Yuxan 4 bob
1 Pariseyler İysanın' Yaqıyag'a qarag'anda ko'p sha'kirt arttırıp,olardı shomıldırıp ju'rgenin esitti.
2 Haqıyqatında İysanın' O'zi emes, al sha'kirtleri shomıldıratug'ın edi.
3 İyemiz İysa bunı bilgende Yahudiyadan shıg'ıp, ja'ne Galilag'a ketti.
4 Baratırıp, Samariya arqalı o'tiwi kerek edi.
5 Solay etip, Ol Samariyanın' Sixar dep atalg'an qalasına keldi. Bul qala Yaqıptın' o'z balası Yusupke bergen jerine jaqın edi.
6 Sol jerde Yaqıptın' qudıg'ı da bar edi. İysa jol ju'rip sharshag'anlıqtan, qudıqtın' qasında otırdı. Saat on ekiler shamasında edi.
7 Sol waqıtta samariyalı bir hayal suw alıwg'a keldi. İysa og'an: – Mag'an ishiwge suw ber, – dedi.
8 Al İysanın' sha'kirtleri azıq-awqat satıp alıw ushın qalag'a ketken edi.
9 Samariyalı hayal: – Sen yahudiysen', al men samariyalı hayalman. Qalay mennen suw sorap tursan'? – dedi.
10 İysa hayalg'a: – Eger sen Qudaydın' sıyın ha'm «Mag'an ishiwge suw ber», – dep aytıp turg'annın' kim ekenin bilgenin'de, senin' o'zin' Onnan sorar edin', Ol sag'an tiri suw berer edi, – dep juwap berdi.
11 – Mırza! Sende suw alatug'ın hesh na'rse joq-g'o, qudıq bolsa teren'. Sen tiri suwdı qayaqtan alasan'?
12 Sen bul qudıqtı bizlerge bergen, o'zi de, balaları da, malları da onnan suw ishken, babamız Yaqıptan ullımısan'? – dedi hayal.
13 İysa hayalg'a bılay dep juwap berdi: – Bul suwdan ishken ha'r bir adam ja'ne sho'lleydi.
14 Biraq Men beretug'ın suwdan ishken ha'r bir adam ma'n'gige sho'llemeydi. Kerisinshe, Men beretug'ın suw onın' ishinde ma'n'gilik o'mir beretug'ın tiri bulaqqa aylanadı.
15 Hayal İysag'a: – Mırza, endi sho'llemewim ushın ha'm suw alıwg'a bul jerge kelmewim ushın, usı suwdan mag'an ber, – dedi.
16 – Barıp, ku'yewin'di bul jerge shaqırıp kel, – dedi İysa.
17 Hayal Og'an: – Menin' ku'yewim joq, – dep juwap berdi. – Ku'yewim joq dep, sen durıs ayttın'.
18 Senin' bes ku'yewin' boldı. Ha'zir birge jasap atırg'an adamın' da ku'yewin' emes. Bunı sen durıs ayttın', – dedi İysa.
19 Hayal Og'an: – Mırza, Senin' payg'ambar ekenin'e ko'zim jetip tur.
20 Atababalarımız bul tawda sıyındı, biraq sizler: «Sıyınıwg'a tiyisli jer Erusalimde», – deysizler, – dedi.
21 İysa og'an bılay dedi: – Hayal, Mag'an isen, Quday A'kege bul tawda da, Erusalimde de sıyınbaytug'ın waqıt kiyatır.
22 Sizler bilmeytug'ının'ızg'a sıyınasızlar, al bizler biletug'ınımızg'a sıyınamız. Sebebi qutqarılıw yahudiylerden.
23 Biraq, haqıyqıy sıyınıwshılardın' Quday A'kege ruwx ha'm haqıyqatlıq penen sıyınatug'ın waqtı keledi. A'ne, sol waqıt ha'zir keldi. Quday A'ke de O'zine usılay sıyınatug'ınlardı izlep atır.
24 Quday – Ruwx, Og'an sıyınatug'ınlar da ruwx ha'm haqıyqatlıq penen sıyınıwı tiyis.
25 Hayal İysag'a: – Qutqarıwshı Masixtın' keletug'ının bilemen. Ol kelgende, bizlerge ha'mmesin bildiredi, – dedi.
26 İysa og'an: – Senin' menen so'ylesip turg'an Men – Solman, – dedi.
27 Sol waqıtta İysanın' sha'kirtleri keldi ha'm Onın' bir hayal menen so'ylesip turg'anın ko'rip, hayran qalıstı. Biraq olardın' hesh qaysısı: «Sen onnan ne sorap tursan'?» yamasa «Onın' menen nege so'ylesip tursan'?» – dep soramadı.
28 Sonda hayal gu'zesin qaldırıp, qalag'a ketti ha'm adamlarg'a:
29 – Kelin'ler, mag'an islegen islerimnin' ha'mmesin aytıp bergen Adamdı ko'rin'ler. Ol Masix emes pe eken? – dedi.
30 Adamlar qaladan shıg'ıp, İysag'a qaray ju'rdi.
31 Sonın' arasında sha'kirtleri İysadan o'tinip: – Ustaz, awqat je! – dedi.
32 Biraq İysa olarg'a: – Mende sizler bilmeytug'ın awqat bar, – dedi.
33 Sha'kirtler bir-birine: – Mu'mkin, birew Og'an awqat a'kelgen shıg'ar? – desti.
34 Biraq İysa olarg'a bılay dedi: – Menin' awqatım – Meni Jibergennin' erkin orınlaw ha'm Onın' isin tamamlaw.
35 Sizler: «Jıyın-terimge ele to'rt ay bar», – dep aytpaysızlar ma? Biraq, sizlerge aytatug'ınım: ko'zlerin'izdi ashıp, eginlikke qaran'lar. Olar pisip jetilisip, jıyın-terimge tayar tur.
36 Oraqshı o'z haqın aladı ha'm ma'n'gilik o'mir ushın zu'ra'a't jıynaydı. Solay etip, ekken de, org'an da birge quwanadı.
37 «Birewi egedi, basqası oradı», – degen naqıl usıg'an tuwrı keledi.
38 Men sizlerdi o'zlerin'iz miynet etpegen zu'ra'a'tti orıwg'a jiberdim. Basqalar miynet etken edi, al sizler olardın' miynetinin' zu'ra'a'tin aldın'lar.
39 «Ol mag'an islegen islerimnin' ha'mmesin aytıp berdi», – degen hayaldın' gu'walıg'ı sebepli, sol qaladag'ı samariyalılardın' ko'bisi İysag'a isendi.
40 Sonlıqtan samariyalılar İysag'a kelip, o'zleri menen qalıwdı o'tindi. Ol sol jerde eki ku'n qaldı.
41 İysanın' so'zin esitip, ja'ne de ko'birek adamlar isendi.
42 Olar hayalg'a: – Bizler endi senin' so'zlerin' sebepli emes, al Onın' so'zlerin o'zlerimiz esitip, Onın' haqıyqattan da du'nyanın' Qutqarıwshısı ekenin bilip, isenemiz, – desti.
43 Eki ku'n o'tkennen son', İysa sol jerden shıg'ıp, Galilag'a ketti.
44 İysanın' O'zi: «Payg'ambar o'z watanında qa'dirsiz», – dep aytqan edi.
45 Ol Galilag'a kelgende, galilalılar Onı jıllı ju'zlik penen qabıl aldı. O'ytkeni olar da Erusalimdegi Qutqarılıw bayramına barıp, İysanın' sol jerde islegen barlıq islerin ko'rgen edi.
46 İysa ja'ne O'zi suwdı sharapqa aylandırg'an Galilanın' Kana qalasına keldi. Sol jerde patshanın' bir xızmetkeri bolıp, onın' ulı Kaparnahumda awırıp atırg'an edi.
47 Ol İysanın' Yahudiyadan Galilag'a kelgenin esitip, Og'an bardı. Kelip, o'lim to'seginde jatırg'an ulına shıpa beriwdi İysadan o'tindi.
48 İysa og'an: – Sizler ka'ramatlı belgilerdi ha'm tan' qalarlıq na'rselerdi ko'rmegenshe isenbeysizler, a'! – dedi.
49 Patsha xızmetkeri İysag'a: – Mırza, ulım o'lip qalmastan burın kele go'r! – dedi.
50 İysa og'an: – Bar, ulın' jasaydı, – dedi. Ol adam İysanın' so'zine isenip, ketti.
51 Jolda kiyatırg'anda onı xızmetshileri qarsı alıp, og'an balasının' tiri qalg'anın ayttı.
52 Ol xızmetshilerinen balasının' awhalının' saat neshede jen'illeskenin sorag'anda, olar:
53 Sonda balanın' a'kesi bunın': «Ulın' jasaydı», – dep İysa aytqan waqıtta bolg'anın bilip, onın' o'zi ha'm shan'arag'ındag'ılardın' ha'mmesi isendi.
54 Bul – İysanın' Yahudiyadan Galilag'a kelgennen son' islegen ekinshi ka'ramatı edi.
