Ayan 3 bob
1 – Sardis ja'ma'a'tinin' jetekshisine* jaz. Qudaydın' jeti ruwxına* ha'm jeti juldızına iye bolg'an bılay deydi: «Senin' islerin'di bilemen. Tiri ja'ma'a't degen atın' bar, biraq sen o'lisen'.
2 Sergek bol! Ele o'lmey qalg'an, endi o'leyin dep atırg'anlardı bekkemle. Sebebi Qudayımnın' aldında senin' islerin'nin' jetkiliksiz ekenligin ko'rdim.
3 Sonlıqtan o'zin' qabıl alıp esitken ta'liymatın'dı esin'e tu'sir. Onı tutınıp, ta'wbe et! Eger sergek bolmasan', Men urı sıyaqlı ku'tilmegende kelemen, sag'an qashan keletug'ınımdı bilmey qalasan'.
4 Biraq Sardiste, sizlerdin' aran'ızda, iplaslanbag'an ayırım adamlar bar. Olar aq kiyim kiyip, Menin' menen birge ju'redi. O'ytkeni olar usıg'an ılayıqlı.
5 Jen'ip shıqqan usınday aq kiyim kiyedi. Bunday adamnın' atın O'mir kitabınan hesh qashan o'shirmeymen. A'kemnin' ha'm Onın' perishtelerinin' aldında bul adamnın' atın ashıq ta'n alaman.
6 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin».
7 – Filadelfiya ja'ma'a'tinin' jetekshisine jaz. Muxaddes ha'm haqıyqat bolg'an, Dawıttın' giltine iye, Ol ashsa hesh kim jaba almaytug'ın, japsa, hesh kim asha almaytug'ın bılay deydi:
8 «Senin' islerin'di bilemen. Mine, senin' aldın'a hesh kim jaba almaytug'ın ashıq bir qapı qoydım. Ku'shin' az bolsa da so'zimdi orınlap, atımnan waz keshpedin'.
9 Qara, shaytannın' jıyınınan bolg'anlardı, o'zlerin yahudiymiz dep atap, biraq yahudiy bolmag'an o'tirikshilerdi sag'an tapsıraman. Olardı sag'an keliwge ha'm senin' ayag'ın'a bas urıwg'a ma'jbu'r etip, olarg'a Menin' seni su'yetug'ınımdı ko'rsetemen.
10 Sabırlılıq penen shıda degen buyrıg'ımdı orınlag'anın' ushın, jer ju'zinde jasaytug'ınlardı sınaw maqseti menen pu'tkil du'nya ju'zine keletug'ın sınaq waqtınan Men de seni saqlayman.
11 Men jıldam kelemen. Tajın'dı hesh kim alıp qoymawı ushın, o'zin'de bar na'rsege bekkem bol.
12 Jen'ip shıqqandı Qudayımnın' İbadatxanasının' su'tini qılaman. Sol adam ol jerden hesh qashan shıqpaydı. Onın' u'stine Qudayımnın' atın, Qudayımnın' qalasının' atın, yag'nıy aspannan, Qudaydın' janınan tu'setug'ın jan'a Erusalimnin' atın ha'm O'zimnin' jan'a atımdı jazaman.
13 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin».
14 – Laodikiya ja'ma'a'tinin' jetekshisine jaz. Awmiyin, sadıq ha'm haqıyqıy gu'wa, Qudaydın' jaratqanlarının' Hu'kimdarı bılay deydi:
15 «Senin' islerin'di bilemen. Sen ya suwıq, ya ıssı emessen'. Qa'ne endi, ya suwıq, ya ıssı bolsan'!
16 Sen ıssı da, suwıq ta emes, al jıllı bolg'anın' ushın, seni awzımnan qusıp jiberemen.
17 Bayman, bayıdım, hesh na'rsege mu'ta'j emespen, deysen'. Biraq o'zin'nin' baxıtsız, ayanıshlı, jarlı, soqır ha'm jalan'ash ekenligin'di bilmeysen'.
18 onlıqtan Menin' sag'an aytatug'ın ma'sla'ha'tim mınaw: bay bolıwın' ushın, Mennen otta tazalang'an altın, jalan'ashlıg'ın'nın' ayıbı ko'rinbew ushın aq kiyimler, ko'riwin' ushın ko'zlerin'e su'rtetug'ın da'ri satıp al.
19 Men su'ygenlerimnin' ha'mmesin a'shkara etip, ta'rbiyalayman. Sol sebepli intalı bolıp, ta'wbe et.
20 Mine, Men qapı aldında qag'ıp turman. Eger kim de kim dawısımdı esitip, qapını ashsa, onın' u'yine kiremen. Men onın' menen, ol Menin' menen birge awqat jeymiz.
21 Men jen'ip shıg'ıp, A'kem menen birge Onın' taxtına otırg'anımday, jen'ip shıqqang'a da Menin' menen birge taxtıma otırıw huqıqın beremen.
22 Qulag'ı bar Muxaddes Ruwxtın' ja'ma'a'tlerge aytıp atırg'an so'zlerin esitsin».
