1 – İnsan ulı! O'tkir bir qılısh al, onı pa'ki ornına paydalanıp, shashın' menen saqalın'dı qırqıp tasla. Keyin shashın'dı o'lshew ushın ta'rezi alıp, olardı bo'leklerge bo'l.
2 Qalanın' qamal ku'nleri tamamlang'anda, shashın'nın' u'shten bir bo'legin gerbishke sızılg'an qalanın' u'stinde jandır. U'shten bir bo'legin qala a'tirapına shashıp taslap, qılısh penen maydala. Qalg'an u'shten birin samalg'a ushırıp jiber. Men de qılıshımdı jalan'ashlap, qala turg'ınlarının' izinen quwaman.
3 Biraq shashın'nın' bir neshe talın alıp, shapanın'nın' shalg'ayına tan'ıp qoy.
4 Olardan ja'ne bir neshewin alıp, otqa taslap, o'rtep jiber. Sol jerden shıqqan ot pu'tkil İzrail xalqına taraydı.
5 Quday İye bılay deydi: Bul Erusalim, onı Men milletlerdin' qaq ortasına, al basqa milletlerdi onın' aylanasına jaylastırdım.
6 Biraq Erusalim aylanasındag'ı barlıq milletlerden ha'm ellerden beter jamanlıq qılıp, Menin' nızamlarıma ha'm qag'ıydalarıma qarsı bas ko'terdi. Menin' nızamlarımnan waz keshti ha'm qag'ıydalarıma boysınbadı.
7 Sonlıqtan Quday İye bılay deydi: Sizler aylanan'ızdag'ı milletlerden de beter bas ko'tergish bolıp kettin'ler. Menin' qag'ıydalarıma a'mel qılmadın'lar, nızamlarıma boysınbadın'lar, ha'tte, a'tirapın'ızdag'ı milletlerdin' da'stu'rleri boyınsha da ha'reket etpedin'ler.
8 Sonlıqtan Quday İye bılay deydi: Bilip qoy, Men O'zim sag'an qarsı shıg'aman. Seni milletlerdin' ko'z aldında jazalayman.
9 Qılg'an jerkenishli islerin' sebepli, Men sag'an burın islemegen ha'm keleshekte de islemeytug'ın bir isti qılaman.
10 Sonda ashlıqtan sendegi ata-analar balalarının', balalar ata-analarının' etin jeydi. Men sizlerdi jazalayman ha'm tiri qalg'anlardı samalg'a suwıraman.
11 O'z tiriligim haqı ant ishemen, – deydi Quday İye, – barlıq jerkenishli mu'sinlerin' ha'm buzıq da'stu'rlerin' menen sen Muxaddes ma'kanımdı haramladın'. Men seni saqal qırıqqanday etip qırqıp taslayman, ayamayman, rehim de qılmayman.
12 Xalqın'nın' u'shten biri illetten yamasa ashlıqtan qala ishinde o'ledi, u'shten biri qala a'tirapında qılıshtan qırıladı, al qalg'an u'shten birin samalg'a suwıraman ha'm qılıshımdı jalan'ashlap, olardın' izinen quwaman.
13 Olarg'a g'a'zebimdi tolıq shashıp bolg'annan keyin, qa'ha'rim basıladı ha'm Men tınıshlanaman. Qa'ha'rimdi olarg'a tolıq shashıp bolg'annan keyin, olar Menin', Jaratqan İyenin' qızg'anısh penen aytqanın bilip aladı.
14 Aynalan'dag'ı xalıqlardın' ha'm sen arqalı o'tetug'ın ha'r bir adamnın' ko'z aldında seni qıyratıp taslap, masqara qılaman.
15 Men sizlerdi ashıw ha'm g'a'zep penen hu'kim qılıp, awır jaza menen jazalag'anımda, sen aynalan'dag'ı xalıqlarg'a masqara bolıp, ku'lkige qalasan', olar bunnan qorqıwg'a tu'sip, sabaq aladı. Bunı Men, Jaratqan İye aytıp turman.
16 Sizlerdi joq qılıw ushın, u'stin'izge ashlıqtın' nabıt qılıwshı oqların ataman. Ashlıg'ın'dı ku'sheytip, bir tislem nang'a zar qılaman.
17 Men sag'an ashlıqtı ha'm jabayı an'lardı jiberemen, olar seni balaların'nan ayıradı. İllet ha'm qan to'gispe eldi jaylaydı, u'stin'e qılısh do'ndiremen. Bunı Men, Jaratqan İye aytıp turman.
