1 Korinfliler 11 bob
1 Menin' Masixtan o'rnek alg'anım sıyaqlı, sizler de mennen o'rnek alın'lar.
2 Meni ha'r bir iste yadın'ızg'a tu'sirip, men sizlerge u'yretken da'stu'rler boyınsha is tutıp atırg'anın'ız ushın sizlerdi maqtayman.
3 Biraq, men mına na'rseni de biliwin'izdi qa'leymen: ha'r bir er adamnın' bası Masix, hayaldın' bası ku'yewi, al Masixtın' bası Quday.
4 Ja'ma'a't jıynalısında basın jawıp duwa etken yamasa payg'ambarshılıq qılg'an ha'r bir er adam o'z basın biyabıray qıladı. Al, basın jawmay duwa etken yamasa payg'ambarshılıq qılg'an ha'r bir hayal o'z basın biyabıray qıladı. Bunday hayaldın' shashın aldırıp taslag'an hayaldan parqı bolmaydı.
5 Al, basın jawmay duwa etken yamasa payg'ambarshılıq qılg'an ha'r bir hayal o'z basın biyabıray qıladı. Bunday hayaldın' shashın aldırıp taslag'an hayaldan parqı bolmaydı.
6 Eger hayal basın japqısı kelmese, shashın kestirgeni jaqsı. Biraq, hayal shashın kestiriwdi yamasa aldırıwdı ayıp dep bilse, basın jabıwı kerek.
7 Er adam basın jappasın. O'ytkeni er adam Qudayg'a usatıp jaratılg'an ha'm Onın' dan'qın ko'rsetedi. Al hayal er adamnın' dan'qın ko'rsetedi.
8 Sebebi er adam hayaldan emes, al hayal er adamnan jaratıldı.
9 Er adam hayal ushın emes, al hayal er adam ushın jaratıldı.
10 Sonlıqtan ha'm perishteler sebepli, hayal o'zinin' biylik astında ekenin ko'rsetiw ushın basın jabıwı kerek.
11 Degen menen, İyemizge tiyisli adamlardın' o'mirinde hayal er adamnan, er adam hayaldan g'a'rezli.
12 O'ytkeni hayal er adamnan jaratılg'anı sıyaqlı, er adam da hayaldan tuwıladı. Biraq, ha'mmesin Quday jaratqan.
13 O'zlerin'iz aqıl juwırtıp ko'rin'ler: hayaldın' Qudayg'a basın jappay duwa etiwi a'depke jata ma?
14 Ma'deniyatın'ızdın' o'zi uzın shash er adam ushın uyat ekenin,
15 biraq hayal ushın abıray ekenin u'yretpey me? Sebebi uzın shash hayalg'a jawlıq sıpatında berilgen.
16 Bul haqqında tartısıwdı qa'leytug'ın adam bar bolsa, ol bilsin, bizlerde de, Qudaydın' ja'ma'a'tlerinde de bunnan basqa a'det joq.
17 Endi mına jol-jorıqtı berip atırıp, sizlerdi maqtamayman: o'ytkeni jıynalısların'ızdın' paydasınan go're, zıyanı ko'p.
18 Birinshiden, ja'ma'a'tte jıynalg'anın'ızda aran'ızda bo'liniwler bar ekenin esitip atırman. Bug'an jarım-jartı bolsa da isenemen.
19 Sebebi, a'lbette, durıs pikir ju'rgiziwshiler anıqlanıwı ushın, aran'ızda ha'r tu'rli pikir ju'rgiziwshi toparlar bolıwı tiyis.
20 Sizler bo'linip turıp, İyemizdi eslew keshesin o'tkiziw ushın birge jıynalsan'ız, bul shın ma'nisindegi İyemizdi eslew keshesi bolmaydı.
21 O'ytkeni ha'r kim o'zinin' awqatın basqalardan burın jewge asıqqanlıqtan, birew ash qaladı, birew ma's boladı.
22 Sizlerdin' ishipjewin'iz ushın u'ylerin'iz joq pa? Qudaydın' ja'ma'a'tin pisent etpey, joqshılıqta jasaytug'ınlardı uyaltqın'ız kele me? Sizlerge ne deymen? Sizlerdi maqtayın ba? Yaq, bul ushın maqtamayman!
23 Sizlerge tapsırg'an mına jol-jorıg'ımdı men İyemizden aldım: qolg'a uslap beriletug'ın ku'ni tu'nde İyemiz İysa qolına nandı aldı da,
24 shu'kirlik bildirdi ha'm nandı sındırıp, bılay dedi: «Bul – sizler ushın qurban bolatug'ın Menin' denem. Meni eslep turıwın'ız ushın, usılay islep turın'lar».
25 Sol sıyaqlı, keshki awqattan son' keseni alıp bılay dedi: «Bul kese – Menin' qanım menen bekitiletug'ın Jan'a Kelisim. Onı ha'r ishkenin'izde Meni eslep turıwın'ız ushın, usılay islep turın'lar».
26 Sebebi bul nannan ha'r jegenin'izde ha'm bul keseden ha'r ishkenin'izde, İyemiz qayta keliwge deyin Onın' o'limi haqqında ja'riyalag'an bolasızlar.
27 Sonlıqtan kim de kim ılayıqsız tu'rde İyemizdin' bul nanın jep, kesesinen ishse, İyemizdin' denesine ha'm Onın' qanına qarsı gu'na islegen boladı.
28 Ha'r bir adam o'zin tekserip ko'rsin, son'ınan nandı jep, keseden ishsin.
29 O'ytkeni kim de kim İyemizdin' denesin pisent etpey, ılayıqsız tu'rde nandı jep, keseden ishse, o'z-o'zin Qudaydın' hu'kimine duwshar qılg'an boladı.
30 Sol sebepten aran'ızdag'ı ko'plerin'iz ha'lsiz ha'm awırıwsız, o'lip qalg'an adamlar da ko'p boldı.
31 Eger bizler o'zo'zimizdi tekserip ko'rgenimizde, Quday ta'repinen hu'kim etilmegen bolar edik.
32 Biraq, du'nya menen birge hu'kim etilmewimiz ushın, İyemiz bizlerdi jazalap, ta'rbiyalaydı.
33 Solay etip, tuwısqanlarım, İyemizdi eslew keshesin o'tkiziw ushın jıynalg'anın'ızda, bir-birin'izdi ku'tin'ler.
34 Eger kim de kim ash bolsa, u'yinde awqatlanıp kelsin. Sonda jıynalısın'ız Qudaydın' hu'kimine ushıramaydı. Basqa ma'selelerge kelsek, olar boyınsha o'zim barg'anımda jol-jorıq beremen.
