Matta 15 bob
1 Sonda İysanın' qasına Erusalimnen pariseyler menen diniy mug'allimler kelip, Og'an:
2 – Ne ushın Senin' sha'kirtlerin' ata-babalardan qalg'an da'stu'rlerdi buzıp ju'r? Olar nan jewden aldın qolların juwmaydı-g'o, – dedi.
3 İysa olarg'a juwap berip, bılay dedi: – Sizler ne ushın da'stu'rlerin'iz sebepli Qudaydın' buyrıg'ın buzasızlar?
4 Sebebi Quday: «Ata-anan'dı sıyla» ha'm: «Kim de kim a'kesine yamasa anasına jaman so'z aytsa, ol o'ltirilsin» dep buyrıq bergen.
5 Al sizler: «Kim de kim a'kesine yamasa anasına: „Sizlerge beretug'ınımdı Quday jolına qurban etip bag'ıshlayman“, dese,
6 ol a'kesin yamasa anasın sıylamasa da boladı», – deysizler. Solay etip, da'stu'rlerin'iz sebepli, sizler Qudaydın' so'zin biykar etip atırsızlar.
7 Ha'y, eki ju'zliler! İyshaya payg'ambar sizler tuwralı aldın ala durıs aytqan:
8 «Bul xalıq sıylar Meni tili menen, Al kewilleri tur Mennen alıs.
9 Olar Mag'an bosqa sıyınıp, Adam oylap tapqan parızlardı u'yreter».
10 Son'ınan İysa xalıqtı shaqırıp alıp, olarg'a: – Tın'lap, tu'sinip alın'lar:
11 adamdı onın' awzına engen na'rse emes, al awzınan shıqqan na'rse haramlaydı, – dedi.
12 Sonda Onın' sha'kirtleri qasına kelip, Onnan: – Bul so'zdi esitkende, pariseylerdin' ashıwlanıp qalg'anın bildin' be? – dep soradı.
13 İysa olarg'a: – Aspandag'ı A'kem ekpegen ha'r bir o'simlik tu'p-tamırı menen julıp taslanadı.
14 Olardı qoyın'lar. Olar – soqırlardın' soqır jetelewshileri. Eger soqırdı soqır jetelese, ekewi de shuqırg'a qulap tu'sedi, – dedi.
15 Petr Og'an: – Bul tımsaldı bizlerge tu'sindirip ber, – dedi.
16 İysa olarg'a: – Sizler ele tu'sinbey tursızlar ma?
17 Awızg'a engennin' ha'mmesi qarıng'a baratug'ının, onnan son' sırtqa shıg'ıp qalatug'ının tu'sinbeysizler me?
18 Awızdan shıqqan kewilden shıg'adı. Adamdı haramlaytug'ın usı.
19 O'ytkeni jamanlıq oylaw, adam o'ltiriw, neke hadallıg'ın buzıw, buzıq bolıw, urlıq islew, jalg'an gu'walıq beriw ha'm masqaralaw kewilden shıg'adı.
20 Adamdı haramlaytug'ın usılar. Al qol juwmay awqat ishiw adamdı haramlamaydı, – dedi.
21 İysa sol jerden shıg'ıp, Tir ha'm Sidon u'lkesine ketti.
22 Sol u'lkelerden kananlı bir hayal kelip, Og'an:– İyem, Dawıttın' Urpag'ı, mag'an rehim ete go'r! Menin' qızımdı jin urıp, qattı qıynalıp atır, – dep baqırdı.
23 Biraq İysa og'an hesh na'rse aytpadı. Sonda sha'kirtleri qasına kelip, Onnan: – Onı jiber, izimizden baqırıp kiyatır-g'o, – dep o'tindi.
24 İysa: – Men tek İzraildın' jog'alg'an qoylarına jiberilgenmen, – dep juwap qaytardı.
25 Sonda hayal kelip, Onın' ayag'ına jıg'ıldı da: – İyem! Mag'an ja'rdem ete go'r! – dep jalındı.
26 İysa og'an juwap berip: – Balalardın' nanın alıp, iytlerge taslaw durıs emes, – dedi.
27 Hayal: – Awa, İyem, solay. Biraq iytler de xojayınlarının' dasturxanınan tu'sken usaqlardı jeydi-g'o, – dedi.
28 Sonda İysa og'an: – Ha'y, hayal, senin' isenimin' ku'shli eken, tilegenin' bolsın, – dedi. Onın' qızı sol waqıtta-aq jazılıp ketti.
29 İysa sol jerden ketip, Galila ten'izine keldi ha'm tawg'a shıg'ıp otırdı.
30 Sonda Onın' qasına ko'p xalıq jıynalıp qaldı. Olar o'zleri menen birge aqsaqlardı, soqırlardı, mayıplardı, gu'n'eleklerdi ha'm basqa da awırıw adamlardı İysanın' aldına alıp keldi. İysa olarg'a shıpa berdi.
31 Solay etip, gu'n'eleklerdin' tilleri shıg'ıp, mayıplardın' jazılıp, aqsaq bolg'anlardın' ju'rip, soqırlardın' ko'zleri ashılıp ketkenligin ko'rgen xalıq an'-tan' bolısıp, İzraildın' Qudayına alg'ıs ayttı.
32 İysa sha'kirtlerin janına shaqırıp alıp, olarg'a: – Xalıqqa janım ashıp tur. Olar u'sh ku'nnen beri qasımda bolıp, jeytug'ın hesh na'rsesi joq. Olardı ash halında jibergim kelmeydi, sebebi jolda ha'lsirep qalıwı mu'mkin, – dedi.
33 Sha'kirtleri: – Usınshama xalıqtı toyg'ıza alarlıqtay, bir elsiz dalada nandı qayaqtan tabamız? – desti.
34 İysa olardan: – Neshe nanın'ız bar? – dep soradı. Olar: – Jetew, ja'ne bir neshe kishi balıq ta bar, – dep juwap berdi.
35 Son'ınan İysa xalıqqa jerge otırıwdı buyırdı.
36 Jeti nandı ha'm balıqlardı alıp, Qudayg'a shu'kirlik etti. Olardı sındırıp, sha'kirtlerine berdi, olar xalıqqa u'lestirdi.
37 Olardın' ha'mmesi jep toydı. Awısqan bo'leklerin jıynap alıp, u'lken jeti sebet toltırdı.
38 Jegenler hayal ha'm balalardan basqa to'rt mın' adam edi.
39 Sonnan son', İysa xalıqtı tarqatıp jiberdi de, qayıqqa minip, Magdala do'geregine ketti.
