Ayan 21 bob
1 Bunnan son', men jan'a aspan menen jan'a jerdi ko'rdim. Sebebi burıng'ı aspan ha'm burıng'ı jer joq bolıp ketken edi. Endi ten'iz de joq edi.
2 Ja'ne men aspannan, Qudaydın' janınan tu'sip kiyatırg'an muxaddes qala – jan'a Erusalimdi ko'rdim. Ol o'z ku'yewi ushın tayarlanıp bezengen kelin sıyaqlı edi.
3 Sonda taxttan shıqqan bir ba'lent dawıstın' bılay degenin esittim: «Mine, Qudaydın' ma'kanı adamlar arasında. Quday da olardın' arasında jasaydı. Olar Qudaydın' xalqı boladı, Qudaydın' O'zi de olardın' Qudayı bolıp, olar menen birge jasaydı.
4 Quday olardın' barlıq ko'z jasların su'rtip taslaydı. Endi o'lim de, qayg'ı da, jılaw da, azap ta bolmaydı. O'ytkeni burıng'ılar o'tip ketti».
5 Taxtta Otırg'an: – Endi ha'mmesin jan'alayman, – dedi. Ol ja'ne mag'an: – Mınanı jaz: sebebi bul so'zler isenimli ha'm haqıyqat, – dedi.
6 Son'ınan Ol mag'an bılay dedi: – Orınlandı. Men – Alfa ha'm Omegaman, birinshi ha'm son'g'ıman. Sho'llegen adamg'a o'mir suwının' bulaqlarınan esheyin suw beremen.
7 Jen'ip shıqqan usılardı miyras etip aladı. Men onın' Qudayı bolaman, ol Mag'an perzent boladı.
8 Biraq qorqaqlar, isenbeytug'ınlar, haramılar, adam o'ltiriwshiler, buzıqlar, sıyqırshılar, butparazlar ha'm barlıq o'tirikshilerdin' ornı – ku'kirt jang'an ot ko'li boladı. Bul – ekinshi o'lim.
9 Son'ınan aqırg'ı jeti ba'lege tolı jeti kesesi bar jeti perishtenin' biri janıma kelip: – Berman kel. Men sag'an Qozının' qalın'lıg'ın ko'rsetemen. Ol Qozının' bolajaq kelinshegi, – dedi.
10 Perishte meni Muxaddes Ruwxtın' basqarıwında u'lken ha'm biyik bir tawg'a ko'terdi. Ol jerden mag'an aspannan, Qudaydın' janınan tu'sip kiyatırg'an muxaddes qala Erusalimdi ko'rsetti.
11 Qala Qudaydın' saltanatına iye edi. Ol hasıl tas sıyaqlı, kristallday mo'ldir yaspis tası sıyaqlı jarqırap tur edi.
12 Qalanın' u'lken ha'm biyik diywalları bolıp, on eki da'rwazası bar edi. Da'rwazalardı on eki perishte qarawıllaytug'ın edi. Da'rwazalarg'a İzraildın' on eki urıwının' atları jazılg'an edi.
13 Shıg'ısta u'sh da'rwaza, arqada u'sh da'rwaza, qublada u'sh da'rwaza, batısta u'sh da'rwaza bar edi.
14 Qalanın' diywalları on eki tiykar tasqa iye bolıp, olarda Qozının' on eki elshisinin' atları jazılg'an edi.
15 Menin' menen so'ylesken perishtenin' qolında qalanı ha'm qalanın' da'rwazaları menen diywalların o'lshew ushın, o'lsheytug'ın altın tayaq bar edi.
16 Qala to'rt mu'yesh ta'rizinde bolıp, uzınlıg'ı menen eni birdey edi. Perishte qalanı o'lsheytug'ın tayaq penen o'lshegende, uzınlıg'ı, eni ha'm biyikligi birdey bolıp, ha'r bir ta'repi eki mın' eki ju'z shaqırım bolıp shıqtı.
17 Perishte diywallardı da o'lshep shıqtı. Adamnın' o'lshemi boyınsha, diywallardın' biyikligi alpıs bes metr bolıp shıqtı.
18 Diywallar yaspis tasınan, al qala mo'ldir shiyshe sıyaqlı, sap altınnan salıng'an edi.
19 Qala diywallarının' tiykar tasları ha'r tu'rli hasıl taslar menen bezelgen edi. Birinshi tiykar tası yaspis, ekinshisi ko'k sapfir, u'shinshisi xalkidon, to'rtinshisi jasıl zumrat,
20 besinshisi ala sardoniks, altınshısı sardolik, jetinshisi sarı yaqıt, segizinshisi ko'k zumrat, tog'ızınshısı sarı topaz, onınshısı sarı zumrat, on birinshisi ko'k yaqıt, on ekinshisi qızg'ılt ko'k ametist.
21 On eki da'rwaza on eki hinji, yag'nıy ha'r bir da'rwaza bir hinjiden sog'ılg'an edi. Qalanın' ko'shesi mo'ldir shiyshe sıyaqlı sap altınnan edi.
22 Men qalada İbadatxana ko'rmedim. O'ytkeni ha'mme na'rsege qu'diretli Quday İyemiz ha'm Qozı qalanın' İbadatxanası edi.
23 Qalanı jaqtılandırıw ushın quyashtın' yamasa aydın' keregi joq edi. Sebebi Qudaydın' saltanatı onı jaqtılandırıp turatug'ın edi. Al Qozı onın' shırası edi.
24 Milletler qalanın' jaqtısında ju'redi. Du'nya patshaları o'z dan'qsaltanatın ol jerge alıp keledi.
25 Qalanın' da'rwazaları ha'r qashan ashıq turadı, o'ytkeni ol jerde hesh qashan tu'n bolmaydı.
26 Adamlar o'z milletinin' dan'q-saltanatın ha'm abırayın ol jerge alıp keledi.
27 Og'an hesh qanday haram na'rse, jerkenishli ha'm jalg'an isler islegen hesh kim hesh qashan kirmeydi. Tek atları Qozının' O'mir kitabında jazılg'anlar g'ana kiredi.
