1 Salonikalılar 2 bob
1 Tuwısqanlar! Sizlerge bolg'an saparımızdın' bosqa ketpegenin o'zlerin'iz de bilesiz.
2 Biraq o'zlerin'izge ma'lim, bunnan aldın Filipte azap shegip, masqaralanıwg'a duwshar bolg'an edik. Degen menen, ku'shli qarama-qarsılıqlarg'a qaramastan, Qudaydın' Xosh Xabarın sizlerge ja'riyalaw ushın, bizler Qudayımızdan ma'rtlik alıp turatug'ın edik.
3 O'ytkeni bizlerdin' aqıl-na'siyatımız o'tirik yamasa napa'k niyet ha'm hiylege negizlenbegen edi.
4 Kerisinshe, Quday bizlerdi mina'sip ko'rip, bizlerge Xosh Xabardı isenip tapsırdı. Sonlıqtan bizler adamlarg'a emes, al kewillerimizdi sınaytug'ın Qudayg'a unaw ushın Xosh Xabardı ja'riyalap ju'rmiz.
5 Xabarın'ız bar, bizler hesh qashan jag'ımpazlıq so'zleri yamasa paydaku'nemlik nıqabı menen kelmedik. Quday bug'an gu'wa.
6 Ja'ne bizler hesh kimnen: ya sizlerden, ya basqalardan hu'rmet-maqtaw izlep ju'rgen joqpız.
7 Masixtın' elshileri sıpatında sizlerge awırmanlıq salıwımızg'a bolar edi. Biraq, balalarına g'amxor bolg'an ana sıyaqlı, sizlerge mu'la'yim boldıq.
8 Sizlerdi usılay jaqsı ko'rip, sizlerge tek Qudaydın' Xosh Xabarın emes, al o'z janlarımızdı beriwge de qayıl edik. Sebebi sizler bizler ushın sonshelli qa'dirli edin'iz.
9 Tuwısqanlar! Bizlerdin' awır miynetimiz ha'm qıyınshılıqlarımız yadın'ızda. Hesh birin'izge awırmanlıg'ımız tu'spewi ushın, ku'ni-tu'ni miynet etip, sizlerge Qudaydın' Xosh Xabarın ja'riyaladıq.
10 Siz iseniwshilerdin' aldında qanday muxaddes, haq ha'm kemshiliksiz bolıp jasag'anımızg'a sizler de, Quday da gu'wa.
11 Xabarın'ız bar, bir a'ke o'z balalarına qanday qatnas jasasa, bizler de sizlerdin' ha'r birin'izge sonday qatnas jasadıq.
12 Sizlerge aqıl-na'siyat ha'm jubanısh berip, O'z Patshalıg'ına ha'm saltanatına shaqırg'an Qudayg'a ılayıqlı jasawdı o'tinish ettik.
13 Bizler Qudayg'a ja'ne bir na'rse ushın u'zliksiz shu'kirlik etemiz. O'ytkeni sizler Qudaydın' so'zin bizlerden esitip qabıl etkenin'izde, bunı adamnın' so'zi sıpatında emes, al Qudaydın' so'zi sıpatında qabıl ettin'ler. Bul so'z haqıyqattan Qudaydın' so'zi bolg'anlıqtan, siz iseniwshilerde ha'reket etpekte.
14 Sebebi tuwısqanlar, sizler Masix İysag'a tiyisli bolg'an Yahudiyadag'ı Qudaydın' ja'ma'a'tlerine eliklewshiler boldın'lar. Olar yahudiylerden qanday azap-aqıret ko'rgen bolsa, sizler de o'z milletin'izden sonday azap-aqıret ko'rdin'ler.
15 İyemiz İysanı ha'm payg'ambarlardı o'ltirgen yahudiyler bizlerdi de quwıp shıg'ardı ha'm olar Qudaydı nariyza qılıp, pu'tkil adamlarg'a dushpanlıq islep atır.
16 Basqa milletlerdin' qutqarılıwı ushın, bizlerdin' so'ylewimizge olar tosqınlıq jasap, ha'r qashan o'z gu'nalarının' mo'lsherin toltırıp atır. Biraq olar aqırında Qudaydın' g'a'zebine ushıraydı.
17 Tuwısqanlar, sizlerden az waqıtqa ayra tu'sirilip, o'zlerimiz alısta bolsaq ta, kewillerimiz sizler menen birge edi. Sizlerdi ju'da' sag'ınıp, diydar ko'risiwge qattı tırıstıq.
18 Sonlıqtan sizlerge barg'ımız kelip, a'sirese men, Pavel, bir neshe ma'rte barmaqshı bolg'anımda, shaytan bizlerge kesent etti.
19 Bizlerdin' u'mitimiz, quwanıshımız ha'm İyemiz İysa kelgende, Onın' aldında kiyetug'ın maqtaw tajımız ne? Sizler emessiz be?
20 Awa, maqtanıshımız ha'm quwanıshımız sizlersiz.
