Yuxan 21 bob
1 Bunnan son', İysa Tiberiya ten'izinin' jag'asında sha'kirtlerine ja'ne ko'rindi. Bul bılay boldı:
2 Simon Petr, Egiz dep atalg'an Tomas, Galilanın' Kana qalasınan bolg'an Nataniel, Zebedeydin' ulları ha'm İysanın' sha'kirtlerinen ja'ne ekewi birge edi.
3 Simon Petr olarg'a: – Men balıq awlawg'a ketip baratırman, – dedi. – Bizler de senin' menen birge baramız, – dedi olar. Olar barıp, qayıqqa mindi. Biraq sol tu'ni hesh na'rse tuta almadı.
4 Tan' atqanda, ten'izdin' jag'asında İysa turg'an edi. Biraq sha'kirtleri Onın' İysa ekenin bilmedi.
5 İysa olardan: – Ha'y, doslar, balıg'ın'ız joq pa? – dep soradı. – Joq, – dep juwap berdi olar.
6 – Awın'ızdı qayıqtın' on' jag'ına salın'lar, sonda tutasızlar, – dedi İysa. Olar aw salıp, ko'p balıq tutqanlıqtan, awdı tartıp shıg'ara almadı.
7 İysanın' su'yikli sha'kirti Petrge: – Bul İyemiz! – dedi. «Bul İyemiz» degendi esitkennen, Simon Petr jalan'ash bolg'anlıqtan kiyimin kiyip, o'zin ten'izge attı.
8 Al basqa sha'kirtler balıq tolı awdı su'yrep, qayıq penen keldi. O'ytkeni olar jag'adan shama menen tek ju'z metr uzaqlıqta edi.
9 Olar jag'ag'a shıqqanda, ol jerde jag'ılıp atırg'an ko'mirdi ha'm qozdın' u'stine qoyılg'an balıq penen nandı ko'rdi.
10 İysa olarg'a: – Ha'zir tutqan balıqların'ızdan alıp kelin'ler, – dedi.
11 Simon Petr qayıqqa minip, balıqqa tolı awdı jag'ag'a tartıp shıg'ardı. Awda bir ju'z eliw u'sh iri balıq bar edi. Balıqlar sonshelli ko'p bolsa da, aw jırtılmadı.
12 İysa olarg'a: – Kelin'ler, azang'ı awqattı jen'ler, – dedi. Sha'kirtlerinin' hesh qaysısı Onnan: «Sen kimsen'?» – dep sorawg'a batına almadı. Sebebi Onın' İyemiz ekenin biletug'ın edi.
13 İysa jaqınıraq keldi de, nandı alıp, olarg'a berdi. Balıqlar menen de usılay isledi.
14 Solay etip, bul İysanın' o'limnen tirilgeninen son', sha'kirtlerine u'shinshi ma'rte ko'riniwi edi.
15 Azang'ı awqattı jep bolg'annan son', İysa Simon Petrden: – Yunus ulı Simon, Meni olardan da ko'birek su'yesen' be? – dep soradı. – Awa, İyem. Seni jaqsı ko'retug'ınımdı bilesen'-g'o, – dedi Og'an Petr. İysa og'an: – Qozılarımdı otlat, – dedi.
16 İysa ekinshi ma'rte onnan: – Yunus ulı Simon, Meni su'yesen' be? – dep soradı. Petr Og'an: – Awa, İyem. Seni jaqsı ko'retug'ınımdı bilesen'-g'o, – dedi. İysa og'an: – Qoylarımdı baq, – dedi.
17 U'shinshi ma'rte İysa onnan: – Yunus ulı Simon, Meni jaqsı ko'resen' be? – dep soradı. Petr Onın' o'zinen u'sh ma'rte: «Meni jaqsı ko'resen' be?» – dep sorag'anına qapa boldı. – İyem, Sen ha'mmesin bilesen', Seni su'yetug'ınımdı da bilesen', – dedi Petr. İysa og'an bılay dedi: – Qozılarımdı otlat.
18 Sag'an shının, haqıyqatın aytaman: jas waqtın'da belbewin'di o'zin' baylap, qa'legen jerin'e baratug'ın edin'. Biraq qartayg'anın'da qolların'dı sozıp turasan' ha'm basqa birew belbewin'di baylap, seni qa'lemegen jerin'e alıp baradı.
19 İysa bunı Petrdin' qanday o'lim menen Qudaydı ullılaytug'ının bildiriw ushın aytqan edi. Usını aytıp bolıp: – İzime er, – dedi.
20 Petr artına burılıp, İysanın' su'yikli sha'kirtinin' izlerine erip kiyatırg'anın ko'rdi. Bul – keshki awqat waqtında İysanın' ko'kiregine su'yenip jatıp: «İyem, Sag'an kim satqınlıq isleydi?» – dep sorag'an sha'kirt edi.
21 Petr onı ko'rip, İysadan: – İyem, og'an ne boladı? – dep soradı.
22 İysa og'an: – Men kelemen degenshe, onın' jasawın qa'lesem, sag'an ne? Sen Menin' izime er, – dedi.
23 Solay etip, tuwısqanlar arasında: «Bul sha'kirt o'lmeydi», – degen so'z tarqaldı. Biraq İysa Petrge: «Ol o'lmeydi», – degen joq. Al: «Men kelemen degenshe, onın' jasawın qa'lesem, sag'an ne?» – degen edi.
24 Bulardın' ha'mmesi haqqında gu'walıq berip, usılardı jazg'an sol sha'kirt. Bizler onın' gu'walıg'ının' haqıyqat ekenin bilemiz.
25 İysa islegen basqa da ko'p isler bar. Eger olar birme-bir jazılg'anda, jazılg'an kitaplar du'nyag'a sıymas edi, dep oylayman.
