Hoshea 2 bob
1 Jaratqan İye bılay dedi: «Ag'a-inilerin'izdi „Ammiy“, yag'nıy „Menin' xalqım“, a'japa-qarındasların'ızdı „Ruxama“, yag'nıy „Rehim etilgenler“, dep shaqırın'».
2 «Anan'ızdın' ayıbın betine basın', awa, ayıbın betine basın', Ol endi hayalım emes, Men de onın' ku'yewi emespen. Ju'zindegi buzıqshılıq boyawın o'shirip, Alıp taslasın ko'kiregindegi buzıqshılıq belgisin.
3 Bolmasa, O'zim onın' kiyimin sheship, jalan'ash qılaman, Anasınan tuwılg'anday etip, ha'mmenin' aldına qoyaman. Kewip qalg'an jerdey, sho'l daladay etip, Suwsızlıqtan o'ltiremen.
4 Balalarına rehim qılmayman, O'ytkeni olar buzıqshılıqtan tuwılg'an.
5 Olardın' anası buzıqshılıq qıldı, Shermendelik penen olarg'a ha'miledar boldı. Ol bılay dedi: „Oynaslarımnın' izinen eremen, Nanımdı, suwımdı, ju'n ha'm zıg'ır tawarımdı, Za'ytu'n mayımdı ha'm ishimligimdi olar beredi“.
6 Sonın' ushın, tosaman jolın tikenler menen, Jolın taba almasın dep, diywal quraman.
7 Oynaslarının' izinen quwadı, Biraq olarg'a jete almaydı, Olardı izleydi, biraq taba almaydı. Sonda ol bılay deydi: „Ku'yewimnin' aldına qaytıp barayın, Sol waqıttag'ı awhalım ha'zirgiden jaqsı edi!“
8 Biyday, sharap ha'm za'ytu'n mayın, Og'an Men bergenimdi bilmedi. Baal ushın qollang'an gu'mis penen altındı da, Og'an Men bergenimdi bilmedi.
9 Sonın' ushın, zu'ra'a't waqtında tartıp alaman biydayımdı, Jıyın-terim ma'wsiminde alıp qoyaman taza sharabımdı. Jalan'ash denesin jawıp turg'an ju'n ha'm zıg'ır tawarlarımdı qaytarıp alaman.
10 Mine, endi oynaslarının' ko'z aldında, Onı jalan'ashlap, abırayın to'gemen, Hesh kim onı qutqara almaydı Menin' qolımnan.
11 Pu'tkil quwanıshlarına, bayramlarına, Jan'a Ay bayramına ha'm Shabbat ku'nlerine, Barlıq belgilengen bayramlarına shek qoyaman.
12 „Oynaslarımnın' bergen to'lemi“, dep aytqan, Ju'zimzarları menen a'njir bag'ların wayran etemen, Ha'mmesin tog'aylıqqa aylandıraman. Bag'ları jem boladı jabayı haywanlarg'a.
13 Baallarg'a arnalg'an bayram ku'nleri, Og'an arnap tu'tetki tu'tetkeni ushın, Sırg'a ha'm tag'ınshaqlar menen bezenip, Oynaslarının' izinen ju'rip, Meni tolıq umıtqanı ushın, onı jazalayman», – deydi Jaratqan İye.
14 «Al endi, onın' kewlin tabaman, Sho'lge alıp barıp, jıllı so'ylesemen.
15 Sonnan keyin og'an ju'zimzarların qaytarıp beremen, Axor oypatlıg'ın u'mit esigi qılaman. Jaslıq waqtındag'ıday, Mısırdan shıqqan ku'nlerindegidey, Ol Mag'an: „Awa“, – dep juwap beredi».
16 Jaratqan İye bılay deydi: «Sol ku'ni sen Meni „Ku'yewim“, dep shaqırasan', artıq „Mırzam“ demeysen'.
17 Baallardın' atların qaytıp tilin'e almaytug'ın qılaman. Olardın' atları qaytadan yadqa alınbaydı.
18 Sol ku'ni olar ushın jabayı haywanlar, aspandag'ı quslar ha'm jer bawırlawshılar menen kelisim du'zemen. Sol jerden sadaq ha'm qılıshlardı, barlıq sawash quralların joq qılaman. Sonda olar qa'wipsiz jatatug'ın boladı.
19 Men seni O'zime ma'n'gige nekelep alaman. Sag'an ha'mme waqıtta a'dalatlı ha'm a'dil, su'yispenshilikli ha'm miyrim-sha'pa'a'tli qatnasta bolaman.
20 Senin' menen bolg'an nekege sadıq qalaman, sen Meni Jaratqan İyem, dep bilesen'».
21 Jaratqan İye bılay dep ja'riyalaydı: «Sol ku'ni juwap beremen, Men aspang'a, aspan bolsa jerge juwap beredi.
22 Jer biyday, taza sharap ha'm za'ytu'n mayı menen juwap beredi, Olar İzreelge juwap beredi.
23 Sol waqıtta Men onı O'zim ushın usı jerge egemen. Lo-Ruxamag'a rehim ko'rsetemen, Lo-Ammiyge: „Menin' xalqım“, – deymen. Ol da Meni: „Menin' Qudayım“, – dep shaqıradı».
