Rimliler 15 bob
1 İsenimi ku'shli bolg'an bizler tek o'zimizdin' ma'pimizdi oylamay, isenimi ha'lsiz bolg'anlardın' ha'lsizliklerin ko'terisiwge parızlımız.
2 Ha'r birimiz janımızdag'ı adamg'a ruwxıy ku'sh beriw ushın, ol ushın jaqsı bolg'an na'rseni go'zlep, onın' ma'pin oylayıq.
3 O'ytkeni Masix ta O'zinin' ma'pin oylamadı. Muxaddes Jazıwda aytılg'anday: «Sag'an til tiygizgenlerdin' jaman so'zleri Mag'an tiydi».
4 Burın Muxaddes Jazıwlarda aytılg'anlardın' ha'mmesi de bizlerge ta'lim beriw ushın jazılg'an. Solay etip, bizler olar arqalı sabırlılıq ha'm jubanısh tawıp, u'mit penen jasay alamız.
5 Sabırlılıq ha'm jubanıshtın' tiykarı bolg'an Qudaydın' O'zi sizlerdin' Masix İysadan o'rnek alıp, awızbirishilik penen jasawın'ızg'a ja'rdem etsin.
6 Solay etip, sizler İyemiz İysa Masixtın' A'kesi bolg'an Qudaydı birgelikte ha'm bir awızdan alg'ıslaysızlar.
7 Sonlıqtan Qudaydın' alg'ıslanıwı ushın Masix sizlerdi qabıl etkenindey, sizler de bir-birin'izdi qabıl etin'ler.
8 Sebebi menin' aytatug'ınım mınaw: Qudaydın' yahudiylerdin' ata-babalarına bergen wa'desin a'melge asırıp, Onın' sadıq ekenin ko'rsetiw ushın, Masix yahudiylerdin' xızmetshisi boldı.
9 Masix bunı Muxaddes Jazıwda: «Seni basqa milletler arasında alg'ıslayman ha'm Senin' atın'dı jırlayman» , – dep aytılg'anday, basqa milletlerdin' de Qudaydın' miyrim-sha'pa'a'tine erisip, Qudaydı alg'ıslawı ushın isledi.
10 Muxaddes Jazıwda ja'ne de: «Ha'y, basqa milletler, Qudaydın' xalqı menen birge shadlanın'lar!» – delingen.
11 Tag'ı da bılay delingen: «Ha'y, barlıq basqa milletler, Quday İyemizdi alg'ıslan'lar! Ha'mme xalıqlar Onı maqtan'lar!».
12 İyshaya payg'ambar da bılay deydi: «İshaydın' urpag'ınan biri kelip, Basqa milletlerdi basqaradı. Olar Onnan u'mit etip jasaydı».
13 U'mittin' tiykarı bolg'an Quday Muxaddes Ruwxtın' ku'shi menen u'mitke tolıp tasıwın'ız ushın, kewillerin'izdi isenimin'iz arqalı quwanısh ha'm tınıshlıqqa toltırsın.
14 Tuwısqanlarım, al endi sizlerge kelsek, sizlerdin' jaqsılıqqa tolı ha'm ha'r tu'rli bilimge bay ekenin'izge, a'sirese bir-birin'izge aqıl-na'siyat bere alatug'ının'ızg'a men tolıq isenemen.
15 Biraq, Qudaydın' mag'an bergen miyrimi menen sizlerge esletip qoyıw ushın, bul xattın' ayırım jerlerin batıllıq penen jazdım.
16 Men Qudaydın' usı miyrimi menen, basqa milletler ushın Masix İysanın' xızmetshisi boldım. Basqa milletler Muxaddes Ruwx penen muxaddes qılınıp, Qudayg'a unaytug'ın sıy bolıwı ushın, men Qudaydın' Xosh Xabarın bir ruwxaniy sıpatında ja'riyalap atırman.
17 Sonlıqtan men Masix İysag'a tiyisli bolıp, Qudayg'a degen xızmetim menen maqtana alaman.
18 Masix menin' menen birge bolıp, basqa milletlerdin' Qudayg'a boysınıwı ushın, so'zlerim ha'm is-ha'reketlerim arqalı islegenlerinen basqa hesh na'rse haqqında aytıwg'a batılım jetpeydi:
19 bul isler ka'ramatlı belgilerdin' ha'm tan' qalarlıq na'rselerdin' ku'shi menen, ja'ne de Muxaddes Ruwxtın' qu'direti menen islendi. Solay etip, men Erusalimnen baslap İllirik u'lkesine deyin aralap, Masixtın' Xosh Xabarın ha'mme jerge ja'riyaladım.
20 Basqa bir adamnın' salg'an tırnaq tasının' u'stine imarat qurmayın dep, men Xosh Xabardı Masixtın' atın ele esitpegen jerlerde ja'riyalawg'a tırıstım.
21 Muxaddes Jazıwda aytılg'anday: «Onnan xabarsız bolg'anlar ko'redi, Esitpegenler tu'sinedi».
22 Mine, usı sebep janın'ızg'a barıwıma mag'an ko'p ma'rtebe irkinish jasadı
23 Endi bolsa, bul jerlerde men isleytug'ın hesh na'rse qalmadı. Ja'ne de, men qansha jıllardan beri sizlerge barıwdı arzıw etkenim sebepli,
24 İspaniyag'a qaray jolg'a shıqsam, sizlerge barmaqshıman. O'tip baratırg'anımda aldı menen sizlerdi ko'rip, biraz diydarın'ızg'a toyg'anımnan son', mag'an ja'rdem etip, sol jaqqa shıg'arıp salasız, degen u'mittemen.
25 Al ha'zir bolsa, men Erusalimge barıp, sol jerdegi iseniwshilerge ja'rdem bermekshimen.
26 O'ytkeni Makedoniya menen Axayadag'ı iseniwshiler Erusalimdegi iseniwshiler arasındag'ı mu'ta'jlikte jasaytug'ınlar ushın aqshalay ja'rdem etiwdi maqul ko'rdi.
27 Awa, maqul ko'rdi. Olar haqıyqattan da, Erusalimdegi iseniwshiler aldında qarızdar. Sebebi o'zleri Xosh Xabar arqalı alg'an ruwxıy jarılqawlardı yahudiy iseniwshileri basqa milletler menen bo'liskenlikten, basqa millet iseniwshileri de olarg'a aqshalay ja'rdem berip, xızmet etiwge parızlı.
28 Solay etip, jıynalg'an g'a'rejetti olarg'a jetkizip, usı isti orınlag'anımnan son', jol-jo'nekey sizler menen diydar ko'risip, İspaniyag'a ketemen.
29 Janın'ızg'a barg'anımda, sizlerge Masixtın' tolıq jarılqawın aparatug'ınımdı bilemen.
30 Tuwısqanlarım, İyemiz İysa Masixtın' atı menen ha'm Muxaddes Ruwxtın' su'yispenshiligi menen sizlerge jalbarınaman: menin' menen birge Qudayg'a duwa etip, men ushın bar jigerin'iz benen soran'lar.
31 Yahudiyadag'ı isenbeytug'ın adamlardan qutılıwım ushın ha'm Erusalimdegi xızmetimdi sol jerdegi iseniwshiler quwanısh penen qabıl alıwı ushın duwa etin'ler.
32 Ja'ne de, Quday qa'lese, men sizlerdin' janın'ızg'a quwanısh penen barıp, sizler menen birge kewlimdi xoshlawım ushın da soran'lar.
33 Tınıshlıq beriwshi Qudaydın' O'zi ha'mmen'izge yar bolsın! Awmiyin.
