Ayan 14 bob
1 Son'ınan qarap, Qozının' Sion tawının'* u'stinde turg'anın ko'rdim. Qozı menen birlikte man'laylarında Qozının' ha'm Onın' A'kesinin' atı jazılg'an bir ju'z qırıq to'rt mın' adam bar edi.
2 Aspannan sarqırap aqqan suwdın' sestindey, ku'shli gu'ldirmama dawısınday bir ses esittim. Men esitken bul ses tarlı a'sbap shertiwshilerdin' shıg'arg'an sestine uqsag'an edi.
3 Usı bir ju'z qırıq to'rt mın' adam taxtın', to'rt maqluqtın' ha'm aqsaqallardın' aldında jan'a bir qosıq aytıp turg'an edi. Gu'nalarının' qunı o'telip, jer ju'zinen satıp alıng'an usı adamlardan basqa hesh kim bul qosıqtı u'yrene almas edi.
4 Bular – İyemizge sadıq qalıp, butlarg'a tabınbag'an pa'k adamlar edi*. Qozı qayaqqa barsa, olar Onın' izine eredi. Olar Qudaydın' ha'm Qozının' tun'g'ıshları bolıp, adamlar arasınan satıp alıng'anlar.
5 Awızlarınan jalg'an so'z shıqpag'an olar – minsiz adamlar.
6 Bunnan son', men aspannın' ortasında ushıp ju'rgen basqa bir perishteni ko'rdim. Bul perishte jer ju'zinde jasawshılarg'a: ha'r bir millet ha'm urıwg'a, ha'r bir til ha'm xalıqqa ja'riyalanatug'ın ma'n'gi Xosh Xabarg'a iye edi.
7 Ol ba'lent dawıs penen: «Qudaydan qorqın'lar! Onı alg'ıslan'lar! Onın' hu'kim etetug'ın waqtı keldi. Aspandı, jerdi, ten'izdi ha'm suw bulaqların Jaratqang'a sıyının'lar!» – dedi.
8 Onın' izinen kiyatırg'an ekinshi perishte bılay dedi: «Quladı! O'z buzıqshılıg'ının' ku'shli sharabın barlıq milletlerge ishkizip, olardı azg'ırg'an ullı Babilon quladı!»
9 Ekewinin' izinen kiyatırg'an u'shinshi perishte ba'lent dawıs penen bılay dedi: «Kim de kim birinshi jırtqısh haywang'a ha'm onın' mu'sinine tabınıp, man'layına yamasa qolına onın' tamg'asın qabıl etse,
10 ol Qudaydın' qa'ha'rli g'a'zep kesesinde* tayarlang'an Qudaydın' g'a'zebinin' ku'shli sharabınan ishedi. Muxaddes perishtelerdin' ha'm Qozının' aldında ot ha'm janıp turg'an ku'kirtten azap shegedi.
11 Olarg'a azap beretug'ın ottın' tu'tini sheksiz burqırap turadı. Birinshi jırtqısh haywang'a ha'm onın' mu'sinine tabınıp, atının' tamg'asın qabıl etkenler ku'ni-tu'ni tınıshlıq ko'rmeydi.
12 Sol waqıtta Qudaydın' buyrıqların orınlap, İysag'a degen isenimine sadıq qalg'an muxaddeslerdin' sabırlıg'ı kerek boladı».
13 Sonda aspannan bir dawıs mag'an: «Mınanı jazıp qoy: bunnan bılay, İyemizge sadıq qalıp, janın qıyg'anlar qanday baxıtlı!» – dedi. «Awa, olar miynetlerinin' ra'ha'tin ko'redi. Sebebi islegen islerinin' jemisi olardan ayırılmaydı», – deydi Muxaddes Ruwx.
14 Son'ınan men qarap, bir aq bulttı ko'rdim. Bulttın' u'stinde basında altın tajı, qolında o'tkir orag'ı bar, Adam Ulına uqsag'an Birew otır edi.
15 İbadatxanadan shıqqan basqa bir perishte bulttın' u'stinde Otırg'ang'a ba'lent dawıs penen baqırıp: «Orag'ın'dı salıp, or! Orıw waqtı keldi. O'ytkeni jerdin' zu'ra'a'ti pisip jetilisti», – dedi.
16 Bulttın' u'stinde otırg'an orag'ın jerge siltedi ha'm jerdin' zu'ra'a'ti orıldı.
17 Aspandag'ı İbadatxanadan basqa bir perishte shıqtı. Onın' da o'tkir orag'ı bar edi.
18 Al ot u'stinen biylikke iye basqa bir perishte qurbanlıq shalınatug'ın orınnan shıg'ıp, o'tkir oraqlıg'a ba'lent dawıs penen: «O'tkir orag'ın'dı iske sal! Jerdegi ju'zim ag'ashınan solqımlardı jıyna. Sebebi ju'zim pisti», – dedi.
19 Perishte orag'ın jerge siltep, jerdegi ju'zimnin' zu'ra'a'tin jıynap aldı. Onı Qudaydın' g'a'zebinin' u'lken iskenjesine ılaqtırdı.
20 Ju'zim jemisleri qalanın' sırtındag'ı iskenjede sıg'ıldı. İskenjeden aqqan qan u'sh ju'z shaqırım jerge deyin bardı ha'm atlardın' ju'wenlerine shekem ko'terildi.
