Biyler 6 bob
1 İzraillılar Jaratqan İyenin' na'zerinde jawız bolg'an islerdi ja'ne isledi. Jaratqan İye de olardı jeti jıl midyanlılarg'a ta'slim etti.
2 Midyanlılardın' izraillılarg'a ko'rsetken zulımlıg'ı sonshelli awır bolg'anlıqtan, izraillılar o'zleri ushın tawlarda panalaytug'ın jerler, u'n'girler ha'm qorg'anlar islep aldı.
3 İzraillılar egin ekken waqtında, midyanlılar, amalekler ha'm ku'nshıg'ıstag'ı basqa xalıqlar elge basqınshılıq etetug'ın edi.
4 Olar İzrailda ordaların qurıp alıp, Gazag'a deyingi eginlerin joq qılatug'ın ha'm tirishilik etiwge kerekli bolg'an qoy, sıyır, eshek sıyaqlı na'rselerdin' hesh qaysısın qoymaytug'ın edi.
5 Sebebi olar o'zlerinin' malları ha'm shatırları menen birge shegirtke sıyaqlı ko'p bolıp keletug'ın edi. Olardın' o'zlerinin' de, tu'yelerinin' de esap-sanı joq bolıp, İzraildı wayran etiw ushın, el boylap ju'retug'ın edi.
6 İzrail xalqı midyanlılar sebepli sonshelli jarlılanıp qalg'anlıqtan, olar Jaratqan İyege jalbarına basladı.
7 İzraillılar midyanlılar sebepli Jaratqan İyege jalbarıng'anda,
8 Jaratqan İye olarg'a bir payg'ambar jiberdi. Payg'ambar olarg'a bılay dedi: – İzraildın' Qudayı Jaratqan İye bılay deydi: «Sizlerdi Mısırdan, qul bolg'an jerin'izden Men alıp shıqtım.
9 Sizlerdi mısırlılardın' ha'm pu'tkil zulım etiwshilerdin' qolınan Men qutqardım. Olardı aldın'ızdan quwıp, jerlerin sizlerge berdim».
10 Sonda Men sizlerge: «Men – sizlerdin' Qudayın'ız Jaratqan İye bolaman. O'zlerin'iz jerlerinde jasap atırg'an amorlardın' qudaylarına tabınban'lar», – degen edim. Biraq sizler so'zime qulaq salmadın'lar.
11 Sonnan keyin, Jaratqan İyenin' perishtesi kelip, Ofra qalasındag'ı Abiezer a'wladınan bolg'an İoashqa tiyisli terebinf ag'ashının' astında otırdı. Sol waqıtta İoashtın' ulı Gideon midyanlılardan jasırıp, sharap iskenjesinde biyday tu'yeklep atırg'an edi.
12 Jaratqan İyenin' perishtesi og'an ko'rinip: – Ha'y, batır jigit, Jaratqan İye senin' menen birge, – dedi.
13 Gideon og'an: – O, mırzam, eger Jaratqan İye bizler menen birge bolsa, onda bulardın' barlıg'ı ne ushın basımızg'a tu'sti? Ata-babalarımız bizlerge: «Jaratqan İye bizlerdi Mısırdan alıp shıqtı», – dep aytıp bergen edi. Jaratqan İyenin' sol a'jayıp isleri qayda qaldı? Jaratqan İye bizlerdi taslap ketti ha'm midyanlılarg'a ta'slim qıldı, – dedi.
14 Jaratqan İye Gideong'a qarap: – O'zin'de bar bolg'an ku'sh-quwatın' menen bar da, İzraildı midyanlılardın' qolınan qutqar. Seni Men jiberip atırman, – dedi.
15 Gideon: – O, İyem, men İzraildı qalayınsha qutqara alaman? Menin' tiyrem Menashshe urıwındag'ı en' a'zzi tiyre, men de u'ydegi genje ulman, – dedi.
16 Jaratqan İye og'an: – Men senin' menen birge bolaman. Sen midyanlılardın' ha'mmesin bir adamdı jen'gendey qılıp, qırıp taslaysan', – dedi.
17 Sonda Gideon: – Eger men Senin' miyrimin'e erisken bolsam, menin' menen so'ylesip atırg'an Sen ekenin'di biliwim ushın, mag'an bir nıshan ko'rset.
18 İltimas, Sag'an sadaqamdı a'kelip, usınbag'anımsha, bul jerden ketip qalma, – dedi. Jaratqan İye Gideong'a: – Sen qaytıp kelgenin'she, usı jerde turaman, – dep juwap berdi.
19 Gideon u'yine barıp, bir ılaqtı soydı, bir efa unnan ashıtqısız nan pisirdi ha'm go'shti sebetke saldı da, sorpasın tabaqqa quydı. Gideon bulardı terebinf ag'ashının' astına alıp barıp, perishtege usındı.
20 Qudaydın' perishtesi og'an: – Go'shti ha'm ashıtqısız nanlardı alıp, olardı mına tastın' u'stine qoy da, sorpanı u'stine quy, – dedi. Gideon aytılg'anlardı isledi.
21 Jaratqan İyenin' perishtesi qolındag'ı tayag'ının' ushın go'sh ha'm ashıtqısız nang'a tiygizgende, tastan ot shıqtı. Ot go'sh ha'm ashıtqısız nandı jag'ıp, joq qılıp jiberdi. Sonnan keyin Jaratqan İyenin' perishtesi ko'zden g'ayıp boldı.
22 Gideon ko'rgen adamının' Jaratqan İyenin' perishtesi ekenin tu'sinip: – Wah, Quday İye! Men Senin' perishten' menen ju'zbe-ju'z ko'ristim, – dedi.
23 Jaratqan İye og'an: – Sag'an tınıshlıq bolsın. Qorqpa, o'lmeysen', – dedi.
24 Gideon ol jerde Jaratqan İye ushın qurbanlıq orın isledi. Qurbanlıq orındı Yahwe Shalom dep atadı. Bul orın bu'gin de Abiezer urpaqlarının' Ofra qalasında tur.
25 Tap sol ku'ni tu'nde Jaratqan İye Gideong'a: – A'ken'nin' padasınan jeti jasar bir bug'anı al. Sonnan keyin, a'ken'nin' Baal ushın soqtırg'an qurbanlıq orındı buzıp, qasındag'ı kiyeli ag'ashtı shawıp tasla.
26 Usı to'beshiktin' u'stine Qudayın' Jaratqan İyege arnap, tegis etip qurbanlıq orın qur. Son'ınan sol bug'anı al da, o'zin' kesetug'ın kiyeli ag'ashtı otın qılıp, jandırılatug'ın qurbanlıq etip bag'ıshla, – dedi.
27 Gideon o'z adamlarınan on adamdı qasına alıp, Jaratqan İyenin' o'zine aytqanların orınladı. Biraq ol u'yindegilerden ha'm qala xalqınan qorqqanlıqtan, bunı ku'ndiz emes, al tu'nde isledi.
28 Azanda erte turg'an qala xalqı Baalg'a arnalg'an qurbanlıq orınnın' buzılıp atırg'anın, kiyeli ag'ashtın' shabılg'anın ha'm bug'anın' tazadan qurılg'an qurbanlıq orınnın' u'stinde qurbanlıq qılıp usınılg'anın ko'rdi.
29 Sonda olar bir-birinen: «Bunı kim isledi?» – dep soradı. Sorastırıp ko'rgennen son', bul isti İoash ulı Gideonnın' qılg'anın bildi.
30 Sol sebepten olar İoashqa: – Balan'dı sırtqa shıg'ar, ol o'liwi kerek. Sebebi ol Baaldın' qurbanlıq ornın buzıp, qasındag'ı kiyeli ag'ashtı shawıp taslag'an, – dedi.
31 İoash o'zine topılıp kelgen adamlarg'a: – Baaldı qorg'aw sizlerge qaldı ma? Onı qutqaratug'ın sizler me? Baaldı qorg'aytug'ınlar tan'g'a deyin o'ltiriledi. Eger Baal quday bolsa, ol o'zi ushın gu'ressin. O'ytkeni buzılg'an qurbanlıq orın onıki-g'o! – dedi.
32 Sol ku'ni İoash: «Baal o'zi ushın o'z gu'ressin, o'ytkeni buzılg'an qurbanlıq orın onıki», – dep, Gideondı Erubbaal dep atadı.
33 Sol arada midyanlılar, amalekler ha'm shıg'ıs xalıqları birlesip, İordan da'ryasınan o'tti de, İzreel oypatlıg'ına shatırların qurdı.
34 Sonda Jaratqan İyenin' Ruwxı Gideonnın' u'stine tu'sti ha'm ol ka'rnayın shertip, Abiezer urpaqların o'zinin' izine eriwge shaqırdı.
35 Gideon pu'tkil Menashshe urıwına xabarshılar jiberip, ol jerdegi xalıqtı da jıynadı. Ol Asher, Zebulon ha'm Naftaliy urıwlarına da xabarshılar jiberdi. Solay etip, olar da birlesiwge keldi.
36 Sonda Gideon Qudayg'a bılay dedi: – Eger O'zin' wa'de etkenin'dey, İzraildı men arqalı qutqaratug'ının' ras bolsa,
37 onda men mına qırqılg'an ju'ndi qırmannın' u'stine jayaman. Eger shıq ju'nnin' u'stine tu'sip, al jer qurg'aq bolsa, onda O'zin' aytqanın'day, İzraildı men arqalı qutqaratug'ının'dı bilemen.
38 Solay boldı da. Erten'ine azanda erte turg'an Gideon ju'ndi alıp sıqqanda, ju'nnen bir kese tolı suw shıqtı.
39 Sonnan keyin, Gideon Qudayg'a bılay dedi: – Mag'an g'a'zeplenbe, ja'ne bir tilegim bar. Usı ju'n arqalı sınawıma ja'ne bir ma'rte ruxsat et. Bul ret tek ju'n g'ana qurg'aq bolıp, jer betin shıq qaplasın.
40 Quday sol tu'nde Gideonnın' aytqanın isledi. Ju'n qurg'aq bolıp, pu'tkil jer betin shıq qapladı.
