Elshiler 21 bob
1 Olar menen xoshlasqanımızdan keyin, keme menen ju'zip, tuwrı Kos atawına kettik. Erten'ine Rodos atawına, ol jerden Patara qalasına keldik.
2 Sol jerden Fenikiyag'a baratug'ın kemeni tawıp mindik te, ju'zip kettik.
3 Kipr ko'ringende, onın' qubla ta'repinen o'tip, Siriyag'a qaray jol aldıq. Keme Tir qalasında ju'gin tu'siriw kerek bolg'anlıqtan, sol jerde toqtadıq.
4 Ol jerde sha'kirtlerdi izlep tawıp, olar menen birge jeti ku'n qaldıq. Sha'kirtler Muxaddes Ruwxtın' bildiriwi menen, Pavelden Erusalimge barmawdı o'tindi.
5 Biraq ketetug'ın waqtımız bolg'anda shıg'ıp, jolımızdı dawam ettik. Ha'mme iseniwshiler hayal ha'm balashag'aları menen birge bizlerdi qalanın' sırtına deyin shıg'arıp saldı. Ten'izdin' jag'asında dize bu'gip, duwa ettik.
6 Bir-birimiz benen xoshlasqanımızdan son', kemege mindik. Al olar u'ylerine qayttı.
7 Tirden jolımızdı dawam etip, Ptolemayda qalasına keldik. Ol jerdegi tuwısqanlarımız benen ko'risip, olardın' janında bir ku'n qaldıq.
8 Erten'ine shıg'ıp, Kesariyag'a keldik. Saylang'an jeti xızmetshinin' biri bolg'an, Xosh Xabar ja'riyalawshı Filiptin' u'yine barıp, onın' menen qaldıq.
9 Bul adamnın' payg'ambarshılıq etetug'ın, turmısqa shıqpag'an to'rt qızı bar edi.
10 Sol jerde bir talay ku'n bolg'anımızdan son', Yahudiyadan Agabus atlı bir payg'ambar keldi.
11 Ol bizlerge kelip, Paveldin' belbewin aldı da, onın' menen o'zinin' ayaq-qolların baylap: – Muxaddes Ruwx bılay deydi: «Yahudiyler bul belbewdin' iyesin Erusalimde usılay etip baylap, basqa millet adamlarına uslap beredi», – dedi.
12 Bul so'zlerdi esitip, bizler ha'm sol jerdegi adamlar Pavelden Erusalimge barmawın o'tindik.
13 Sonda Pavel bılay dep juwap berdi: – Ne islep atırsızlar? Nege jılasıp, ju'regimdi ezip atırsızlar? Men İyemiz İysanın' atı ushın Erusalimde tek ayaq-qolımdı baylatıwg'a emes, al o'liwge de tayarman.
14 Paveldi ko'ndire almag'anlıqtan: «İyemizdin' qa'legeni bolsın», – dep qaytıp u'ndemedik.
15 Sol ku'nlerden son' jolg'a tayarlanıp, Erusalimge keldik.
16 Kesariyadag'ı sha'kirtlerdin' ayırımları da bizler menen birge keldi. Olar bizlerdi jasap turıw ushın da'slepki sha'kirtlerdin' biri bolg'an, kiprlı Minasonnın' u'yine alıp bardı. Bizler sol u'yde boldıq.
17 Erusalimge kelgenimizde, tuwısqanlarımız bizlerdi quwanıshlı tu'rde qarsı aldı.
18 Erten'ine bizler Pavel menen birge Yaqıptı ko'riwge bardıq. Aqsaqallardın' ha'mmesi de sol jerge jıynalg'an edi.
19 Pavel olardan halawhal sorag'annan keyin, o'z xızmeti arqalı Qudaydın' basqa milletler arasında islegen islerin birim-birim aytıp berdi.
20 Olar bunı esitip, Qudaydı alg'ısladı da, Pavelge bılay dedi: – Tuwısqanımız Pavel! O'zin' ko'rip tursan', yahudiyler arasında İyemizge iseniwshi ko'p mın'lag'an adamlar bar. Olardın' ha'mmesi Muxaddes Nızamg'a ju'da' intalı.
21 Olardın' alg'an xabarına qarag'anda, sen basqa milletler arasında jasaytug'ın barlıq yahudiylerge balaların su'nnet etpewlerin ha'm u'rp-a'detlerimizdi orınlamawın aytıp, Muwsanın' Nızamınan bas tartıw kerekligin u'yretip ju'rgen ekensen'.
22 Endi ne qılıw kerek? Olar, a'lbette, senin' usı jerge kelgenin'di esitedi.
23 Sonlıqtan mına aytqanımızdı isle. Aramızda Quday aldında ant ishken to'rt adam bar.
24 Olardı janın'a alıp, tazalanıw ra'siminen o't. Olar shashların aldırıwı ushın, kerekli qurbanlıqtın' qunın sen to'le. Solay etip, ha'mme adam sen haqqında esitkenlerinin' tiykarsız ekenin ha'm senin' Muxaddes Nızam boyınsha jasap atırg'anın'dı bilsin.
25 Al basqa millet iseniwshilerine kelsek, bizler olarg'a butlarg'a soyılg'an qurbanlıqtın' go'shinen, qannan, buwındırılıp o'ltirilgen haywanlardın' go'shinen ha'm buzıqshılıqtan awlaq bolıwları tuwralı qararımızdı jazıp jibergen edik.
26 Kelesi ku'ni Pavel janına sol to'rt adamdı alıp, olar menen birge tazalanıw ra'siminen o'tti. Son'ınan tazalanıw ku'nlerinin' qashan tamam bolatug'ının ha'm ha'r biri ushın qashan qurbanlıq shalınatug'ının bildiriw ushın, İbadatxanag'a kirdi.
27 Jeti ku'nlik mu'ddet tamamlanıwg'a shamalasqanda, Aziya u'lkesinen kelgen yahudiyler Paveldi İbadatxanada ko'rip, pu'tkil xalıqqa qozg'alan' saldı da, onı uslap alıp:
28 – Ha'y, izraillılar, ja'rdem berin'ler! Bul adam ha'mme jerde ha'mme adamlarg'a bizin' xalqımızg'a, Muxaddes Nızamg'a ha'm İbadatxanag'a qarsı ta'lim berip ju'r. Onın' u'stine, greklerdi de İbadatxanag'a alıp kelip, bul muxaddes orındı haramladı, – dep baqırıstı.
29 O'ytkeni olar bunnan aldın Paveldi qalada efesli Trofim menen birge ko'rgenlikten, Pavel onı İbadatxanag'a alıp kelgen, dep oylaytug'ın edi.
30 Pu'tkil qala ayaqqa turdı. Ha'r ta'repten juwırısıp kelgen xalıq Paveldi uslap, İbadatxananın' sırtına su'yrep shıg'ardı. Sol waqıtta-aq İbadatxananın' da'rwazası jabıldı.
31 Olar Paveldi o'ltirmekshi bolıp atırg'anda, Rim mın'basısına: «Pu'tkil Erusalim qozg'alan' ko'terdi!» – degen xabar jetip bardı.
32 Mın'bası da'rhal a'skerler menen ju'zbasılardı janına alıp, xalıq turg'an jerge juwırıp keldi. Olar mın'bası menen a'skerlerdi ko'rgende, Paveldi urıwdı toqtattı.
33 Sonda mın'bası jaqınlap kelip, Paveldi tutqıng'a aldı da, qos shınjır menen baylawdı buyırdı. Son'ınan: – Bul kim? Ol ne isledi? – dep soradı.
34 Xalıq ishinen birewi anaw, birewi mınaw, dep baqırdı ha'm shawqım sebepli jo'nli juwap ala almag'anlıqtan, mın'bası Paveldi a'skeriy bo'limge alıp ketiwdi buyırdı.
35 Pavel basqıshqa kelgende, xalıq sonday g'a'zepli bolg'anlıqtan, a'skerler onı ko'terip ju'riwge ma'jbu'r boldı.
36 Xalıq onın' izinen: – Onı joq etin'ler! – dep baqırıp ju'rdi.
37 A'skeriy bo'limge kireyin dep atırg'anda, Pavel mın'basıg'a: – Sizge bir na'rse aytsam bola ma? – dedi. Mın'bası: – Sen grekshe bilesen' be?
38 Demek, sen bunnan burın qozg'alan' ko'terip, to'rt mın' qozg'alan'shını sho'lge aparg'an mısırlı emes ekensen'- g'o, – dedi.
39 Pavel: – Men yahudiymen. Kilikiyanın' belgili qalası Tarsustın' puqarasıman. Sizden o'tinish, xalıqqa so'z so'ylewge ruxsat etin', – dedi.
40 Mın'bası ruxsat etiwden, Pavel basqıshtın' u'stinde turıp, xalıqqa qolı menen isharat etti. Teren' tınıshlıq ornag'annan son', olarg'a evrey tilinde so'yley basladı.
