Luka 5 bob
1 Bir ku'ni İysa Genesaret ko'linin' jag'asında turg'anda, xalıq Qudaydın' so'zin esitiw ushın Onın' janında tıg'ılısıp turdı.
2 Sonda İysa ko'ldin' jag'asında turg'an eki qayıqtı ko'rdi. Al balıqshılar qayıqtan tu'sip, awların juwıp atırg'an edi.
3 Qayıqlardın' biri Simong'a tiyisli edi. İysa og'an minip, Simonnan jag'adan biraz armanıraq ju'zip barıwın o'tindi de, qayıqta otırıp, xalıqqa ta'lim bere basladı.
4 So'zin tamamlag'annan son', Simong'a: – Teren'irek jerge ju'zip barıp, balıqqa aw sal, – dedi.
5 Simon Og'an juwap berip: – Ustaz! Bizler tu'ni menen miynet etip, hesh na'rse tuta almadıq. Biraq, Senin' so'zin' boyınsha aw salaman, – dedi.
6 Olar usılay islegende, ko'p balıq tutqanlıg'ı sonshelli, ha'tte, awları da jırtıla basladı.
7 Sonda olar basqa qayıqtag'ı sheriklerine belgi berip, ja'rdemlesiwge shaqırdı. Joldasları kelip, eki qayıqtı da suwg'a batar da'rejede balıqqa toltırdı.
8 Bunı ko'rgen Simon Petr İysanın' ayag'ına jıg'ılıp: – İyem! Menin' qasımnan ket, o'ytkeni men gu'nakar adamman, – dedi.
9 Sebebi o'zlerinin' bunshama ko'p balıq awlag'anına o'zi de, qasındag'ılar da hayran qalg'an edi.
10 Simonnın' sherikleri bolg'an Zebedeydin' ulları Yaqıp penen Yuxan da usınday awhalda edi. İysa Simong'a:
11 Sonda olar qayıqların jag'ag'a shıg'ardı da, ha'mmesin qaldırıp, İysanın' izine erdi.
12 İysa bir qalada bolg'anda, pu'tkil denesi maqaw kesel bolg'an bir adam keldi. Ol İysanı ko'rip, ayag'ına jıg'ıldı da: – İyem! Eger Sen qa'lesen', meni maqaw keselden tazalay alasan'-g'o, – dep jalındı.
13 İysa qolın sozıp, og'an tiygizdi de: – Qa'leymen, tazalan! – dedi. Ol sol waqıtta-aq maqaw keselden tazalandı.
14 İysa og'an: – Bunı hesh kimge aytpa! Tek ruwxaniyge barıp, o'zin'di ko'rset te, maqaw keselden tazalang'anın'dı adamlarg'a da'lillew ushın, Muwsa buyırg'an qurbanlıqtı ber, – dep buyırdı.
15 Biraq İysa haqqında xabar burıng'ıdan da ko'birek jayıldı. Ko'p xalıq Onı tın'lap, awırıwlarına shıpa alıw ushın, Onın' aldına ag'ıp kele berdi.
16 Al İysa awlaq jerge barıp, duwa etetug'ın edi.
17 Bir ku'ni İysa ta'lim berip otırg'anda, Galila menen Yahudiyanın' barlıq awıllarınan ha'm Erusalimnen kelgen pariseyler* menen diniy mug'allimler Onın' qasında edi. Al İysada awırıwlarg'a shıpa beriwshi Jaratqan İyemizdin' qu'direti bar edi.
18 Sonda birewler la'n' bolg'an adamdı to'segi menen ko'terip alıp keldi. Olar İysanın' aldına onı qoyıw ushın, u'yge kirgiziwge tırıstı.
19 Adamlardın' ko'pliginen alıp kire almag'an olar tamnın' basına shıqtı. Onı ashtı da, la'n' adamdı to'segi menen ortag'a, İysanın' aldına tu'sirdi.
20 İysa olardın' isenimin ko'rip: – Dostım, senin' gu'naların' keshirildi, – dedi.
21 Diniy mug'allimler menen pariseyler: «Qudayg'a til tiygizip turg'an Bul kim? Gu'nalardı jalg'ız Qudaydan basqa kim keshire aladı?» – dep ishlerinen oylay basladı.
22 İysa olardın' ne oylag'anın bilip, olarg'a: – İshlerin'izden nege bunday na'rselerdi oylap tursızlar?
23 Qaysısın aytıw an'satıraq: «Gu'naların' keshirildi», – dew me yamasa: «Ornın'nan turıp, ju're ber», – dew me?
24 Biraq, Adam Ulının' jer betinde gu'nalardı keshiriwge biyligi bar ekenin bilip qoyın'lar, – dep juwap berdi de, la'n' adamg'a: – Sag'an aytaman: ornın'nan turıp, to'segin'di al da, u'yin'e bar! – dedi.
25 Sonda la'n' adam ha'mmenin' ko'z aldında da'rhal ornınan turıp, o'zi jatqan to'segin aldı da, Qudaydı alg'ıslap u'yine qayttı.
26 Ha'mme qattı tan' qalısıp, Qudayg'a maqtawlar ayttı. Olar qorqınıshqa tolıp: – Bizler bu'gin tan' qalarlıq isler ko'rdik, – desti.
27 Sonnan keyin, İysa sol jerden shıg'ıp, salıq ken'sesinde otırg'an Lebiy atlı salıqshını ko'rdi de, og'an: – İzime er! – dedi.
28 Ol ornınan turdı da, ha'mme na'rsesin qaldırıp, İysanın' izine erdi.
29 Lebiy o'z u'yinde İysa ushın u'lken zıyapat isledi. Olar menen birge ko'plegen salıqshılar ha'm basqa da adamlar dasturxanlas boldı.
30 Pariseyler menen diniy mug'allimler İysanın' sha'kirtlerine narazılıq bildirip: – Sizler nege salıqshılar ha'm gu'nakarlar menen birge iship-jep otırsızlar? – dedi.
31 İysa olarg'a juwap berip: – Shıpakerge deni sawlar emes, al awırıwlar mu'ta'j.
32 Men haq adamlardı emes, al gu'nakarlardı ta'wbege shaqırıwg'a keldim, – dedi.
33 Olar İysag'a: – Yaqıyanın' sha'kirtleri jiyi-jiyi oraza tutıp, duwa etedi. Pariseylerdin' sha'kirtleri de solay isleydi. Al Senin' sha'kirtlerin' iship-jep ju'ripti, – dedi.
34 İysa olarg'a: – Ku'yew o'zleri menen birge bolg'anda, toyg'a kelgenlerdi oraza tutıwg'a ma'jbu'r ete alasızlar ma?
35 Biraq, olardan ku'yewdi tartıp alıp ketiletug'ın ku'nler keledi, olar sonda, sol ku'nleri oraza tutadı, – dedi.
36 İysa olarg'a ja'ne bir tımsal aytıp, bılay dedi: – Hesh kim jan'a kiyimnen jırtıp alıp, eski kiyimge jamaw salmaydı. Olay etse, jan'a kiyim de jırtılıp qaladı, jan'a jamaw da eski kiyimge u'ylespeydi.
37 Hesh kim jan'a sharaptı da eski meske quymaydı. Olay etse, jan'a sharap mesti jarıp ag'ıp ketedi, mes te buzıladı.
38 Jan'a sharaptı jan'a meske quyıw kerek.
39 Hesh kim eski sharaptı iship ko'rip, jan'asın qa'lemeydi: o'ytkeni «eskisi jaqsıraq», – deydi.
