Elshiler 16 bob
1 Pavel Derbege, son'ınan Listrag'a keldi. Sol jerde anası iseniwshi yahudiy, al a'kesi grek bolg'an Timofey atlı sha'kirt bar edi.
2 Listra ha'm İkoniyadag'ı tuwısqanlar ol haqqında jaqsı pikirde edi.
3 Timofeydi o'zi menen birge alıp ju'riwdi qa'legen Pavel sol jerdegi yahudiyler sebepli, onı su'nnet ettirdi. O'ytkeni ha'mme Timofeydin' a'kesinin' grek ekenin biletug'ın edi.
4 Olar qaladan-qalag'a o'tip, Erusalimdegi elshiler menen aqsaqallar belgilegen qag'ıydalardı iseniwshilerge orınlaw ushın tapsırdı.
5 Solay etip, iseniwshi ja'ma'a'tlerdin' isenimi bekkemlenip, sanı ku'nnen-ku'nge arta berdi.
6 Qudaydın' so'zin Aziya u'lkesinde jayıwg'a Muxaddes Ruwx tıyım salg'anlıqtan, Pavel menen onın' joldasları Frikiya ha'm Galatiya u'lkelerin aralap ju'rdi
7 Olar Misiyanın' shegarasına kelgende, Bitiniyag'a kirmekshi boldı, biraq İysanın' Ruwxı olarg'a ruxsat bermedi.
8 Sonlıqtan olar Misiyadan o'tip, Troas qalasına keldi.
9 Sol ku'ni tu'nde Pavel ayan ko'rdi. Makedoniyalı bir adam onın' aldında turıp: «Makedoniyag'a kelip, bizlerge ja'rdem ber», – dep o'tindi.
10 Pavel bul ayandı ko'rgennen son', bizler da'rriw Makedoniyag'a barıwdın' ha'reketin isledik. Sebebi Quday bizlerdi olarg'a Xosh Xabardı ja'riyalawg'a shaqırıp atır, degen juwmaqqa keldik.
11 Bizler Troastan keme menen shıg'ıp, tuwrı Samotrakiyag'a, erten'ine Neapoliske ju'zip bardıq.
12 Ol jerden Makedoniya u'lkesinin' en' baslı qalası, Rimnin' qol astında bolg'an Filipke jetip keldik. Bul qalada bir neshe ku'n qaldıq.
13 Bizler bul jerde yahudiyler duwa etetug'ın orın bar dep oylap, dem alıs ku'ni qala da'rwazasınan sırtqa, da'ryanın' jag'asına shıqtıq. Bizler otırıp, sol jerge jıynalg'an hayallarg'a so'yley basladıq.
14 Tın'lawshılar arasında Tiatira qalasınan kelgen, qımbat bahalı gezlemelerdi satıwshı Lidiya atlı bir hayal bar edi. Ol Qudayg'a sıyınatug'ın edi. Paveldin' so'zlerine qulaq salıwı ushın, İyemiz onın' kewlin ashtı.
15 Lidiya u'y-ishi menen birge suwg'a shomıldırılg'annan son', bizlerdi u'yine mira't etip: «Meni İyemizge isenedi, dep esaplaytug'ın bolsan'lar, kelin'ler, u'yimde bolın'lar», – dep bizlerdi ko'ndirdi.
16 Bir ku'ni bizler duwa etetug'ın jerge baratırg'anımızda, palkerlik penen shug'ıllanatug'ın jawız ruwxlı bir shorıg'a duslastıq. Bul qız palkerlik penen xojayınlarına ko'p payda keltiretug'ın edi.
17 Ol Pavel menen bizlerdin' izimizge tu'sip: – Bul adamlar – Qu'diretli Qudaydın' xızmetshileri, olar sizlerge qutqarılıw jolın ja'riyalap atır! – dep baqırıp ju'rdi.
18 Bul ko'p ku'n ta'kirarlandı. Aqırında Paveldin' janına tiyip, ol arqasına burıldı da, qızdın' ishindegi jawız ruwxqa: – İysa Masix atı menen buyıraman: onnan shıg'ıp ket! – dedi. Jawız ruwx qızdın' ishinen da'rhal shıg'ıp ketti.
19 Shorının' xojayınları payda ko'riwden u'mitlerinin' u'zilgenin bilip, Pavel menen Silanı uslap aldı da, bazar maydanındag'ı basshılarg'a su'yrep apardı.
20 Olardı Rim ha'kimlerinin' aldında turg'ızıp: – Mına yahudiyler qalamızdı astan-kesten etpekte.
21 Biz rimlilerge qabıl etiwge de, orınlawg'a da bolmaytug'ın u'rp-a'detlerdi ja'riyalap ju'r, – desti.
22 Xalıq ta olarg'a qosılıp, elshilerge qarsı shıqtı. Ha'kimler Pavel menen Silanın' kiyimlerin jırtıp sheshtirdi de, tayaq penen sabawg'a buyrıq berdi.
23 Olardı ko'p sabatqannan son', qamaqqa saldırdı ha'm qamaqxana xızmetkerine olardı jaqsılap qarawıllawdı buyırdı.
24 Usınday buyrıq alg'an qamaqxana xızmetkeri olardı qamaqxananın' ishki bo'lmesine qamap, ayaqların bug'aw menen qısıp tasladı.
25 Tu'nnin' ortalarında Pavel menen Sila duwa etip, Qudaydı alg'ıslaytug'ın qosıq aytıp otırg'an edi. Basqa tutqınlar da olardı tın'ladı.
26 Birden jer qattı qozg'alıp, qamaqxananın' tırnag'ı silkindi ha'm sol waqıtta-aq barlıq qapılar ashılıp, ha'mmenin' shınjırları sheshilip ketti.
27 Uyqıdan oyang'an qamaqxana xızmetkeri qamaqxananın' qapılarının' ashıq ekenin ko'rdi. Tutqınlar qashıp ketti, dep oylag'an ol o'zin o'ltirmekshi bolıp, qılıshın suwırıp aldı.
28 Biraq Pavel ba'lent dawıs penen baqırıp: – O'z janın'a qastıyanlıq etpe, ha'mmemiz usı jerdemiz, – dedi.
29 Qamaqxana xızmetkeri shıra a'keldirip, ishke juwırıp kirdi de, qaltırap, Pavel menen Silanın' aldına jıg'ıldı.
30 lardı sırtqa shıg'arıp: – Mırzalar, qutqarılıwım ushın ne islewim kerek? – dep soradı.
31 Olar: – İyemiz İysag'a isen, sonda sen de, u'y-ishin' de qutqarılasız, – dedi.
32 Son'ınan olar onın' o'zine ha'm u'yindegilerdin' ha'mmesine İyemizdin' so'zin ayttı.
33 Qamaqxana xızmetkeri tu'nnin' sol sa'tinde olardı alıp ketip, jaraqatların juwdı da, da'rriw o'zi ha'm pu'tkil u'y-ishi suwg'a shomıldırıldı.
34 Ol Pavel menen Silanı u'yine a'kelip, aldılarına dasturxan jaydı. Qudayg'a isengenine pu'tkil u'y-ishi menen quwandı.
35 Tan' atqanda, ha'kimler: «Sol adamlardı bosatın'lar», – degen buyrıq penen saqshılardı jolladı.
36 Qamaqxana xızmetkeri bul so'zlerdi Pavelge xabarlap: – Ha'kimler sizlerdi bosatıw ushın adam jollaptı. Endi shıg'ıp, amanesen kete berin'ler, – dedi.
37 Biraq Pavel saqshılarg'a bılay dedi: – Rim puqaraları bolg'an bizlerdi xalıq aldında hu'kimsiz sabap, qamaqqa saldı. Endi bizlerdi jasırın quwıp jibermekshi me? Bul bolmaydı! Bizlerdi o'zleri kelip shıg'arsın!
38 Saqshılar bul so'zlerdi ha'kimlerge jetkizip bardı. Ha'kimler Pavel menen Silanın' Rim puqaraları ekenin esitkende qorqıp ketti.
39 Kelip, keshirim soradı. Son'ınan olardı sırtqa shıg'arıp, qaladan ketiwlerin o'tindi.
40 Pavel menen Sila qamaqtan shıg'ıp, Lidiyanın' u'yine bardı. Sol jerde tuwısqanlardı ko'rip, olardı jigerlendirgennen son', jolg'a shıqtı.
