Elshiler 3 bob
1 Bir ku'ni Petr menen Yuxan duwa etiw waqtında, tu'sten keyin saat u'shte İbadatxanag'a baratır edi.
2 Sol jerde ishten ayag'ı la'n' bolıp tuwılg'an bir adam bar edi. Ol İbadatxanag'a kelgenlerden sadaqa soraw ushın ko'terip a'kelinip, ha'r ku'ni İbadatxananın' «Go'zzal» degen qapısının' qasında otırg'ızılatug'ın edi.
3 Bul adam İbadatxanag'a kirip baratırg'an Petr menen Yuxandı ko'rip, olardan sadaqa soradı.
4 Petr menen Yuxan og'an tigilip qaradı. Son'ınan Petr og'an: – Bizlerge qara! – dedi.
5 Sol adam olardan bir na'rse alıwdı da'metip, olarg'a dıqqat penen tigilip qaldı.
6 Petr og'an: – Mende gu'mis ha'm altın joq, biraq sag'an o'zimde barımdı beremen. Nasıralı İysa Masix atı menen aytaman, ju'r! – dep.
7 onın' on' qolınan usladı da, ornınan turg'ızdı. Sol waqıtta-aq onın' ayaqları menen tobıqlarına ku'sh endi.
8 Ol ornınan ushıp turdı da, ju're basladı. Bılaybılay ju'rip sekiriwi menen Qudayg'a alg'ıslar aytıp, olar menen birge İbadatxanag'a kirdi.
9 Pu'tkil xalıq onın' ju'rip baratırg'anın ha'm Qudaydı alg'ıslap atırg'anın ko'rip,
10 onın' İbadatxananın' «Go'zzal» degen qapısının' qasında otırıp, tilenshilik etken adam ekenin tanıdı. Onın' menen ju'z bergen waqıyag'a olar qattı hayran qalısıp, an'-tan' bolıstı.
11 Jan'ag'ı adam Petr menen Yuxannan ayırılmay ju'rgende, pu'tkil xalıq hayran qalısıp, «Sulaymannın' aywanı» dep atalatug'ın jerge, olardın' qasına juwırısıp keldi.
12 Bunı ko'rgen Petr xalıqqa qarata bılay dedi: – İzraillılar, bug'an nege an'-tan' bolıp atırsızlar? Bul adamdı bizler o'z ku'shimiz yamasa dinshilligimiz benen ju'rgizgendey, nege bizlerge tigilip tursızlar?
13 İbrayımnın', Isaqtın', Yaqıptın' Qudayı, bizin' atababalarımızdın' Qudayı O'z xızmetshisi İysanı ullıladı. Sizler Onı uslap berdin'ler ha'm Pilat Onı bosatıwg'a qarar etkende, Onnan Pilattın' aldında waz keshtin'ler.
14 Muxaddes ha'm haq Adamnan waz keship, bir adam o'ltiriwshinin' o'zlerin'izge bosatılıp beriliwin talap ettin'ler.
15 Sizler O'mir İyesin o'ltirdin'ler, biraq Quday Onı o'limnen tiriltti. Bizler bug'an gu'wamız.
16 Sizler ko'rgen ha'm tanıytug'ın bul adam İysanın' atı menen, Onın' atına degen isenim menen shıpa taptı. Ha'mmen'izdin' ko'z aldın'ızda og'an tolıq shıpa bergen İysag'a degen isenim edi.
17 Endi tuwısqanlarım, sizlerdin' bul isti basshıların'ız sıyaqlı bilmey islegenin'izdi bilemen.
18 Biraq barlıq payg'ambarlar arqalı O'z Masixının' azap shegetug'ının aldın ala bildirgen Quday O'z so'zin usılay a'melge asırdı.
19 Solay etip, ta'wbe etin'ler ha'm gu'naların'ızdın' juwılıwı ushın Qudayg'a qaytın'lar.
20 Sonda Jaratqan İyemiz sizlerge ra'ha'tleniw waqıtların beredi ha'm sizler ushın aldın ala tayınlang'an Masixtı, yag'nıy İysanı jiberedi.
21 Qudaydın' a'yyemnen muxaddes payg'ambarları arqalı aytqanınday, ha'mme na'rsenin' o'z qa'lpine keliwine deyin İysa aspanda bolıwı kerek.
22 O'ytkeni Muwsa bılay degen edi: «Quday İyemiz sizler ushın tuwısqanların'ızdın' arasınan men sıyaqlı bir payg'ambardı shıg'aradı. Onın' aytqan ha'r bir so'zin tın'lan'lar.
23 Sol payg'ambardı tın'lamag'an ha'r bir adam Qudaydın' xalqı arasınan joq etiledi».
24 Samuel payg'ambardan baslap, onnan keyin kelip so'ylegen payg'ambarlardın' ha'mmesi de usı ku'nler haqqında boljag'an edi.
25 Sizler payg'ambarlardın' ha'm Qudaydın' ata-babaların'ız benen du'zgen kelisiminin' miyrasxorlarısızlar. Sebebi Quday İbrayımg'a bılay degen edi: «Senin' a'wladın' arqalı jer ju'zindegi ha'mme xalıqlar jarılqanadı».
26 Ha'r birin'izdi jaman joldan qaytarıp, sizlerdi jarılqaw ushın, Quday O'zi tayınlag'an xızmetshisin en' aldı menen sizlerge jiberdi.
