Ezekiel 35 bob
1 Mag'an Jaratqan İyeden so'z tu'sti:
2 – İnsan ulı, ju'zin'di tawlı Seir jeri qaratıp, og'an qarsı payg'ambarshılıq qılıp,
3 og'an ayt: «Quday İye bılay deydi: Ha'y, tawlı Seir jeri, Men sag'an qarsıman. Qolımdı ko'terip, seni kimsesiz wayranagershilikke aylandıraman.
4 Qalaların'dı qarabaqanag'a aylandırıp, adamsız qaldıraman. Sonda Menin' Jaratqan İye ekenimdi bilip alasan'.
5 A'zelden dushpanshılıg'ın' bolg'anlıqtan, İzrail apatqa ushırap, son'g'ı jazasın tartıp atırg'anda, olardı qılıshtın' erkine tapsırdın'.
6 Sol qılg'anların' ushın, tiriligim haqı aytaman, – deydi Quday İye, – seni qang'a bılg'ayman, qan izin'nen qalmaydı. Qan to'giwden tiksinbegenin' ushın, qan da senin' izin'nen qalmaydı.
7 Tawlı Seir jeri, seni adamsız sho'lge aylandıraman. Sag'an kelip-ketiwshilerdi joq qılaman.
8 O'zin'di o'li denege toltıraman. To'beshiklerin'de, oypatlıqların'da ha'm barlıq sayların'da qılıshtan qaza tapqanlar qulap jatadı.
9 Seni ma'n'gige qan'ıratıp, bos qaldıraman. Qalaların'da adam jasamaytug'ın boladı. Sonda Menin' Jaratqan İye ekenimdi bilip alasan'.
10 Men, Jaratqan İye sol jerde bolg'anıma qaramastan, sen: „Bul eki xalıq ha'm olardın' jerleri biziki boladı, olardı iyelep alamız“, – degenin' ushın,
11 tiriligim haqı aytaman, – deydi Quday İye, – xalqımdı jek ko'rip, ashıw ha'm qızg'anshaqlıq penen olarg'a ne qılg'an bolsan', Men de sag'an sonı isleymen. Sag'an qazılıq qılg'anımda, olarg'a O'zimdi ayan etemen.
12 Sonda sen Menin' Jaratqan İye ekenimdi bilip alasan'. Men senin' İzrail tawlarına: „Qan'ırap bos qaldı, olar bizge jem qılıp berildi!“ – dep masqaralap aytqan barlıq so'zlerin'di esittim.
13 Sen ko'z aldımda maqtanıp, Mag'an qarsı ga'pti ko'beyttin'. Men bulardı esittim.
14 Quday İye bılay deydi: Pu'tkil jer beti quwanıshqa bo'lenip atırg'anda, men seni qan'ıratıp, quw dalag'a aylandıraman.
15 İzrail xalqının' miyras jeri bosap qalg'anda qalay quwang'an bolsan', sol isti senin' de basın'a salaman. Tawlı Seir jeri ha'm pu'tkil Edom birgelikte quw dalag'a aylanasız. Sonda ha'mme Menin' Jaratqan İye ekenimdi bilip aladı».
