1 Korinfliler 15 bob
1 Tuwısqanlarım, men sizlerge ja'riyalag'an Xosh Xabardı esin'izge tu'siriwdi qa'leymen. Sizler onı qabıl ettin'ler ha'm onın' tiykarında isenimin'izdi bekkemlep atırsızlar.
2 Eger sizler men o'zlerin'izge ja'riyalag'an usı Xosh Xabardı isenim menen bekkem tutsan'ız, ol arqalı qutqarılasız. Bolmasa, biykarg'a isenip ju'rgen bolasızlar.
3 O'zim alg'an en' a'hmiyetli na'rseni men sizlerge jetkizgen edim. Yag'nıy, Muxaddes Jazıwlar boyınsha, Masix bizlerdin' gu'nalarımız ushın o'ldi.
4 Ja'ne de, Muxaddes Jazıwlar boyınsha, Ol qa'birge qoyıldı ha'm u'shinshi ku'ni o'limnen qayta tirildi.
5 Ol Kifag'a, keyin on eki sha'kirtine ko'rindi.
6 Son'ınan bir waqıttın' o'zinde bes ju'zden aslam iseniwshi tuwısqanımızg'a ko'rindi. Olardın' ko'bisi ele tiri, bazıları qaytıs boldı.
7 Bunnan son', Ol Yaqıpqa, keyninen barlıq elshilerge ko'rindi.
8 Al en' son'ında shala tuwılg'an balag'a megzes bolg'an mag'an da ko'rindi.
9 Sebebi men elshiler ishindegi en' arzımag'anıman. Qudaydın' ja'ma'a'tin quwdalag'anım ushın, men elshi dep atalıwg'a da ılayıqlı emespen.
10 Biraq, men ha'zir kim bolg'an bolsam, Qudaydın' miyrimi menen boldım. Onın' mag'an degen miyrimi bosqa ketpedi. Men elshilerdin' ha'mmesinen ko'p miynet ettim. Negizinde men emes, al menin' menen birge bolg'an Qudaydın' miyrimi miynet etti.
11 Solay etip, men bolayın yamasa basqa elshiler bolsın, bizler usı na'rse haqqında ja'riyalaymız. Sizler de usıg'an isendin'iz.
12 Masix o'limnen qayta tirildi, dep ja'riyalap atırg'an bolsaq ta, qalay aran'ızdag'ı bazı adamlar o'limnen tiriliw joq deydi?
13 Eger o'liler tirilmeytug'ın bolsa, onda Masix ta tirilmegen boladı.
14 Masix tirilmegen bolsa, onda bizlerdin' ja'riyalag'anlarımız da, sizlerdin' isenimin'iz de biykar boladı.
15 Ha'tte, bizler Quday haqqında jalg'an gu'walıq bergen adamlar bolıp qalamız. O'ytkeni bizler Quday Masixtı tiriltti, dep gu'walıq bergen edik. Eger o'liler haqıyqattan da qayta tirilmeytug'ın bolsa, onda Quday da Masixtı tiriltpegen boladı.
16 Eger o'liler tirilmeytug'ın bolsa, onda Masix ta tirilmegen boladı.
17 Masix tirilmegen bolsa, onda sizlerdin' isenimin'iz biykar boladı ha'm sizler ele gu'naların'ızdın' biyligi astında jasap atırg'an bolasızlar.
18 Olay bolsa, Masixqa tiyisli bolıp du'nyadan o'tken adamlar da nabıt bolg'an boladı.
19 Eger bizler tek bul du'nyadag'ı o'mirimizde g'ana Masixtan u'mit etetug'ın bolsaq, onda bizler ha'mme adamlar ishindegi en' ayanıshlı adamlar bolg'anımız.
20 Biraq, Masix haqıyqattan da o'limnen qayta tirildi! Ol o'liler ishinen birinshi bolıp tiriliwi arqalı o'lilerdin' tiriletug'ının da'lilledi.
21 Bir adam arqalı o'lim kelgeni sıyaqlı, bir Adam arqalı o'limnen tiriliw keldi.
22 Yag'nıy, Adam-ata menen qatnası bolg'an pu'tkil adamzat o'letug'ını sıyaqlı, Masix penen qatnası bolg'an barlıq adamlar tirilip, o'mirge erisedi.
23 Biraq, ha'r biri o'z gezegi boyınsha tiriledi: en' aldı menen Masix, son'ınan Masix qaytıp kelgende, Og'an tiyisli bolg'anlar tiriledi.
24 Bunnan keyin, Masix ha'r bir ha'kimshilikti, ha'r bir biylikti ha'm qu'diretti saplastırıp, patshalıqtı A'kemiz Qudayg'a tapsırg'anda, aqırzaman boladı.
25 Sebebi Quday barlıq dushpanların Masixtın' ayag'ının' astına bastırmag'ansha, Masix patshalıq etiwi tiyis.
26 Joq qılınatug'ın son'g'ı dushpan – o'lim boladı.
27 O'ytkeni Muxaddes Jazıwda: «Quday barlıg'ın Onın' ayaqlarının' astına bastırıp, Og'an boysındırdı», – delingen. Biraq, bul «barlıg'ın» degen so'zdin' ishinde barlıg'ın Masixqa boysındırg'an Quday na'zerde tutılmag'anı anıq.
28 Barlıg'ı Ulg'a boysıng'anda, Ul da barlıg'ın O'zine boysındırg'an Qudayg'a boysınadı. Usılay etip, Quday ha'mme na'rse u'stinen tolıq biylik ju'rgizedi.
29 Eger qayta tiriliw joq bolsa, o'liler ushın suwg'a shomıldırılg'anlar ne boladı? O'liler hesh qashan tirilmeytug'ın bolsa, adamlar ne sebepten o'liler ushın suwg'a shomıldırıladı?
30 Ja'ne de, bizler ne ushın ha'r saat sayın o'zimizdi qa'wip astına qoyamız?
31 Tuwısqanlarım, sizlerdin' İyemiz Masix İysa menen bolg'an baylanısın'ızdı maqtanısh etip, ant ishemen: men ha'r ku'ni o'lim menen ju'zbe-ju'z ushıraspaqtaman.
32 Eger adamlardın' oyı boyınsha o'liler tirilmeytug'ın bolsa, Efestegi jabayı haywanlar sıyaqlı bolg'an adamlar menen gu'resip, o'lim qa'wpi astında qalg'anımnın' mag'an qanday paydası bar? Eger o'liler tirilmeytug'ın bolsa: «Kelin'ler, iship-jep qalayıq, sebebi erten' o'lemiz-g'o!»
33 Usılay pikir ju'rgizetug'ın adamlardan aldanıp qalman'lar: jaman doslar jaqsı a'detlerden ayıradı.
34 Esin'izdi jıyıp, o'zin'izge kelin'ler ha'm endi qaytıp gu'na islemen'ler. Ayırımların'ız Qudaydı bilmeydi. Bulardı sizlerdi uyaltıw ushın aytıp atırman.
35 Biraq, birew: «O'liler qalay tiriledi? Qanday dene menen keledi?» – dep sorawı mu'mkin.
36 Ne degen aqılsızlıq! Senin' ekken tuqımın' o'lmese, ko'gerip shıqpaydı-g'o.
37 Sen ekkenin'de, ko'gerip turg'an o'simlikti emes, al tek tuqımdı, biyday yamasa basqa bir o'simliktin' tuqımın egesen'.
38 Quday tuqımg'a O'z qa'lewi boyınsha dene beredi. Tuqımlardın' ha'r birine o'z aldına bir dene beredi.
39 Tiri janlardın' denesi birdey emes. Adamlardın' denesi basqa, haywanlardın' denesi basqa, quslardın' ha'm balıqlardın' denesi basqa boladı.
40 Aspan deneleri bar, jer deneleri de bar. Aspandag'ı denelerdin' sulıwlıg'ı basqa, jerdegi denelerdin' sulıwlıg'ı basqa.
41 Quyashtın' sulıwlıg'ı basqa, aydın' sulıwlıg'ı basqa, juldızlardın' sulıwlıg'ı basqa. Sulıwlıg'ı boyınsha, juldız juldızdan parıq qıladı.
42 O'lilerdin' tiriliwi de sonday boladı. Shiriytug'ın dene ko'miledi, biraq ol shirimeytug'ın bolıp tiriledi.
43 Dene xorlıq penen ko'miledi, saltanat penen tiriledi. Ha'lsiz bolıp ko'miledi, ku'shli bolıp tiriledi.
44 Ta'biyg'ıy dene ko'miledi, biraq ol ruwxıy dene bolıp tiriledi. Ta'biyg'ıy dene bar bolg'anı sıyaqlı, ruwxıy dene de bar.
45 O'ytkeni Muxaddes Jazıwda bılay delingen: «Birinshi adam – Adam-ata tiri jan boldı».
46 Biraq, birinshi bolıp ruwxıy dene emes, al ta'biyg'ıy dene keldi. Ruwxıy dene keyninen keledi.
47 Birinshi adam jerden, yag'nıy topıraqtan boldı. Ekinshi adam* aspannan keldi.
48 Topıraqtan bolg'an Adam-ata qanday bolsa, topıraqtan bolg'an adamlar da sonday boladı. Aspannan kelgen İysa Masix qanday bolsa, aspang'a tiyisli bolg'an adamlar da sonday boladı.
49 Bizler topıraqtan bolg'an Adam-atag'a qalay uqsaytug'ın bolsaq, aspannan kelgen İysa Masixqa da solay uqsaytug'ın bolamız.
50 Tuwısqanlarım, menin' sizlerge aytıp atırg'anım mınaw: bizlerdin' et penen qannan ibarat bolg'an ta'biyg'ıy denemiz Qudaydın' Patshalıg'ın miyras etip ala almaydı. Shirip ketetug'ın denemiz ma'n'gilik o'mirge erise almaydı.
51 Endi men sizlerge bir sırdı ashıp bermekshimen: bizlerdin' ha'mmemiz shetimizden o'lmeymiz, biraq ha'mmemiz o'zgeremiz.
52 Birden ko'zdi ashıp-jumg'ansha, son'g'ı ka'rnay shalıng'anda, o'zgerip ketemiz. Awa, ka'rnay shalıng'anda, o'lgen iseniwshiler shirimeytug'ın denede tiriledi, tiri bolg'an bizler de o'zgerip ketemiz.
53 Sebebi bizlerdin' bul shiriytug'ın ha'm o'letug'ın denemiz shirimeytug'ın ha'm o'lmeytug'ın dene bolıp o'zgeriwi tiyis.
54 Shiriytug'ın ha'm o'letug'ın denemiz shirimeytug'ın ha'm o'lmeytug'ın bolıp o'zgerse, Muxaddes Jazıwda aytılg'an mına so'zler iske asadı: «O'lim joq etildi, ol jen'ildi!»
55 «Ha'y o'lim, jen'isin' qa'ne? Ha'y o'lim, uwlı iynen' qa'ne?»
56 O'limnin' uwlı iynesi – gu'na. Gu'na o'z ku'shin Muxaddes Nızamnan aladı.
57 Biraq, Qudayg'a shu'kirler bolsın! Ol bizlerdi İyemiz İysa Masix arqalı jen'iske eristire beredi.
58 Solay etip, su'yikli tuwısqanlarım, taysalmay bekkem turın'lar ha'm İyemizdin' xızmetinde ba'rqulla g'ayratlı bolın'lar. O'ytkeni İyemizdin' jolında etken xızmetin'izdin' bosqa ketpeytug'ının bilesizler.
