Evreyler 11 bob
1 İsenim – bul u'mit etilgen na'rselerdin' a'melge asatug'ınına ha'm ko'rinbeytug'ın zatlardın' bar ekenine gu'mansız iseniw.
2 Ata-babalarımız usınday isenimi sebepli, Quday ta'repinen xoshametlendi.
3 Bizler isenimimiz sebepli, du'nyanın' Qudaydın' so'zi menen jaratılg'anın tu'sinemiz. Solay etip, ko'rinbeytug'ın na'rselerden ko'rinetug'ın na'rseler payda bolg'an.
4 İsenimi sebepli, Abıl Qudayg'a Kainnan go're jaqsıraq qurbanlıq berdi. Ol isenimi sebepli aqlang'an adam dep sanalıp, Quday ta'repinen xoshametlendi. O'ytkeni Quday onın' bergen sadaqaların qabıl etti. Abıl o'lgen bolsa da, onın' isenim menen islegen isi ele u'lgi bolıp kelmekte.
5 İsenimi sebepli, Enok o'lim ko'rmey-aq joqarıg'a alındı. Onı hesh kim taba almadı, sebebi Quday onı joqarıg'a alg'an edi. Ol joqarıg'a alınıwg'a deyin onın' Qudayg'a unag'an adam ekeni haqqında gu'walıq berildi.
6 İsenim bolmasa, Qudayg'a unaw mu'mkin emes. O'ytkeni kim de kim Qudayg'a jaqınlamaqshı bolsa, Onın' bar ekenine ha'm Onın' O'zin izlegenlerdi sıylıqlaytug'ınına iseniwi tiyis.
7 İsenimi sebepli, Nux ele bolmag'an na'rseler tuwralı Quday ta'repinen eskertilgende, Qudaydan qorqıp, shan'arag'ının' qutqarılıwı ushın, keme soqtı. Ol bul arqalı du'nyanı hu'kim etti ha'm isenimi sebepli aqlanıwg'a eristi.
8 İsenimi sebepli, İbrayım wa'de etilgen elge ketiw ushın shaqırılg'anda, Qudaydın' so'zine boysınıp, qay jerge ketip baratırg'anın bilmese de, jolg'a shıqtı.
9 İbrayım wa'de etilgen elge ornalasqanda, isenimi sebepli jat jerli adamday bolıp jasadı. O'zi menen birdey wa'dege sherik bolg'an Isaq ha'm Yaqıp penen, ol shatırlarda o'mir keshirdi.
10 Sebebi ol do'retiwshisi de, qurıwshısı da Quday bolg'an, bekkem tiykarg'a iye qalanı ku'tetug'ın edi.
11 İsenimi sebepli, Saranın' na'silsiz bolıwına ha'm o'zinin' jası o'tkenine qaramay, İbrayım a'ke bolıw mu'mkinshiligine eristi. O'ytkeni ol wa'de etken Qudaydın' sadıq ekenine isendi.
12 Solay etip, bir adamnan, yag'nıy qartayıp na'silsizlenip qalg'an İbrayımnan aspandag'ı juldızlar sıyaqlı, ten'iz jag'asındag'ı qum sıyaqlı esap-sansız a'wladlar payda boldı.
13 Aldın aytılg'an bul adamlardın' ha'mmesi de o'mirlerinin' aqırına deyin isenimin saqlap qaldı. Wa'de etilgenlerdi almasa da, olardı uzaqtan ko'rip quwandı. Olar o'zlerinin' jer ju'zinde jat ha'm qonaq adamlar ekenin ashıq moyınladı.
14 Usılay so'ylegen adamlar o'z watanın izlep ju'rgenin ko'rsetedi.
15 ger olar o'zleri taslap ketken eldi watanım dep oylay bergende, sol jerge qaytıp barıwg'a jol tabar edi.
16 Biraq, olar jerdegi watannan da jaqsırag'ın, yag'nıy aspandag'ı watandı a'rman etetug'ın edi. Sol sebepten Quday olardın' Qudayı bolıwg'a arlanbaydı. Sebebi Ol olar ushın bir qala tayarlap qoyıptı.
17 İbrayım sınalg'anda, isenimi sebepli ulı Isaqtı qurbanlıqqa berdi.
18 Quday İbrayımg'a: «Senin' urpag'ın' Isaq arqalı dawam etedi» , – degen wa'deni bergen bolsa da, ol jalg'ız ulın qurban etpekshi boldı.
19 O'ytkeni İbrayım Quday o'lilerdi de tirilte aladı, dep isendi. Astarlap aytqanda, ol Isaqtı o'limnen qaytarıp aldı.
20 İsenimi sebepli, Isaq keleshekte bolatug'ın na'rselerdi boljap, ulları Yaqıp ha'm İsabqa pa'tiyasın berdi.
21 Yaqıp o'lerinen aldın isenimi sebepli, Yusuptın' eki ulına birme-bir pa'tiyasın berdi ha'm hasasının' ushına su'yenip, Qudayg'a sıyındı.
22 Yusup o'lerinen aldın isenimi sebepli, İzrail balalarının' Mısırdan shıg'atug'ının boljap ayttı ha'm olarg'a keterinde o'zinin' su'yegin alıp ketiwdi buyırdı.
23 Muwsa tuwılg'anda, ata-anası isenimi sebepli, onı u'sh ay jasırıp qoydı. Sebebi balanın' ayrıqsha ekenin ko'rdi ha'm patshanın' pa'rmanınan qorqpadı.
24 Muwsa erjetkende, isenimi sebepli, Faraonnın' qızının' balası dep atalıwdan waz keshti.
25 Ol waqıtsha gu'nakar o'mirdin' ka'yip-sapasın su'riwdin' ornına, Qudaydın' xalqı menen birge ja'bir shegiwdi tan'ladı.
26 Masix sebepli xorlanıwdı Mısırdın' g'a'ziynelerinen de ullıraq baylıq dep sanadı. O'ytkeni ol alajaq sıyın ku'tetug'ın edi.
27 İsenimi sebepli, ol patshanın' qa'ha'rinen qorqpay, Mısırdı taslap ketti. Ko'rinbeytug'ın Qudaydı ko'rgendey, ol ma'rt edi.
28 Tun'g'ıshlardı nabıt qılg'an perishte izraillılarg'a qol tiygizbesin dep, Muwsa isenimi sebepli, Qutqarılıw bayramının' qurbanlıg'ının' shalınıwın ha'm onın' qanının' qapılarg'a sebiliwin buyırdı.
29 İsenimi sebepli, izraillılar Qızıl ten'izdi qurg'aq jerden o'tkendey keship o'tti. Mısırlılar da usılay islemekshi bolıp ha'reket etkende, suwg'a batıp ketti.
30 İsenimi sebepli, izraillılar Erixo qalasının' a'tirapın jeti ku'n aylang'anda, qala diywalları quladı.
31 Sonda isenimi sebepli, buzıq hayal Rahab ta Qudayg'a boysınbaytug'ın adamlar menen birge o'ltirilmedi. Sebebi ol jansızlardı jıllı ju'zlik penen qabıl alg'an edi.
32 Ja'ne ne aytayın? Gedeon, Barak, Samson, Effa, Dawıt, Samuel ha'm barlıq payg'ambarlar haqqında aytıp otırıw ushın waqtım jetpeydi.
33 İsenimi sebepli, olar patshalıqlardı jen'di, a'dillik ornattı, wa'de etilgen na'rselerdi aldı ha'm arıslanlardın' awızların tosıp qoydı.
34 Lawlag'an ottı so'ndirdi, qılısh ju'zinen qashıp qutıldı. Ha'lsiregende Qudaydan ku'sh aldı, sawashta qu'diretli boldı ha'm jaw a'skerlerin qıyrattı.
35 İsenimi sebepli, hayallar o'z marhumların tirilgen halda qaytarıp aldı. Al ayırımları ele de jaqsıraq tiriliwge erisiw ushın, azatlıqtan waz keshti ha'm azaplanıp o'ltirildi.
36 Ja'ne geybirewleri masqaralanıp, qamshı jedi, ha'tte, shınjırlar menen baylanıp, qamaqqa salındı.
37 senimi sebepli, olar tas penen urıldı, pıshqı menen kesilip ekige bo'lindi, qılıshtan o'tkerilip o'ltirildi. Qoy ha'm eshkinin' terilerin jamılıp, sergizdan bolıp ju'rdi, joqshılıqta jasadı, qıyınshılıqlarg'a ushıradı ha'm xorlıq ko'rdi.
38 Du'nya bul adamlarg'a ılayıq emes edi! Olar sho'llerdi, tawlardı, u'n'girlerdi ha'm to'lelerdi gezip sebil boldı.
39 Olardın' ha'mmesi de isenimi sebepli Quday ta'repinen xoshametlengen bolsa da, wa'de etilgendi almadı.
40 O'ytkeni Quday bizler ushın bunnan da jaqsıraq na'rseni tayarlap qoyg'anlıqtan, olar bizlersiz minsizlikke erispedi.
