Evreyler 12 bob
1 Minekey, bizlerdi qorshag'an usınday ko'p sanlı gu'walar toparı bar eken. Sonlıqtan bizler de kesent beretug'ın ha'r bir ju'kti ha'm o'zlerimizge tez jabısatug'ın gu'nanı taslap, Quday aldımızg'a qoyg'an jarısta shıdamlılıq penen juwırayıq.
2 İsenimimizdin' tiykarın salıwshı ha'm onı minsizlikke eristiriwshi İysag'a ko'z tigeyik. Ol O'zin ku'tip turg'an quwanısh ushın, atanaq ag'ashta shegeleniwdin' shermendeshiligin pisent etpey o'limge barıp, Qudaydın' taxtının' on' ta'repine otırdı.
3 Gu'nakarlardın' usınday qarsılıqlarına shıdag'an İysanı oylan'lar. Sonda haldan tayıp, ruwxıy tu'skinlikke tu'speysizler.
4 Sizler gu'nag'a qarsı gu'reste qanın'ız to'gilgenshe gu'resken joqsız-g'o.
5 Qudaydın' O'z ullarına so'ylegendey qılıp, sizlerge aytqan mına aqılna'siyatın umıttın'ız: «Ulım! Jaratqan İyemizdin' ta'rbiyasına itibarsız qarama, Ol seni a'shkaralag'anda, ruwxın'dı tu'sirme.
6 Sebebi Ol su'ygen adamın ta'rbiyalaydı, Ulı qılıp qabıl etken ha'r bir adamın jazalaydı».
7 Ta'rbiyalanıw ushın shegip atırg'an azapların'ızg'a shıdan'lar. Quday sizlerge O'z balalarınday qatnas jasap atır-g'o. A'kesi ta'repinen ta'rbiyalanbaytug'ın ul bola ma?
8 Ha'r bir adam alatug'ın ta'rbiyanı almay atırg'an bolsan'ız, onda sizler haqıyqıy ullar emes, al nekesiz tuwılg'an balalarsız.
9 Sonday-aq, bizlerdi ta'rbiyalag'an du'nyadag'ı a'kelerimizdi bizler hu'rmet etetug'ın edik. Onday bolsa, ruwxıy A'kemiz bolg'an Qudayg'a ele de ko'birek boysınıp jasawımız kerek emes pe?
10 A'kelerimiz bizlerdi o'zleri durıs dep oylag'an jol boyınsha qısqa waqıt ishinde ta'rbiyaladı. Biraq Quday Onın' muxaddesligine sherik bolıwımız ushın, bizlerdin' paydamızdı oylap ta'rbiyalaydı.
11 Ta'rbiyalaw ushın berilgen ha'r bir jaza waqtında quwanısh emes, al qapagershilik alıp keledi. Biraq keyin ala ol usılay ta'rbiyalang'an adamlarg'a tınıshlıq beriwshi haqlıq alıp keledi.
12 Solay etip, tu'sken en'sen'izdi ko'terip, ayaqların'ızda tik turın'lar.
13 Aran'ızda isenimi aqsag'anlar jaman jolg'a tu'spey tuwrılanıwı ushın, du'ziw jol menen ju'rin'ler.
14 Ha'mme menen tatıw bolıp jasawg'a ha'm muxaddes bolıwg'a tırısın'lar. Muxaddeslikke iye bolmay turıp, hesh kim de İyemizdi ko'rmeydi.
15 Aran'ızdag'ı hesh birin'iz Qudaydın' miyriminen ayırılıp qalmawı ushın ha'm aran'ızda sizlerge zıyan tiygizip, ko'plerdi za'ha'rleytug'ın ashshı tamır ko'gerip shıqpawı ushın, bir-birin'izge jaqsılap qaran'lar.
16 İshin'izde hesh kim buzıqshılıq islemesin yamasa tun'g'ıshlıq huqıqın bir awqat ushın satqan İsab sıyaqlı qudaysız bolmasın.
17 Xabarın'ız bar, İsab son'ınan a'kesinin' pa'tiyasın alıwdı qa'legende, tilegi qabıl etilmedi. Ol ko'z jasların to'gip jalbarınsa da, o'zi islep qoyg'an isti o'zgerte almadı.
18 Sizler jaqınlag'an taw – ko'zge ko'rinetug'ın, lawlap jang'an, qaran'g'ılıq penen tu'nekke sho'kken, dawıl basqan,
19 ka'rnay sesti ha'm Qudaydın' so'zi jan'lag'an Sinay tawı emes. Qudaydın' sol dawısın esitkenler bizlerge qaytıp aytılmasın, dep jalbarıng'an edi.
20 O'ytkeni olar: «Eger tawg'a, ha'tte, maldın' tuyag'ı tiyse de, tas penen urıp o'ltirilsin» , – degen buyrıqtan qorqıp, shıday almadı.
21 Bul ko'rinis sonshelli qorqınıshlı bolg'anlıqtan, Muwsa da: «Ju'da' qorqıp, dirildep baratırman» , – degen edi.
22 iraq sizler Sion tawına, yag'nıy tiri Qudaydın' qalası – aspandag'ı Erusalimge, ondag'ı mın'-mın'lag'an perishtelerdin' quwanıshlı jıyınına
23 ha'm atları aspanda jazılg'an, Qudaydın' tun'g'ısh balaları sıyaqlı bolg'an birinshi iseniwshiler jıynag'ına jaqınladın'lar. Sizler ja'ne de ha'mme adamdı hu'kim etiwshi Qudayg'a, minsizlikke erisken haq adamlardın' ruwxlarına,
24 jan'a kelisimnin' ta'welleshisi İysag'a ha'm Abıldın' qanınan da artıq bolg'an İysanın' keshirim beretug'ın sebilgen qanına jaqınladın'lar.
25 Abaylı bolın'lar, so'ylep turg'an Qudayg'a qulaq aspay ketpen'ler. Onın' tapsırması menen jer betinde eskertip so'ylegen Muwsag'a qulaq aspag'an İzrail xalqı jazadan qashıp qutıla almag'an edi. Eger bizler de aspannan o'zlerimizge eskertip so'ylep turg'an Qudayg'a qulaq aspasaq, bunnan da awırıraq jazadan qalay qashıp qutıla alamız?
26 Quday Sinay tawında so'ylegende, Onın' dawısı jerdi silkindirip jibergen edi. Ol tag'ı da: «Ja'ne bir ma'rtebe tek jerdi emes, al aspandı da silkindiremen» , – dep wa'de bergen edi.
27 «Ja'ne bir ma'rtebe» degen so'zler silkinbeytug'ın na'rselerdin' ma'n'gige qalıwı ushın, silkinetug'ın na'rselerdin', yag'nıy jaratılg'an na'rselerdin' joq bolatug'ının an'latadı.
28 Solay etip, bizler silkinbes patshalıqqa eriskenimiz ushın shu'kirlik bildirip, Qudayg'a unamlı tu'rde, Og'an hu'rmet ha'm qorqınısh penen sıyınayıq.
29 Sebebi bizin' Qudayımız – jandırıp joq qılatug'ın ot.
