1 Korinfliler 8 bob
1 Endi butlarg'a berilgen qurbanlıqtın' go'shine toqtayıq. Durıs, ha'mmemiz de bilimli ekenligimizdi bilemiz. Degen menen, bilim adamdı menmen qıladı, al su'yispenshilik adamdı jigerlendiredi.
2 Adam bir na'rseni bilemen dep oylasa, ol ele biliwi kerek na'rseni bilmegeni boladı.
3 Biraq, Qudaydı su'ygen adamdı Quday biledi.
4 Al, butlarg'a berilgen qurbanlıq go'shin jewge kelsek, xabarımız bar, but du'nyada negizinde hesh qanday a'hmiyetke iye emes ha'm jalg'ız Qudaydan basqa quday joq.
5 Adamlardın' oyı boyınsha jerde de, aspanda da «quday» dep atalatug'ınlar bar. Olar shınında da, ko'p «qudaylar» ha'm «iyeler» bar dep esaplaydı.
6 Biraq, bizler ushın tek jalg'ız g'ana Quday A'kemiz bar. Ol ha'mme na'rsenin' tiykarı ha'm bizler Ol ushın jasap atırmız. Ja'ne de, bizlerdin' tek jalg'ız g'ana İyemiz – İysa Masix bar. Ha'mme na'rse Ol arqalı jaratılg'an, bizler de Ol sebepli jasap atırmız.
7 Degen menen, iseniwshilerdin' ha'mmesi de usınday bilimge iye emes. Olardın' ayırımları bul go'shti jegende, o'zlerinin' burıng'ı butparazlıq a'deti boyınsha, elege deyin onı butqa berilgen qurbanlıqtın' go'shi dep esaplaydı. Sonlıqtan olardın' hu'jdanı qıynalıp, o'zlerin iplaslandıq dep oylaydı.
8 Awqat bizlerdi Qudayg'a jaqınlastırmaydı: bizler jemesek te, hesh na'rse joytpaymız, jesek te, hesh na'rse arttırmaymız.
9 Biraq, abaylı bolın'lar, bul azatlıg'ın'ız isenimi ha'lsizlerdin' azg'ırılıwına sebep bolmasın.
10 Eger isenimi ha'lsiz bolg'an adam aldında aytılg'an bilimge iye bolg'an senin' buttın' ibadatxanasında awqat jep otırg'anın'dı ko'rse, onın' da butlarg'a berilgen qurbanlıqtın' go'shin jewge qa'lewi tuwılmay ma.
11 Solay etip, senin' bilimin' sebepli, bul isenimi ha'lsiz tuwısqanın' nabıt boladı. Biraq, Masix ol ushın da qurban bolg'an-g'o.
12 Sizler usı ta'rizde tuwısqanların'ızg'a qarsı gu'na islewin'iz arqalı ha'm olardın' qıynalıp atırg'an hu'jdanın azapqa tu'siriwin'iz arqalı Masixqa qarsı gu'na islegen bolasızlar.
13 Sonlıqtan menin' jep atırg'an na'rsem tuwısqanımnın' azg'ırılıwına sebep bolatug'ın bolsa, men tuwısqanımdı azg'ırmaw ushın, hesh qashan go'sh jemeymen.
