1 Korinfliler 7 bob
1 Endi sizler jazg'an na'rselerge kelsek: durıs, er adamnın' hayal menen jaqınlaspag'anı jaqsı.
2 Biraq, buzıqshılıqqa jol qoymaw ushın, ha'r bir er adamnın' o'z hayalı ha'm ha'r bir hayaldın' o'z ku'yewi bolsın.
3 Er adam o'z hayalına degen, hayal da o'z ku'yewine degen erli-zayıplılıq wazıypasın orınlasın.
4 Sebebi hayaldın' denesi u'stinen hayaldın' o'zi emes, al ku'yewi biylik etedi. Sol sıyaqlı, er adamnın' denesi u'stinen de er adamnın' o'zi emes, al hayalı biylik etedi.
5 Erli-zayıplılıq wazıypasın orınlawda bir-birin'izden bas tartpan'lar. Tek o'z ara keliskennen son', o'zlerin'izdi duwa etiwge tolıq bag'ıshlaw ushın g'ana waqıtsha bo'lek bolın'lar. O'zin'izdi tıya almag'anın'ızdan shaytan paydalanıp, sizlerdi azg'ırmawı ushın keyin ja'ne birge bolın'lar.
6 Bunı bir buyrıq sıpatında emes, al ruxsat sıpatında aytıp atırman.
7 Barlıq adamlardın' men sıyaqlı jalg'ız jasawın qa'leymen. Biraq, ha'r bir adamnın' Qudaydan alg'an sıyı bar: birewler xojalıq bolıp nekede jasaydı, ekinshiler nekesiz jalg'ız jasaydı.
8 U'ylenbegenler menen turmısqa shıqpag'anlarg'a ha'm jesir hayallarg'a aytatug'ınım: men sıyaqlı jalg'ız jasasa, o'zleri ushın jaqsı boladı.
9 Biraq, o'zlerin tıya almaytug'ın bolsa, u'ylensin yamasa turmısqa shıqsın. O'ytkeni jınısıy qa'lewler sebepli ku'yip-jang'annan go're, u'ylengeni yamasa turmısqa shıqqanı jaqsıraq.
10 Al nekede bolg'anlarg'a men mınanı buyıraman, anıg'ırag'ı men emes, İyemiz solay buyırg'an: hayal adam ku'yewi menen ajıraspasın.
11 Eger ajırassa, ya ku'yewsiz qalsın, ya o'z ku'yewi menen jarassın. Er adam da hayalı menen ajıraspasın.
12 Al qalg'anlarg'a İyemiz emes, men bılay deymen: eger bir tuwısqanımızdın' hayalı iseniwshi bolmasa, biraq onın' menen jasawg'a ırazı bolsa, ol hayalı menen ajıraspasın.
13 Bir iseniwshi hayaldın' da ku'yewi iseniwshi bolmasa, biraq ku'yewi onın' menen jasawg'a ırazı bolsa, hayal ku'yewi menen ajıraspasın.
14 Sebebi isenbeytug'ın ku'yew hayalı sebepli, isenbeytug'ın hayal da iseniwshi ku'yewi sebepli, Qudaydın' panasında boladı. Olay bolmag'anda, balaların'ız qudaysız bolar edi, biraq endi olar Qudaydın' panasında.
15 Biraq, eger isenbeytug'ın adam ajırasqısı kelse, ajırassın. Er yamasa hayal tuwısqanımız bunday jag'dayda azat boladı. Quday sizlerdi tınıshlıqta jasawg'a shaqırdı.
16 Ha'y hayal, sen arqalı ku'yewin' de qutqarılıwı mu'mkin ekenligin bilesen'-g'o. Ha'y erkek, sen arqalı hayalın' da qutqarılıwı mu'mkin ekenligin bilesen'-g'o.
17 Ha'r bir adam İyemizdin' ol ushın belgilegen jag'dayına boysınıp, Quday onı qanday jag'dayda shaqırg'an bolsa, sonday bolıp qalsın. Bunı barlıq iseniwshi ja'ma'a'tlerge buyıraman.
18 Eger kim de kim su'nnetli bolıp shaqırılsa, bunı jasırmasın. Kim de kim su'nnetsiz bolıp shaqırılsa, su'nnet etilmesin.
19 Su'nnetli bolıw yamasa bolmaw a'hmiyetli emes. Al a'hmiyetlisi – Qudaydın' buyrıqların orınlaw.
20 Kim qanday jag'dayda shaqırılg'an bolsa, sol jag'dayda qalsın.
21 Qul bolıp shaqırıldın' ba? Qapa bolma. Biraq, azat bolıwg'a mu'mkinshilik tuwılsa, onnan paydalan!
22 İyemiz shaqırg'an waqıtta qul bolg'an adam endi İyemizge tiyisli azat adam boladı. Sol sıyaqlı, azat bolıp shaqırılg'an adam da Masixtın' qulı boladı.
23 Quday biybaha to'lem to'lep, sizlerdi satıp aldı, sonlıqtan adamlardın' qulı bolman'lar.
24 Tuwısqanlarım, kim qanday jag'dayda shaqırılg'an bolsa, Quday aldında sol jag'dayda qalsın.
25 Endi qızlarg'a kelsek, İyemizden olarg'a baylanıslı buyrıq alg'anım joq. Biraq, İyemizdin' miyrim-sha'pa'a'tin alg'an isenimli adam sıpatında men o'z pikirimdi aytaman.
26 Menin' oyım boyınsha, ha'zirgi qıyınshılıqlarg'a baylanıslı, adam sol halında qala bergeni jaqsı.
27 Bir hayalg'a basın' baylang'an ba? Onda ajırasıwg'a umtılma. Hayalsızsan' ba? Onda o'zin'e hayal izleme.
28 Degen menen, eger u'ylensen' de gu'na islemeysen'. Eger qız da turmısqa shıqsa, gu'na islegen bolmaydı. Biraq, turmıs qurg'anlar o'mirde qıyınshılıq ko'redi. Men sizlerdi usı qıyınshılıqlardan saqlawdı qa'leymen.
29 Tuwısqanlarım, sizlerge mınanı aytıwdı qa'leymen: waqıt qısqa. Bunnan bılay, hayalı bolg'anlar hayalı joqtay bolsın.
30 Jılap atırg'anlar jılamaytug'ınday, quwanıp atırg'anlar quwanbaytug'ınday, satıp alıp atırg'anlar iyelik etpeytug'ınday,
31 Men sizlerdin' g'am-ta'shiwishsiz bolg'anın'ızdı qa'leymen. U'ylenbegen erkek İyemizge qalay jag'ınsam eken dep, İyemizdin' isleri haqqında oylaydı.
32 Men sizlerdin' g'am-ta'shiwishsiz bolg'anın'ızdı qa'leymen. U'ylenbegen erkek İyemizge qalay jag'ınsam eken dep, İyemizdin' isleri haqqında oylaydı.
33 Biraq, u'ylengen erkek hayalıma qalay jag'ınsam eken dep, du'nyanın' isleri haqqında oylaydı.
34 Sol sebepten ol alag'ada bolıp ju'redi. Ku'yewsiz hayal yamasa turmısqa shıqpag'an qız denesi menen ha'm ruwxıy jaqtan muxaddes bolıw ushın, İyemizdin' isleri haqqında oylaydı. Biraq, turmısqa shıqqan hayal ku'yewime qalay jag'ınsam eken dep, du'nyanın' isleri haqqında oylaydı.
35 Men bunı moynın'ızg'a bug'aw salıw ushın emes, al sizlerdin' paydan'ız ushın aytıp atırman. Sizlerdin' hesh na'rsege alan' bolmay, İyemizge o'zlerin'izdi tolıq bag'ıshlawın'ızdı ha'm ılayıqlı tu'rde jasawın'ızdı qa'leymen.
36 Eger kim de kim o'z qızının' turmısqa shıqpag'anın uyat dep sanasa, qızının' jası da o'tip, turmısqa shıg'atug'ın waqtı kelgen bolsa, ol adam qa'legenin islesin. Qızın ku'yewge berse de, gu'na islegen bolmaydı.
37 Biraq sol adam qızın ku'yewge bermewge qarar etse ha'm usı niyetinde bekkem turıp, bunı ma'jbu'riy tu'rde emes, al o'z erki boyınsha islese, jaqsı qılg'an boladı.
38 Solay etip, qızın ku'yewge bergen adam jaqsı qılg'an boladı, al ku'yewge bermegen adam onnan da jaqsıraq qılg'an boladı.
39 Hayal ku'yewi tiri waqtında bası baylawlı boladı. Ku'yewi o'lse, hayal qa'legen adamına turmısqa shıg'ıwg'a erki bar. Tek ol adam İyemizge tiyisli bolsın.
40 Biraq, hayal jesir bolıp qala berse baxıtlıraq boladı. Bul menin' pikirim ha'm mende de Qudaydın' Ruwxı bar dep oylayman.
