Yuxan 19 bob
1 Sonda Pilat İysanı uslap, qamshılawdı buyırdı.
2 A'skerler tikenli shıbıqlardan taj o'rip, İysanın' basına saldı. Son'ınan Og'an shım qızıl shapan kiygizdi.
3 Aldına kelip: – Jasasın, Yahudiylerdin' Patshası! – dep ju'zine shapalaq penen urdı.
4 Pilat ja'ne sırtqa shıg'ıp, yahudiylerge: – Mine, menin' Onnan hesh bir ayıp tappag'anımdı sizlerdi bilsin dep, Onı sizlerdin' aldın'ızg'a shıg'arıp atırman, – dedi.
5 Sonda basında tikenli tajı, u'stinde shım qızıl shapanı bar İysa sırtqa shıqtı. Pilat olarg'a: – Mine, bul Adam! – dedi.
6 Bas ruwxaniyler menen olardın' saqshıları İysanı ko'rgende: – Onı atanaq ag'ashqa shegele, shegele! – dep baqırıstı. Pilat olarg'a: – Onı sizler alıp ketip, atanaq ag'ashqa shegelen'ler. O'ytkeni men Onnan hesh qanday ayıp tappay atırman, – dedi.
7 Yahudiy basshıları og'an juwap berip: – Bizlerde nızam bar ha'm sol nızam boyınsha, Ol o'liwi sha'rt. Sebebi Ol O'zin Qudaydın' Ulı dep atadı, – dedi.
8 Pilat bul so'zlerdi esitkende, burıng'ıdan beter qorqıp ketti.
9 Qaytadan ha'kimxanag'a kirip, İysadan: – Sen qay jerdensen'? – dep soradı. Biraq İysa og'an juwap bermedi.
10 Pilat Og'an: – Menin' menen so'ylespeyjaqsan' ba? Seni azat qılıwg'a da, atanaq ag'ashqa shegeletiwge de biyligim bar ekenin bilmeysen' be? – dedi.
11 İysa juwap berip: – Sag'an Qudaydan berilmegende, sende Menin' u'stimnen hesh qanday biylik bolmas edi. Sonlıqtan Meni sag'an uslap bergennin' gu'nası senin' gu'nan'nan awırıraq, – dedi.
12 Sol waqıttan baslap, Pilat İysanı azat etiwge tırıstı. Biraq yahudiy basshıları: – Bul Adamdı azat qılsan', Rim patshası-Qaysardın' dostı emessen'. O'zin patsha dep ataytug'ın ha'r bir adam Qaysarg'a qarsı boladı, – dep baqırıstı.
13 Pilat bul so'zlerdi esitkende, İysanı sırtqa shıg'ardı ha'm «Tas maydansha», evreyshe Gabbata dep atalg'an jerdegi hu'kim gu'rsisine otırdı.
14 Tayarlıq ku'ni, Qutqarılıw bayramınan bir ku'n burın saat on ekiler shamasında Pilat yahudiylerge: – Mine, sizlerdin' Patshan'ız! – dedi.
15 Biraq olar baqırısıp: – Joq qıl Onı! Joq qıl, atanaq ag'ashqa shegele! – dedi. Pilat olarg'a: – Sizlerdin' Patshan'ızdı atanaq ag'ashqa shegeleyin be? – dedi. – Bizlerdin' Qaysardan basqa patshamız joq, – dep juwap berdi bas ruwxaniyler.
16 Solay etip, Pilat İysanı atanaq ag'ashqa shegelew ushın a'skerlerge tapsırdı.A'skerler İysanı alıp ketti.
17 İysa O'z atanaq ag'ashın arqalap, «Bas su'yek ornı», evreyshe Golgota dep atalg'an jerge keldi.
18 Sol jerde İysanı ha'm Onın' menen birge eki adamdı atanaq ag'ashqa shegeledi. Olardın' birewi on' ta'repte, ekinshisi sol ta'repte, al İysa ortada edi.
19 Pilat jazıw jazdırıp, onı atanaq ag'ashtın' u'stine ildirtti. Onda: «NASIRALI İYSA – YAHUDİYLERDİN' PATSHASI», – dep jazılg'an edi.
20 Yahudiylerdin' ko'bisi bul jazıwdı oqıdı. O'ytkeni İysa atanaq ag'ashqa shegelengen jer qalag'a jaqın edi ha'm bul jazıw evreyshe, latınsha ha'm grekshe jazılg'an edi.
21 Yahudiylerdin' bas ruwxaniyleri Pilatqa bılay dedi: – «Yahudiylerdin' Patshası» dep jazba, «Onın' O'zi: Men – Yahudiylerdin' Patshasıman, dedi», – dep jaz.
22 – Ne jazajaq bolsam jazdım, – dep juwap berdi Pilat.
23 A'skerler İysanı atanaq ag'ashqa shegelegennen son', Onın' sırtqı kiyimin aldı ha'm onı to'rt bo'lekke bo'lip, ha'r qaysısı bir bo'lekten aldı. Ko'ylegin de aldı. Ol tigilmegen bolıp, bastan-ayaq bir pu'tin toqıma edi.
24 Sonlıqtan a'skerler bir-birine: – Bunı jırtpayıq, shek taslayıq, kimge tu'sse, sol alsın, – dedi. Bul Muxaddes Jazıwdag'ı mına so'zlerdin' orınlanıwı ushın boldı: «Sırtqı kiyimimdi o'z ara bo'listi, Ko'ylegim ushın shek tasladı». A'skerler usı aytılg'andı isledi.
25 İysanın' atanaq ag'ashının' qasında Onın' anası, anasının' apası, Klopanın' hayalı Ma'riyam ha'm magdalalı Ma'riyam turg'an edi.
26 İysa anasın ha'm onın' janında turg'an O'zinin' su'yikli sha'kirtin ko'rgende, anasına: – Apa, mine, senin' ulın', – dedi.
27 Keyin sha'kirtine: – Mine, bul senin' anan', – dedi. Sol waqıttan baslap, sol sha'kirt onı o'z u'yine aldı.
28 Sonnan son', İysa ha'mmesinin' tamamlang'anın bilip, Muxaddes Jazıw orınlanıwı ushın: – Sho'llep turman! – dedi.
29 Sol jerde ashshı sharapqa tolı bir gu'ze tur edi. A'skerler sorg'ıshtı og'an sin'dirip alıp, issoptın' shıbıg'ına qadadı da, İysanın' awzına tuttı.
30 İysa onı tatıp ko'rip: – Orınlandı, – dedi de, basın iyip, jan tapsırdı.
31 Bul tayarlıq ku'ni edi. Erten'gi ku'n Qutqarılıw bayramına tuwra keletug'ın ayrıqsha dem alıs ku'ni bolg'anlıqtan, yahudiy basshıları denelerdi atanaq ag'ashta qaldırıwdı qa'lemedi. Olar Pilattan shegelengenlerdin' ayaqların sındırıp, denelerdi alıp taslawdı soradı.
32 Sonda a'skerler barıp, İysa menen atanaq ag'ashqa shegelengenlerdin' da'slep birinshisinin', son'ınan ekinshisinin' ayaqların sındırıp tasladı.
33 Biraq İysanın' qasına kelgende, Onın' a'lle qashan jan tapsırg'anın ko'rip, ayaqların sındırmadı.
34 Bunın' ornına, a'skerlerdin' biri Onın' bu'yirin nayza menen testi. Sol waqıtta-aq qan menen suw ag'ıp shıqtı.
35 Bunı ko'rgen adamnın' gu'walıg'ı haqıyqat. Ol o'zinin' haqıyqatlıqtı aytıp atırg'anın biledi. Sizler de iseniwin'iz ushın ol gu'walıq berdi.
36 Bulardın' ha'mmesi: «Onın' hesh bir su'yegi sınbaydı», – degen Muxaddes Jazıwdag'ı so'zlerdin' orınlanıwı ushın boldı.
37 Muxaddes Jazıwdın' basqa bir jerinde: «O'zleri nayza menen tesken Adamg'a qaraydı», – delingen.
38 Bunnan son', arimatiyalı Yusup İysanın' denesin alıp ketiw ushın Pilattan ruxsat soradı. Yusup İysanın' sha'kirti edi. Biraq ol yahudiy basshılarınan qorqqanlıqtan, bunı jasırıp ju'rgen edi. Pilat ruxsat bergennen son', Yusup barıp, İysanın' denesin alıp ketti.
39 Burın tu'nde İysag'a kelgen Nikodim de ju'z qadaqqa jaqın mirra menen aloe aralaspasın alıp keldi.
40 Olar İysanın' denesin alıp, yahudiylerdin' jerlew da'stu'ri boyınsha, Onı xosh iyisli zatlar menen kepinlikke oradı.
41 İysa atanaq ag'ashqa shegelengen jerde bir bag' bolıp, bul bag'dın' ishinde ele hesh kim qoyılmag'an bir jan'a qa'bir bar edi.
42 Bul ku'n yahudiylerdin' tayarlıq ku'ni bolg'anlıqtan, qa'bir jaqın jaylasqanı sebepli, olar İysanı sol jerge qoydı.
