Ayan 7 bob
1 Bunnan son', men jer ju'zinin' to'rt mu'yeshinde turg'an to'rt perishteni ko'rdim. Olar jer betine, ten'izge ha'm ha'r bir terekke espesin dep, jer ju'zinin' to'rt samalın uslap turg'an edi.
2 Men ja'ne shıg'ıstan ko'terilip kiyatırg'an, tiri Qudaydın' mo'rine iye basqa bir perishteni ko'rdim. Ol jerge ha'm ten'izge zıyan keltiriw biyligi berilgen to'rt perishtege ba'lent dawıs penen baqırıp:
3 «Bizler Qudayımızdın' xızmetshilerinin' man'laylarına mo'r baspag'anımızsha, jerge, ten'izge ha'm tereklerge zıyan tiygizben'ler!» – dedi.
4 Sonda men man'laylarına mo'r basılg'anlardın' sanı bir ju'z qırıq to'rt mın' ekenin esittim. Olar İzrail xalqının' barlıq urıwlarınan edi.
5 Yahuda urıwınan on eki mın', Ruben urıwınan on eki mın', Gad urıwınan on eki mın',
6 Gad urıwınan on eki mın', Asher urıwınan on eki mın',
7 Naftali urıwınan on eki mın', Manasiya urıwınan on eki mın', Simon urıwınan on eki mın', Lebiy urıwınan on eki mın', İsahar urıwınan on eki mın',
8 Zebulon urıwınan on eki mın', Yusup urıwınan on eki mın', Benamin urıwınan on eki mın' adamg'a mo'r basıldı.
9 Bunnan son' qarasam, ha'r tu'rli milletten, ha'r tu'rli urıwdan, ha'r tu'rli xalıqtan ha'm ha'r tu'rli tilden bolg'an, hesh kim sanay almaytug'ın u'lken topar taxtın' ha'm Qozının' aldında tur edi. Ha'mmesi aq kiyim kiygen bolıp, qollarına xurma ag'ashının' shaqaların uslap turg'an edi.
10 Olar ba'lent dawıs penen: «Qutqarıw taxt u'stinde otırg'an Qudayımızdın' ha'm Qozının' qolında», – dep baqırıp turg'an edi.
11 Barlıq perishteler taxtın', aqsaqallardın' ha'm to'rt maqluqtın' do'gereginde turg'an edi. Olar taxtın' aldında jerge jıg'ılıp, Qudayg'a tabınıp bılay dedi:
12 «Awmiyin. Alg'ıs, dan'q, danalıq, Maqtaw, hu'rmet, ku'sh-qu'diret Ma'n'gige Qudayımızdiki bolsın. Awmiyin».
13 Sonda aqsaqallardın' biri mennen: – Aq kiyim kiygen mına adamlar kimler, olar qayaqtan keldi? – dep soradı.
14 – Bunı siz bilesiz, mırzam, – dedim men. Ol mag'an bılay dedi: – Bular – awır azaptı basınan keshirgenler. Kiyimlerin Qozının' qanı menen juwıp, appaq qılg'anlar.
15 Sonlıqtan olar Qudaydın' taxtının' aldında turıp, Onın' İbadatxanasında ku'ni-tu'ni Og'an xızmet etedi. Taxtta Otırg'an olar menen birge bolıp, O'z panasında saqlaydı.
16 Olar endi hesh qashan ash bolmaydı ha'm sho'llemeydi, quyash yamasa ja'ziyrama ıssı olardı ku'ydirmeydi.
17 O'ytkeni taxtın' ortasında bolg'an Qozı olardın' shopanı bolıp, tiri suw bulaqlarına alıp baradı. Quday olardın' barlıq ko'z jasların su'rtip taslaydı.
