Amos 8 bob
1 Quday İye mag'an mınanı ko'rsetti: mine, bir sebet pisken miywe tur.
2 Ol mennen: – Neni ko'rip tursan', Amos? – dep soradı. – Bir sebet pisken miyweni, – dep juwap berdim. Sonnan keyin, Jaratqan İye: – Xalqım İzraildın' aqırı keldi. Endi olardı artıq keshirmeymen.
3 Sol ku'ni ibadatxanadag'ı qosıqlar qayg'ılı joqlawg'a aylanadı. Ha'mme jer o'lilerge toladı, u'nsizlik saqlansın, – dedi. Bunı Quday İye ayttı.
4 Qulaq salın', jarlını eziwshiler, Eldegi ka'mbag'allardı joq etkenler!
5 Sizler bılay deysiz: «Jan'a ay bayramı o'tiwden da'nimizdi satamız, Shabbat ku'ni o'tiwden biydayımızdı bazarg'a shıg'aramız. Efanı kishireytip, shekeldi u'lkeytemiz, Ta'reziden urıp, alıwshılardı aldaymız.
6 Jarlılardı gu'miske, Ka'mbag'allardı bir jup ayaq kiyimge satıp alamız, Da'nnin' ornına qawıq satamız».
7 Yaqıptın' menmenligine qarsı Jaratqan İye ant iship, bılay deydi: «Olardın' qılmısların hesh qashan umıtpayman.
8 Sonın' ushın, jer titireydi, Onda jasaytug'ınlardın' ha'mmesi qayg'ıg'a batadı. Pu'tkil jer ju'zi Nil da'ryasınday tasıp, ko'teriledi, Mısırdag'ı Nil da'ryası sıyaqlı qaytadan to'menleydi».
9 Quday İye bılay deydi: «Sol ku'ni, tu'ste quyashtı batıraman, Ku'pa'-ku'ndiz jer ju'zin qaran'g'ılıq penen qaplayman.
10 Bayramların'ızdı qayg'ıg'a, Barlıq qosıqların'ızdı joqlawg'a aylandıraman. Ha'r birin'izge aza kiyim kiydiremen, Basın'ızdag'ı shashların'ızdı aldırtaman. Sol ku'ni jalg'ız uldan ayırılg'anday joqlaw aytılıp, Shınında, aqırı ashshı qayg'ılı ku'n boladı».
11 Quday İye bılay deydi: «Mınaday ku'nler keledi, Jer ju'zine ashlıq jiberemen. Nan ha'm suw qıtkershiliginen emes, Jaratqan İyenin', Menin' so'zlerimdi esitpegenlikten, ash qaladı.
12 Jaratqan İyenin', Menin' so'zlerimdi izlep, Adamlar ten'izden ten'izge o'tip, Arqadan shıg'ısqa baradı. Ol jaqtan bul jaqqa barıp, sarsan' boladı, Biraq onı taba almaydı.
13 Sol ku'ni go'zzal qızlar ha'm jas jigitler, Sho'llep haldan tayadı.
14 Samariyanın' Ashima degen butı menen ant iship: „Ha'y, Dan, senin' qudayın'nın' tiriligi haqı, Beer-Shebag'a alıp baratug'ın zıyarat jolı haqı“, – deytug'ınlar, Jerge qulap, qaytıp tura almaydı»+.
