytama qırsıg'ıp, ha'r biri ju'reginin' jaman qa'lewleri menen ju're berdi. Sonlıqtan kelisimdegi barlıq g'arg'ıstı olardın' basına jawdırdım. Men olarg'a bulardı orınlawdı buyırg'an edim, biraq olar orınlamadı».
9 Son'ınan Jaratqan İye mag'an bılay dedi: – Yahuda xalqı ha'm Erusalim turg'ınları arasında bir til biriktiriw ju'zege shıqtı.
10 Olar Menin' so'zlerime qulaq salıwdan bas tartqan atababalarının' ayıplarına qayta oraldı, basqa qudaylardın' izine erip, olarg'a xızmet etti. İzrail xalqı da, Yahuda xalqı da Menin' ata-babaları menen du'zgen kelisimimdi buzdı.
11 Sonlıqtan Men, Jaratqan İye bılay deymen: Men olardın' basına qashıp qutıla almaytug'ın apat jawdıraman. Olar Meni shaqırsa da, Men olarg'a qulaq salmayman.
12 Keyin Yahuda qalaları menen Erusalim turg'ınları o'zleri xosh iyisli tu'tetki tu'tetken qudaylarına barıp, jalbarınadı. Biraq apatshılıq kelgende, bul qudaylar olardı hasla qutqarmaydı.
13 Yahuda, sende qansha qala bolsa, qudayların'nın' sanı da sonsha! Jerkenishli butqa, yag'nıy Baal butına arnap xosh iyisli tu'tetki tu'tetiw ushın, Erusalimde qansha ko'she bolsa, sonsha qurbanlıq orın qurdın'ız.
14 Eremiya, sen bul xalıq ushın duwa etpe, olar ushın jalbarınba da. Sebebi apatshılıqqa ushırap Meni shaqırg'anda, Men olarg'a qulaq salmayman.
15 Su'yikli xalqımnın' İbadatxanamda ne jumısı bar? Olar ko'p jaman isler qıldı. Eger jawızlıq qılıp atırıp, shadlanadı eken, qalayınsha qurbanlıq go'shi qabıl alınadı!
16 Jaratqan İye sag'an «Sulıw miyweli, jasıl japıraqlı za'ytu'n ag'ashı» degen at berdi. Endi bolsa, ku'shli g'almag'allıq shawqımı astında og'an ot beredi, onın' shaqaları janıp, nabıt boladı.
17 Bul terekti tikken A'lemnin' Jaratqan İyesinin' O'zi seni joq qılıwdı qarar etti. O'ytkeni İzrail ha'm Yahuda xalqı jawızlıqlar isledi, Baalg'a tu'tetkiler tu'tetip, Onın' g'a'zebin keltirdi.
18 Jaratqan İye mag'an ayan qıldı. Olardın' jawız niyetlerin ashıp bergeni ushın, men onnan xabar taptım.
19 Men bolsam, bawızlawg'a alıp baratırılg'an juwas bir qozı sıyaqlı edim. Olardın' mag'an qarsı til biriktirgenin bilmedim. Olar: «Kelin', ag'ashtı miywesi menen joq qılayıq, Bunnan bılay, onın' atı eske alınbawı ushın, Tiriler a'leminen kesip taslayıq», – degen edi.
20 A'dalatlı hu'kim shıg'aratug'ın, Ju'rek-qa'libti sınaytug'ın, A'lemnin' Jaratqan İyesi! Dawamdı Sag'an tapsıraman, Olardan qalay o'sh alg'anın'dı ko'reyin!
21 Sonlıqtan janımdı almaqshı bolıp: «Jaratqan İyenin' atınan payg'ambarshılıq qılma, bolmasa, qolımızdan o'lesen'», – degen anatotlılar haqqında Jaratqan İye aytadı.
22 A'lemnin' Jaratqan İyesi bılay deydi: «Men olardı jazalayman. Jasları qılıshtan, balaları ha'm qızları ashlıqtan o'ledi.
23 Hesh biri aman qalmaydı. Hu'kim qılınatug'ın jılı, Men anatotlılardın' basına apatshılıq jawdıraman».
