Ayan 11 bob

Eki gu'wa (1-14),Jetinshi ka'rnay (15-19).

¹ Sonnan keyin, mag'an o'lsheytug'ın tayaq sıyaqlı qamıs berilip, bılay delindi: – Bar da, Qudaydın' İbadatxanasın ha'm qurbanlıq shalınatug'ın orındı o'lshep, sol jerde sıyınıp atırg'anlardı sanap shıq.

² Al İbadatxananın' sırtqı ha'wlisin o'lshemey qaldır. Sebebi ol jer butqa tabınıwshılarg'a berildi. Olar muxaddes qalanı qırıq eki ay dawamında ayaq astı qıladı.

³ Men O'zimnin' eki gu'wama ku'sh beremen. Olar aza kiyimin kiyip, bir mın' eki ju'z alpıs ku'n payg'ambarshılıq qıladı.

⁴ Bul eki gu'wa – pu'tkil du'nyanın' İyesi Quday aldında turg'an eki za'ytu'n ag'ashın ha'm eki shıra qoyg'ıshtı bildiredi.

⁵ Eger kim de kim olarg'a zıyan tiygizbekshi bolsa, olardın' awızlarınan ot shıg'ıp, dushpanların ku'ydirip joq qıladı. Olarg'a zıyan tiygizbekshi bolg'anlar usılay o'ltiriledi.

⁶ Bul eki gu'wa o'zleri payg'ambarshılıq aytqan ku'nlerde jawın jawmasın dep, aspandı jawıp taslaw biyligine iye. Ja'ne olardın' suwlardı qang'a aylandırıwg'a, qansha qa'lese, jer ju'zin sonsha ha'r tu'rli ba'lelerge duwshar etiwge de biyligi bar.

⁷ Olar gu'walıqların aytıp tawısqanda, teren' tun'g'ıyıqtan shıqqan jırtqısh haywan olar menen urısadı ha'm olardı jen'ip o'ltiredi.

⁸ Olardın' o'ligi tımsalıy tu'rde Sodom ha'm Mısır dep atalatug'ın ullı qalanın' ko'shesinde qaldırıladı. Olardın' İyesi İysa da sol jerde atanaq ag'ashqa shegelengen edi.

⁹ U'sh yarım ku'n barlıq xalıqlardın', urıwlardın', tiller ha'm milletlerdin' adamları olardın' o'ligine qarap, denelerin qa'birge qoyıwg'a ruxsat etpeydi.

¹⁰ Jer ju'zinde jasawshılar bug'an quwanıp, bayram qıladı ha'm bir-birine sawg'alar jiberedi. O'ytkeni bul eki payg'ambar jer ju'zinde jasawshılarg'a azap bergen edi.

¹¹ Biraq u'sh yarım ku'nnen son', Qudaydan kelgen o'mir demi olardın' denelerine enip, ekewi de ayaqqa turdı. Bunı ko'rgenlerdi ku'shli qorqınısh biyledi.

¹² Sonda eki payg'ambar aspannan esitilgen bir dawıstın' o'zlerine: «Bul jerge ko'terilin'ler», – degenin esitti. Olar dushpanlarının' ko'z aldında bir bult u'stinde aspang'a ko'terilip ketti.

¹³ Sol waqıtta-aq ku'shli jer silkiniw bolıp, qalanın' onnan biri qıyralıp qaldı ha'm jeti mın' adam nabıt boldı. Al qalg'an adamlardı ku'shli qorqınısh biylep, aspandag'ı Qudaydı alg'ısladı.

¹⁴ Ekinshi ha'siret o'tti. Mine, u'shinshi ha'siret jaqınlap kelmekte.

¹⁵ Jetinshi perishte ka'rnayın shertti. Aspannan ba'lent dawıslar esitilip: «Du'nya ju'zi patshalıg'ı Quday İyemizdiki ha'm Onın' Masixıniki boldı. Ol ma'n'gige patshalıq etedi», – dedi.

¹⁶ Qudaydın' aldında o'z taxtlarında otırg'an jigirma to'rt aqsaqal jerge bas urıp, Qudayg'a tabındı ha'm bılay dedi:

¹⁷ «Ha'mme na'rsege qu'diretli, Bar bolg'an ha'm ha'zir de bar Quday İyemiz! Sag'an shu'kirlik etemiz. Sebebi Sen ullı qu'diretin' menen patshalıq ete basladın'.

¹⁸ Usı sebepli, milletler ashıwg'a mingen edi. Endi bolsa, Senin' g'a'zebin' olar u'stine jawdı. O'lilerdi hu'kim etiw, Xızmetshilerin' bolg'an payg'ambarlarg'a, Muxaddeslerge, yag'nıy Senin' atın'dı hu'rmet etetug'ın u'lken-kishige sıylıq beriw ha'm Jer ju'zin nabıt qılıwshılardı nabıt qılıw waqtın' keldi»

¹⁹ Sonda Qudaydın' aspandag'ı İbadatxanası ashıldı ha'm İbadatxanadag'ı Onın' Kelisim sandıg'ı ko'rindi. Sol waqıtta shaqmaq shag'ıp, dawıslar ha'm gu'ldirmamanın' gu'rkiregeni esitildi. Jer silkinip, ku'shli burshaq jawdı.