Ezekiel 21 bob
1 Mag'an Jaratqan İyeden so'z tu'sti:
2 – İnsan ulı, ju'zin'di Erusalimge qaratıp, muxaddes orınlarına qarsı waz ayt. İzrail jerine qarsı payg'ambarshılıq qılıp,
3 og'an ayt: «Jaratqan İye bılay deydi: Men sag'an qarsıman, qılıshımdı qınınan shıg'arıp, sendegi jaqsını da, jamandı da qırıp taslayman.
4 Jaqsını da, jamandı da, qubladan arqag'a shekemgi barlıq tiri jandı qırıp taslaw ushın qılıshımdı qınınan shıg'ardım.
5 Sonda pu'tkil adamzat qılıshın qınınan shıg'arg'an bul Men, Jaratqan İye ekenimdi bilip aladı. Endi qılıshımdı qınına salmayman».
6 – Sen, insan ulı, zar en'ire, olardın' ko'zinin' aldında belin' qayısıp, ju'regin' ezilip, nala shek.
7 Sennen: «Nege nala shegip atırsan'?» – dep sorasa, olarg'a: «Kelgen jaman xabar sebepli qayg'ıg'a batıp atırman», – dep juwap ber. Ol ju'zege asqanda, ha'mmenin' ju'regi eziledi, qollarında ma'det qalmaydı, ruwxı tu'sedi, dizelerinin' ma'darı qurıydı. Bul keledi ha'm ju'zege asadı, – deydi Quday İye.
8 Mag'an Jaratqan İyeden so'z tu'sti:
9 – İnsan ulı, payg'ambarshılıq et ha'm İye bılay deydi dep ayt: «Qılısh, qılısh! Ol sharlandı ha'm jıltıratıldı!
10 Bawızlaw ushın sharlandı, Shaqmaqtay jaltıldaw ushın jıltıratıldı. Qalay quwanayıq, ha'y ulımnın' hasa tayag'ı, Qılısh ha'r qanday ag'ashtı pisent etpeydi.
11 Qılısh qolg'a uslanıw ushın jıltıratıwg'a berildi, Qanxordın' qolına beriliw ushın, Sharlandı, jıltıratıldı.
12 İnsan ulı, dad salıp, pa'riyad qıl, Qılısh Menin' xalqıma, İzraildın' barlıq hu'kimdarlarına ju'zlengen. Menin' xalqım menen birge, İzrail hu'kimdarları da qılıshtan o'tkeriledi. Endi sanın'a urıp, jıla.
13 Sınaw waqtı so'zsiz keledi. Qılısh hasa tayaqtı mensinbese, ne boladı? Hasa tayaqtın' ku'ni pitedi, – deydi Quday İye».
14 – Sen, insan ulı, payg'ambarshılıq qıl, Ashıw menen alaqanın'dı alaqanın'a ur. Qılısh eki ret, u'sh ret shapsın. Bul qılısh o'ltiriw ushın, Ullı qırg'ın ushın arnalg'an. Qılısh olardı ha'r ta'repten qısıp kelmekte.
15 Ruwxları tu'ssin, Qaza tapqanlar ko'beysin dep, Men barlıq da'rwazalardın' aldına, Qorqınıshlı qılıshımdı qoydım. O-ho, qılısh shaqmaq kibi jaltıldadı, Qırıw ushın qınınan shıg'arıldı.
16 On'g'a ur, shepke shap, Ju'zin'nin' qarag'an jag'ına ur.
17 Men de alaqanımdı alaqanıma uraman, G'a'zebimdi usılay basaman. Bunı Men, Jaratqan İye aytıp turman.
18 Mag'an Jaratqan İyeden so'z tu'sti:
19 İnsan ulı, Babiloniya patshasının' qılıshı keletug'ın eki joldı belgile, ekewi de bir jerden shıqsın. Qala jolının' baslang'an jerine bir belgi qoy.
20 Ammonlardın' Rabba qalasına ha'm Yahudadag'ı qorshawlı qala Erusalimge kiriwi ushın jol belgile.
21 Sebebi Babiloniya patshası joldın' ekige ayırılg'an jerinde turıp, pal ashadı. Ol oqlardı silkitedi, but mu'sinlerinen soraydı, qurbanlıq qılıng'an mallardın' bawırına qarap jorıydı.
22 Onın' on' qolında Erusalimdi ko'rsetip turg'an pal bar. Ol jerge diywallardı tesetug'ın qurallar ornatıw, o'lim buyrıg'ın beriw, urıs su'renin salıw, da'rwazanı buzatug'ın qurallardı qoyıw, diywalg'a qıyalatıp topıraq u'yiw, qamal minaraların qurıw keregi aytıladı.
23 Babiloniya patshasına ant iship, kelisim du'zgen Erusalim xalqının' na'zerinde bul pal o'tirik bolıp tu'yiledi. Biraq Babiloniya patshası olardın' ayıbın esletip, olardı qolg'a almaqshı boladı.
24 Sonlıqtan Quday İye bılay deydi: «Sizler ashıq jınayat qılıp, qılmısların'ızdı eslettin'iz. Qılg'an ha'r bir isin'izde gu'naların'ızdı a'shkara qılıp, o'zlerin'iz bunı eske saldın'ız. Sonın' ushın sizler qolg'a tu'sesiz.
25 Sen, İzraildın' napa'k, jawız hu'kimdarı, son'g'ı ku'nin' jaqınlastı, aqırg'ı jaza ku'nin' jetip keldi!
26 Quday İye bılay deydi: Sa'llen'di shesh, tajın'dı alıp tasla. Endi bul bulay bolmaydı. Xorlang'an adam joqarılaydı, joqarıdag'ı adam xorlanadı.
27 Qırg'ın! Qırg'ın! Qalag'a qırg'ın tiygizemen! Biraq bul uzaq dawam etpeydi. Hu'kim shıg'arıwshı keledi. Og'an hu'kim etiwdi tapsıraman».
