Rimliler 16 bob
1 Kenxreyadag'ı iseniwshiler ja'ma'a'tinin' xızmetshisi bolg'an Fiba apamızdı sizlerge tapsıraman.
2 Onı muxaddeslerge mina'sip tu'rde, İyemizdin' atı menen qabıl qılın'lar. Ja'ne de, onın' qanday mu'ta'jligi bolsa da, ja'rdem etin'ler. O'ytkeni ol da ko'p adamlarg'a, sonın' ishinde mag'an ja'rdemshi boldı.
3 Menin' menen birge Masix İysag'a xızmet etiwshi Priskila ha'm Akilag'a sa'lem aytın'lar.
4 Olar menin' janım ushın o'z o'mirin qa'wip astına qoydı. Bunın' ushın tek men emes, al basqa milletlerdin' ha'mme iseniwshi ja'ma'a'tleri de olarg'a minnetdar.
5 Olardın' u'yindegi iseniwshiler ja'ma'a'tine de sa'lem aytın'lar. Aziya u'lkesinen birinshi bolıp İysag'a isengen su'yikli tuwısqanım Epenetusqa sa'lem aytın'lar.
6 Sizler ushın ko'p miynet etken Ma'riyamg'a sa'lem aytın'lar.
7 Masixtın' elshileri arasında abıraylı bolg'an, mennen burın Masixqa isengen ag'ayinlerim ha'm qamaqta birge bolg'an doslarım Andronik penen Yuniyag'a sa'lem aytın'lar.
8 İyemizge tiyisli bolg'an su'yikli tuwısqanım Ampliyatusqa sa'lem aytın'lar.
9 Bizler menen birge Masixqa xızmet etetug'ın Urbanusqa ha'm su'yikli tuwısqanım Staxiyag'a sa'lem aytın'lar.
10 Sınaqtan o'tip, Masixqa ılayıqlı dep tabılg'an Apelisqa sa'lem aytın'lar. Aristobuldın' u'y-ishine sa'lem aytın'lar.
11 Ag'ayinim İrodiong'a sa'lem aytın'lar. Narkistin' u'yishindegi İyemizge tiyisli bolg'anlarg'a sa'lem aytın'lar.
12 İyemizdin' xızmetinde miynet etip atırg'an hayallar: Trifen ha'm Trifosqa sa'lem aytın'lar. İyemizge xızmet etiw jolında ko'p miynet etken hayal – su'yikli tuwısqanım Persiske sa'lem aytın'lar.
13 İyemiz ta'repinen tan'lap alıng'an Rufusqa ha'm men ushın anamday bolg'an onın' anasına sa'lem aytın'lar.
14 Asinkrit, Flegon, Germes, Patrovas, Germas ha'm olardın' janındag'ı tuwısqanlarg'a sa'lem aytın'lar.
15 Filologus ha'm Yuliyag'a, Nirey ha'm onın' qarındasına, Olimpasqa ha'm olardın' janındag'ı barlıq iseniwshilerge sa'lem aytın'lar.
16 Bir-birin'izdi muxaddes posa menen su'yip, sa'lemlesin'ler. Masixqa tiyisli bolg'an ha'mme ja'ma'a'tler sizlerge sa'lem aytıp atır.
17 Tuwısqanlarım, sizlerge jalbarınaman, o'zlerin'izge u'yretilgen ta'liymatqa qarsı shıg'ıp, alawızlıq ha'm azg'ırıw alıp keletug'ın adamlardan saq bolıp, olardan awlaq ju'rin'ler.
18 Sebebi bunday adamlar İyemiz Masixqa emes, al o'z qarınlarına xızmet etedi. Olar sada adamlardı maylı til ha'm jag'ımpazlıq so'zleri menen aldaydı.
19 Sizlerdin' Qudayg'a boysınıp jasaytug'ının'ız ha'mmege ma'lim boldı. Men sol sebepten quwanıshlıman ha'm sizlerdin' jaqsılıq islewde dana bolıwın'ızdı, al jamanlıq islewde sada bolıwın'ızdı qa'leymen.
20 Tınıshlıq beriwshi Qudaydın' O'zi jaqın arada shaytandı ayaqların'ızdın' astında ezip taslaydı. İyemiz İysanın' miyrimi sizlerge yar bolsın!
21 Menin' menen birge xızmet etiwshi Timofey, ag'ayinlerim Lukiy, Yason ha'm Sosipater sizlerge sa'lem aytıp atır.
22 Bul xattı Paveldin' awzınan jazıp otırg'an men, Tertiy de, iseniwshi tuwısqanın'ız sıpatında sizlerge sa'lem jollayman.
23 Men ushın ha'm pu'tkil iseniwshiler ja'ma'a'ti ushın o'z u'yinen orın bergen Gayus sizlerge sa'lem aytıp atır.
24 Ja'ne de, qala qaznashısı Erastus ha'm tuwısqanımız Kuartus sizlerge sa'lem aytıp atır.
25 Men ja'riyalap ju'rgen İysa Masix haqqında Xosh Xabar arqalı, yag'nıy O'zi a'yyemgi waqıtlardan beri qupıya tutqan sırın ashıwı arqalı Quday sizlerdin' isenimin'izdi bekkemleytug'ın qu'diretke iye.
26 Usı sır payg'ambarlardın' Jazıwları arqalı ha'zir ashılıp, ma'n'gi jasaytug'ın Qudaydın' buyrıg'ı boyınsha, barlıq milletlerge ma'lim etildi. Bul barlıq milletlerdin' Qudayg'a isenip, Og'an boysınıp jasawı ushın boldı.
27 Jalg'ız ha'm dana Qudayg'a İysa Masix arqalı ma'n'gige dan'q bolsın! Awmiyin.
