Yuxan 12 bob
1 Qutqarılıw bayramınan altı ku'n aldın İysa Betaniyag'a, O'zi o'limnen tiriltken Lazar jasaytug'ın jerge keldi.
2 Sol jerde İysa ushın keshki zıyapat berildi. Marta xızmet etip ju'rgen edi. İysa menen dasturxan a'tirapında jambaslap jatırg'anlardın' arasında Lazar da bar edi.
3 Sonda Ma'riyam yarım litr ju'da' qımbatlı, sap a'tir mayın alıp kelip, İysanın' ayaqlarına quydı ha'm Onın' ayaqların shashları menen su'rtti. U'ydin' ishi maydın' xosh iyisine tolıp ketti.
4 Sonda İysanın' sha'kirtlerinin' biri, son'ınan Og'an satqınlıq isleytug'ın Yahuda İsqariot:
5 – Ne ushın bul may u'sh ju'z dinarg'a satılıp, aqshası jarlılarg'a berilmedi? – dedi.
6 Bul so'zlerdi ol jarlılardı oylag'anı ushın emes, al urı bolg'anı ushın ayttı. Ortalıqtag'ı puldın' qutısı onda bolıp, ol qutıg'a salıng'anlardan o'zine alatug'ın edi.
7 İysa: – Hayaldı tınıshına qoy! Ol bunı Menin' jerlenetug'ın ku'nim ushın saqlap qoyg'an.
8 Jarlılar ha'mme waqıt sizler menen birge, biraq Men sizler menen ha'mme waqıt birge bolmayman, – dedi.
9 Ko'plegen yahudiyler İysanın' Betaniyada ekenin bilip, sol jerge keldi. Olar tek İysa ushın emes, al Ol o'limnen tiriltken Lazardı ko'riw ushın da keldi.
10 Al bas ruwxaniyler Lazardı da o'ltiriwge til biriktirgen edi.
11 O'ytkeni ol sebepli, ko'p yahudiyler olardan ketip qalıp, İysag'a isenetug'ın edi.
12 Erten'ine Erusalimdegi bayramg'a kelgen ko'p xalıq İysanın' da sol jerge keletug'ının esitip qaldı.
13 Olar xurma shaqaların alıp, İysanı qarsı alıwg'a shıqtı ha'm ba'lent dawıs penen bılay dedi: – Hosanna! «İyemizdin' atı menen kiyatırg'an İzraildın' Patshası jarılqansın!»
14 Muxaddes Jazıwda: «Qorqpa, Erusalim xalqı!
15 Mine, gu'rrege minip, senin' Patshan' kiyatır» , – dep jazılg'anday, İysa bir gu'rreni tawıp, og'an mindi.
16 Onın' sha'kirtleri da'slep bunı tu'sinbedi. Biraq İysa ullılıqqa eriskennen son', bul so'zlerdin' Ol haqqında jazılg'anın ha'm xalıqtın' bulardı Ol ushın islegenin eslerine tu'sirdi.
17 İysanın' Lazardı qa'birden shaqırıp, onı o'limnen tiriltken waqtında İysa menen birge bolg'an xalıq ko'rgenlerin aytıp ju'rdi.
18 Sonlıqtan İysanın' bul ka'ramattı islegenin esitken ko'p adamlar Onı qarsı alıwg'a shıqtı.
19 Al pariseyler bir-birine: – Ko'rip tursızlar ma? Qolın'ızdan hesh na'rse kelmey atır. Pu'tkil du'nya Onın' izine erip ketti! – dedi.
20 Bayramda sıyınıw ushın Erusalimge kelgenler arasında bazı grekler de bar edi.
21 Olar Galilanın' Betsayda qalasınan bolg'an Filipke kelip: – Mırza, bizler İysanı ko'riwdi qa'leymiz, – dep o'tinish etti.
22 Filip barıp, bunı Andreyge ayttı. Andrey menen Filip İysag'a barıp xabarladı.
23 İysa olarg'a bılay dep juwap berdi: – Adam Ulının' ullılanatug'ın waqtı keldi.
24 Sizlerge shının, haqıyqatın aytaman: biyday da'ni jerge tu'sip o'lmese, ol jalg'ız qaladı. Al eger o'lse, ko'p zu'ra'a't beredi.
25 O'z janın su'yetug'ın adam onı joytadı. Al bul du'nyada o'z janın jek ko'retug'ın adam onı ma'n'gilik o'mir ushın saqlaydı.
26 Kim de kim Mag'an xızmet etiwdi qa'lese, izime ersin. Men qay jerde bolsam, Menin' xızmetshim de sol jerde boladı. Kim de kim Mag'an xızmet etse, onı A'kem izzet etedi.
27 Endi ju'regim qayg'ıg'a toldı. Men ne deyin? «A'ke, Meni bul waqıttan qutqar», – deyin be? Biraq Men usı waqıt ushın kelgenmen.
28 A'ke, O'z atın'dı ullıla! Sonda aspannan: – Atımdı ullıladım, Men onı ja'ne de ullılayman, – degen saza keldi.
29 Sol jerde turıp, bunı esitken xalıq: «Aspan gu'rkiredi», – dedi. Al basqaları: «Og'an perishte so'yledi», – dedi.
30 İysa olarg'a juwap berip: – Bul saza Men ushın emes, al sizler ushın esitildi.
31 Ha'zir bul du'nyanın' hu'kim etiletug'ın waqtı keldi. Ha'zir bul du'nyanın' ha'kimi quwıp shıg'arıladı.
32 Men jerden joqarıg'a ko'terilgenimde, ha'mme adamlardı O'zime tartaman, – dedi.
33 İysa bunı qanday o'lim menen o'letug'ının bildiriw ushın ayttı.
34 Xalıq Og'an bılay dep juwap berdi: – Bizler Muxaddes Jazıwdan Masixtın' ma'n'gi jasaytug'ının esitkenbiz. Qalay Sen: «Adam Ulı joqarıg'a ko'teriliwi tiyis», – dep atırsan'? Bul Adam Ulı degeni kim?
35 İysa bılay dedi: – Ja'ne az waqıt nur sizler menen birge boladı. Sizlerdi qaran'g'ılıq baspawı ushın, nur bar waqıtta ju'rip qalın'lar. Qaran'g'ılıqta ju'rgen adam qayaqqa baratırg'anın bilmeydi.
36 Sizlerde nur bar waqıtta nurg'a isenin'ler. Sonda nurdın' balaları bolasızlar. İysa usı so'zlerdi aytıp bolıp, olardın' ko'zlerinen tasalandı.
37 İysa olardın' ko'z aldında sonsha ka'ramatlar islese de, olar İysag'a isenbedi.
38 Solay etip, İyshaya payg'ambardın' aytqan mına so'zleri orınlandı: «İyem, bizler aytqan xabarg'a kim isendi? İyemnin' qu'direti kimge ko'rindi?»
39 Sonlıqtan olar isene almadı. Sebebi İyshaya payg'ambar ja'ne bılay degen edi:
40 «Quday olardın' ko'zlerin soqır etti Ha'm ju'reklerin tas qıldı. Ko'zleri menen ko'rmeydi, Ju'rekleri menen tu'sinbeydi. Men olarg'a shıpa beriwim ushın, Mag'an qaytıp kelmeydi».
41 İyshaya İysanın' ullılıg'ın ko'rgenlikten, Ol haqqında so'ylep, usı so'zlerdi aytqan edi.
42 Sog'an qaramastan, basshılar arasında da ko'bisi İysag'a isendi. Biraq pariseylerden qorqıp, ma'jilisxanadan quwılmawı ushın, isenimlerin ashıq moyınlamadı.
43 O'ytkeni olar Qudaydın' maqtawınan go're, adamnın' maqtawın ko'birek jaqsı ko'rdi.
44 Sonda İysa ba'lent dawıs penen bılay dedi: – Mag'an isengen adam Meni Jibergen Qudayg'a isengen boladı.
45 Ja'ne de, Meni ko'rgen adam Meni Jibergen Qudaydı ko'rgen boladı.
46 Mag'an isengen ha'r bir adam qaran'g'ılıqta qalmawı ushın, Men du'nyag'a nur bolıp keldim.
47 Kim de kim Menin' so'zlerimdi esitse de, biraq olardı orınlamasa, Men onı hu'kim etpeymen. Sebebi Men du'nyanı hu'kim etiw ushın emes, al onı qutqarıw ushın keldim.
48 Meni ta'n almay, so'zlerimdi qabıllamag'an adamnın' hu'kim etiwshisi bar. Menin' so'ylegen so'zim aqırg'ı ku'ni onı hu'kim etedi.
49 O'ytkeni Men O'zligimnen so'ylegen joqpan. Al Meni jibergen A'kemnin' O'zi ne aytıwımdı ha'm qalay so'ylewimdi Mag'an buyırdı.
50 Onın' buyrıg'ının' ma'n'gilik o'mir ekenin bilemen. Sonlıqtan Men ne aytsam da, A'kemnin' Mag'an aytqanın aytıp atırman.
