Elshiler 4 bob
1 Petr menen Yuxan xalıqqa so'ylep turg'anda, ruwxaniyler, İbadatxana saqshılarının' basshısı ha'm saddukeyler* olardın' janına toparlasıp keldi.
2 O'ytkeni olardın' xalıqqa ta'lim berip, İysanın' mısalında o'lilerdin' qayta tiriletug'ının ja'riyalag'anına qattı ashıwlı edi.
3 Sonlıqtan olar Petr menen Yuxandı uslap aldı da, erten'ge deyin qamap tasladı. Sebebi ku'n kesh bolıp qalg'an edi.
4 Biraq, elshilerdin' so'zin esitken adamlardın' ko'bisi isendi. İsengen er adamlardın' sanı bes mın'g'a shamalas edi.
5 Kelesi ku'ni yahudiy basshıları, aqsaqallar ha'm diniy mug'allimler Erusalimge jıynaldı.
6 Bas ruwxaniy Xanna menen Kayafa, Yuxan, İskender ha'm bas ruwxaniydin' urpag'ınan bolg'an basqa adamlar da sol jerde edi.
7 Olar Petr menen Yuxandı ortag'a turg'ızıp, olardan: – Sizler bunı qanday ku'sh penen ha'm kimnin' atı menen isledin'ler? – dep soradı.
8 Sonda Petr Muxaddes Ruwxqa tolıp bılay dedi: – Xalıq basshıları ha'm aqsaqallar!
9 Bul la'n' adamg'a islengen jaqsılıq ha'm onın' qalay shıpa tapqanı haqqında bizler bu'gin tergelip atırg'an bolsaq,
10 onda sizlerdin' ha'mmen'iz ha'm pu'tkil İzrail xalqı mınanı bilip qoyın'lar: bul adam sizler atanaq ag'ashqa shegelegen, biraq Quday o'limnen qayta tiriltken Nasıralı İysa Masixtın' atının' qu'direti menen sap-saw bolıp, aldın'ızda tur.
11 Usı İysa Muxaddes Jazıwda aytılg'anday: «Siz, qurılısshılar ta'repinen kereksiz dep taslanıp, Biraq, u'ydin' mu'yeshinin' tiykarg'ı tası bolg'an tas».
12 İysadan basqa hesh kim arqalı qutqarılıw joq. Qutqarılıwımız ushın aspan astında adamlarg'a berilgen basqa hesh bir at joq.
13 Ken'es ag'zaları Petr menen Yuxannın' bilimsiz ha'm qarapayım adamlar ekenin bayqap, olardın' batıllıg'ın ko'rgende tan' qalıstı. Olardın' İysa menen birge bolg'anın bildi.
14 Biraq shıpa tapqan adamnın' Petr ha'm Yuxan menen turg'anın ko'rip, olarg'a qarsı hesh na'rse ayta almadı.
15 Solay etip, ken'es ag'zaları olarg'a sırtqa shıg'ıp ketiwdi buyırdı da, son'ınan o'z ara ken'ese baslap:
16 – Bul adamlarg'a ne islesek eken? Erusalimde jasaytug'ın ha'r bir adam olardın' anıq ka'ramat islegenin biledi-g'o. Bizler bunı biykarlay almaymız.
17 Biraq, bul xabardın' xalıq arasında ja'ne de ko'birek jayılmawı ushın, bunnan bılay İysanın' atı menen hesh kimge hesh qashan so'ylemen'ler dep, qorqıtıp qoyayıq, – desti.
18 Son'ınan olardı shaqırıp alıp, İysanın' atı menen hesh na'rse aytpawların ha'm u'yretpewlerin buyırdı.
19 Biraq, Petr menen Yuxan olarg'a juwap berip: – O'zlerin'iz oylap ko'rin': Qudaydın' so'zlerinen go're, sizlerdin' so'zlerin'izdi tın'law Quday aldında durıs bolar ma eken?
20 Bizler ko'rgenlerimizdi ha'm esitkenlerimizdi aytpay tura almaymız, – dedi.
21 Ken'es ag'zaları jazalaw ushın hesh qanday sebep taba almag'anlıqtan, olardı ja'ne qorqıttı da, bosatıp jiberdi. O'ytkeni bolg'an waqıya ushın pu'tkil xalıq Qudayg'a alg'ıslar aytıp turg'an edi.
22 Sebebi ka'ramatlı shıpa na'tiyjesinde jazılg'an adamnın' jası qırıqtan asqan edi.
23 Petr menen Yuxan bosatılg'annan son' joldaslarına barıp, bas ruwxaniyler menen aqsaqallardın' o'zlerine aytqan so'zlerinin' ha'mmesin xabarladı.
24 Olar bunı esitkende, bir awızdan Qudayg'a qarata ba'lent dawıs penen bılay dedi: – O, Qu'diretli İyemiz! Aspandı, jerdi, ten'izdi ha'm olardın' ishindegilerdin' ha'mmesin Sen jaratqansan'.
25 O'z xızmetshin' babamız Dawıttın' awzı menen Muxaddes Ruwx arqalı bılay degen edin': «Milletler nege qozg'alan' ko'terdi? Xalıqlar nege pushqa shıg'atug'ın jobalar du'zdi?
26 Jer ju'zinin' patshaları bas ko'terdi, Hu'kimdarlar birge jıynalıp, Jaratqan İyemizge ha'm Ol tayınlag'an Masixqa qarsı turdı».
27 Haqıyqattan da, Hirod penen Pontiy Pilat bul qalada basqa milletler ha'm İzrail xalqı menen birge Sen tayınlag'an muxaddes xızmetshin' İysag'a qarsı toplandı.
28 Olar bunı Senin' qu'diretin' ha'm erkin' menen aldın ala belgilengenlerdi a'melge asırıw ushın isledi.
29 Endi, O İyemiz, olardın' aybat etiwlerine na'zer salıp, Senin' so'zin'di tolıq ma'rtlik penen aytıwg'a O'z qulların'a ku'sh-quwat bere go'r!
30 Muxaddes xızmetshin' İysanın' atı menen awırıwlarg'a shıpa beriw ushın, ka'ramatlı belgiler ha'm tan' qalarlıq isler islew ushın qu'diretin'di ko'rsete go'r!
31 Duwa etip bolg'anda, olar jıynalg'an jer silkinip ketti. Ha'mmesi Muxaddes Ruwxqa tolıp, Qudaydın' so'zin ma'rtlik penen ayta basladı.
32 İseniwshilerdin' jıynag'ındag'ı ha'mme adam bir jan, bir ta'n edi. Hesh qaysısı da o'z mal-mu'lkin «meniki» demeytug'ın edi. Al ha'mme na'rsesin ortalıqqa qoydı.
33 Elshiler İyemiz İysanın' qayta tirilgeni haqqında ku'shli jiger menen, ta'sirli tu'rde gu'walıq beretug'ın edi ha'm olardın' ha'mmesi Qudaydın' ullı miyrimine iye edi.
34 Olardın' arasında joqshılıqta jasaytug'ın adam bolg'an joq. O'ytkeni jerleri yamasa u'yleri barlar olardı satatug'ın edi. Tu'sken aqshaların alıp kelip,
35 elshilerdin' qolına salatug'ın edi. Aqshalar ha'r kimge mu'ta'jligine qaray u'lestiriletug'ın edi.
36 Mısalı: Lebiy urıwınan shıqqan Yusup degen kiprlı bir adam bar edi. Elshiler og'an Barnaba, yag'nıy «Jubanısh beriwshi» degendi an'latatug'ın at bergen edi.
37 Ol o'zine tiyisli jerdi sattı da, aqshasın a'kelip, elshilerdin' qolına saldı.
