Luka 4 bob
1 İysa Muxaddes Ruwxqa tolıp, İordan da'ryasınan qaytıp kelgende, Ruwx Onı sho'l dalag'a alıp bardı.
2 Onı shaytan sol jerde qırıq ku'n sınadı. Ol bul ku'nleri hesh na'rse jemedi. Olar o'tkennen son', aqırı ash boldı.
3 Sonda shaytan İysag'a: – Eger Sen Qudaydın' Ulı bolsan', mına tasqa buyır, ol nang'a aylansın, – dedi.
4 İysa og'an juwap berip: – Muxaddes Jazıwda: «Adam tek g'ana nan menen jasamaydı», – dep aytılg'an, – dedi.
5 Sonda shaytan İysanı bir biyik jerge shıg'ardı da, Og'an bir demde du'nyanın' barlıq patshalıqların ko'rsetip,
6 Og'an: – Men usı ma'mleketlerdin' pu'tkil biyligin ha'm olardın' sa'nsaltanatların Sag'an beremen. O'ytkeni olar mag'an berilgen, olardı qa'legen adamıma beremen.
7 Eger mag'an tabınsan', ha'mmesi Seniki boladı, – dedi.
8 İysa og'an juwap berip: – Muxaddes Jazıwda: «Quday-İyen'e sıyınıp, tek Og'an xızmet et», – dep aytılg'an-g'o, – dedi.
9 Son'ınan shaytan İysanı Erusalimge aparıp, İbadatxananın' to'besine turg'ızıp qoydı da, Og'an: – Eger Sen Qudaydın' Ulı bolsan', O'zin'di bul jerden to'menge tasla,
10 sebebi bılay dep jazılg'an-g'o: «Ol O'z perishtelerine Seni saqlap qalıwg'a buyrıq beredi.
11 Ayag'ın'dı tasqa urıp almawın' ushın, olar Seni qollarında ko'terip alıp ketedi», – dedi.
12 İysa shaytang'a: – «Quday-İyen'di sınama!», – dep aytılg'an-g'o, – dedi.
13 Shaytan ha'mme sınawların tamamlag'annan keyin, waqıtsha İysanın' qasınan ketti.
14 Muxaddes Ruwxtın' ku'shine tolg'an İysa Galilag'a qaytıp keldi ha'm Ol tuwralı xabar pu'tkil do'gerekke tarqadı.
15 İysa olardın' ma'jilisxanalarında ta'lim berdi ha'm Ol ha'mme adamlar ta'repinen alg'ıslandı.
16 İysa O'zi o'sken Nasıra qalasına kelip, O'z a'deti boyınsha dem alıs ku'ni ma'jilisxanag'a kirdi. İysa oqıw ushın ornınan turg'anda,
17 Og'an İyshaya payg'ambardın' kitabı berildi. Ol kitaptı ashıp, mına ayatlar jazılg'an jerdi taptı:
18 «Jaratqan İyemnin' Ruwxı Menin' u'stimde. O'ytkeni Ol Meni jarlılarg'a Xosh Xabar ja'riyalaw ushın tayınladı.
19 Ol Meni tutqınlardın' azat bolatug'ının, Soqırlardın' ko'retug'ının xabarlawg'a, Azap shekkenlerdin' erkinlikke shıg'ıwı ushın ha'm Jaratqan İyemizdin' miyrimlilik jılın ja'riyalaw ushın jiberdi».
20 Son'ınan İysa kitaptı jawdı da, onı xızmetkerge berip, ornına otırdı. Ma'jilisxanadag'ı ha'mme adamlar Og'an tigilip qaldı.
21 İysa olarg'a so'yley baslap: – Usı Muxaddes Jazıwlar bu'gin, sizler esitken waqıtta orınlandı, – dedi.
22 Ha'mme İysanı maqtadı ha'm Onın' awzınan shıqqan sheshen so'zlerine hayran qalısıp: – Bul – Yusuptın' balası emes pe? – desti.
23 İysa olarg'a bılay dedi: – Sizler, a'lbette, Mag'an: «Shıpaker, o'zin'di o'zin' emle», – degen naqıldı aytıp, «Bizler Kaparnahumda islegen islerin' haqqında esittik. Bul jerde, O'z ana jurtın'da da solardı isle!» – demekshisizler.
24 İysa dawam etip: – Sizlerge shının aytaman: hesh bir payg'ambar o'z watanında qabıl alınbaydı.
25 Sizlerge haqıyqatın aytaman: İliyas payg'ambardın' zamanında u'sh jıl, altı ay aspan jawılıp, jawın bolmay, elde awır asharshılıq bolg'anda, İzrail elinde ko'p jesir hayallar bar edi.
26 Biraq İliyas olardın' hesh birewine jiberilmey, tek Sidon elinin' Sarafat qalasındag'ı bir jesir hayalg'a jiberilgen edi.
27 Sol sıyaqlı, Elisha payg'ambardın' zamanında da İzrailda maqaw kesel bolıp awırg'anlar ko'p edi. Biraq, tek siriyalı Namannan basqa hesh kim awırıwınan jazılg'an joq, – dedi.
28 Bunı esitken ma'jilisxanadag'ılardın' barlıg'ı qattı ashıwg'a mindi.
29 Orınlarınan turıp, İysanı qaladan quwıp shıg'ardı da, Onı tik jardan taslap jiberiw ushın, sol qala qurılg'an tawdın' basına alıp bardı.
30 Biraq İysa olardın' arasınan o'tip, O'z jolına tu'sti.
31 İysa Galiladag'ı Kaparnahum qalasına keldi ha'm dem alıs ku'ni xalıqqa ta'lim berdi.
32 Xalıq İysanın' ta'limine hayran qaldı, sebebi Onın' so'zinde biylik bar edi.
33 Ma'jilisxanada jinge shalıng'an, jawız ruwxlı bir adam bar edi. Ol ba'lent dawıs penen baqırıp:
34 – O, Nasıralı İysa! Bizler menen ne jumısın' bar? Sen bizlerdi joq etiwge keldin' be? Senin' kim ekenin'di bilemen, Sen – Qudaydın' Muxaddesisen'! – dedi
35 İysa og'an keyip: – U'nin'di o'shir de, onnan shıg'ıp ket! – dedi. Sonda jin adamdı ha'mmenin' ko'z aldında jerge qulattı da, hesh zıyan tiygizbey, onnan shıg'ıp ketti.
36 Ha'mme tan' qalısıp, bir-birine: – Bul ne ga'p? Ol jawız ruwxlarg'a biylik ha'm qu'diret penen buyrıq bergende, olar shıg'ıp ketedi-g'o, – desti.
37 Solay etip, İysa tuwralı xabar sol u'lkedegi barlıq jerlerge jayıldı.
38 İysa ma'jilisxanadan shıg'ıp, Simonnın' u'yine bardı. Simonnın' qa'yin enesinin' qattı ıssılıg'ı ko'terilip, awırıp jatırg'an edi. Olar İysadan onı ko'riwdi o'tinish etti.
39 İysa hayaldın' bas ushında turıp ıssılıqqa tıyım salg'anda, hayaldın' ıssılıg'ı tu'sti. Hayal da'rriw ornınan turıp, olarg'a xızmet etti.
40 Quyash batarda ha'mme ha'r tu'rli kesellerge shalıng'an adamların İysag'a alıp keldi. İysa olardın' ha'r birinin' u'stine qolın qoyıp, shıpa berdi.
41 Ko'p adamlardan jinler shıg'ıp baratırıp: «Sen – Qudaydın' Ulısan'!» – dep baqıratug'ın edi. Biraq İysa olarg'a keyip, so'ylewge tıyım saldı. O'ytkeni olar Onın' Masix ekenin biletug'ın edi.
42 Tan' atqanda İysa u'yden shıg'ıp, awlaq jerge ketti. Xalıq Onı izlep qasına keldi ha'm olardı taslap ketpewi ushın, Onı alıp qalmaqshı boldı.
43 Biraq İysa olarg'a: – Quday Patshalıg'ı tuwralı Xosh Xabardı basqa qalalarda da ja'riyalawım kerek, sebebi Men sol ushın jiberilgenmen, – dedi.
44 Solay etip, İysa Yahudiyadag'ı ma'jilisxanalarda waz aytıp ju'rdi.
